¡Tuku kitaxtu akxni litsinaw!

Helen ya kxpaxtun akgtum carrito niku kawilikan likgalhtawakga chu lakalitsinit akxni chatiy laktsuman titaxtumakgo anta.

CHATIY laktsuman xtitaxtumakgolh niku lhuwa stanankan kBaguio (Filipinas). Akxilhkgolh akgtum carrito niku kawilikan kilikgalhtawakgakan, pero ni talakatsuwikgolh. Helen, tala puskat tiku xya anta niku xwi carrito, kalakaʼakxilhli chu katalakalitsilh. Umakgolh laktsuman kaj titaxtukgolh, pero lu kaks lilakawankgolh la katalitsilh tala Helen.

Alistalh, akxni xtaspitmakgolh kxchikkan kʼakgtum autobús, akxilhkgolh akgtum lanka cartel anta kPukgalhtawakga niku xtalhkatawilanit jw.org. Lakapastakkgolh pi wa umakgolh letras nema xʼakxilhkgonit anta kcarrito niku wilikan kilikgalhtawakgakan. Taktakgolh kʼautobús chu akxilhkgolh horas nema xtamakxtumikgo tanu tanu congregaciones kʼuma Pukgalhtawakga.

Watiya umakgolh laktsuman ankgo kPukgalhtawakga chu lakalitsinkgo akxni akxilhkgo Helen.

Umakgolh chatiy laktsuman ankgolh kʼakgtum tamakxtumit. Chu ¿tiku pulana akxilhkgolh anta kPukgalhtawakga? ¡Wa tala Helen! Tunkun lakgapaskgolh tala xlakata la xkatalitsinit. Helen lichuwinan: «Akxni kilakgtalakatsuwikgolh, tsinu kpekualh. Klakpuwa pi max wi tuku nitlan xaktlawanit». Pero umakgolh laktsuman wanikgolh Helen tuku xlanit.

Umakgolh chatiy laktsuman lu lakgatikgolh tamakxtumit chu lu tlan limakgkatsikgolh xlakata akxtum xkatawilakgo natalan. Akxni akxilhkgolh pi natalan xkaxakamakgo kPukgalhtawakga akxni sputli tamakxtumit, na makgtayanankgolh. Lata uma kilhtamaku, chatum nialh lama kʼuma país, pero achatum tsukunit an ktamakxtumit chu tsukukanit limakgalhtawakgakan Biblia. ¡Wa uma tuku tlan kitaxtulh xlakata katalitsinka!