¿Tlantiya nalatapaya kxasasti kakilhtamaku?
KIMPUTUMKAN lakaskinaw pi kakgantaxtulh xtamalaknun Jesús: «Paxuwakgo tiku taktujukgo, xlakata xlakan wa nakamaxkikan katiyatni» (Mat. 5:5). Kstalaninanin Cristo tiku xatalaksakni namakgamakglhtinankgo Katiyatni akxni natamapakgsinankgo Jesús kʼakgapun (Apoc. 5:10; 20:6). Amakgapitsi kstalaninanin Cristo makgamakglhtinamputunkgo Katiyatni chu anta latamaputunkgo putum kilhtamaku. Nialh katikgalhikgolh talakgalhin, napaxuwakgo chu nakgalhikgo takaksni. Xlakata nakgantaxtu uma, natalakaskin lu naliskujkan. Kʼuma artículo nalichuwinanaw pulaktutu: akgtum Paraíso natlawakgo Katiyatni, nakamaxkikgo tuku namaklakaskinkgo tiku nalakastakwanankgo chu nakamasiyanikgo. Na nalichuwinanaw tuku tlan natlawaya la uku xlakata nalimasiyaya pi tlawaputuna umakgolh taskujut kxasasti kakilhtamaku.
¿TLANTIYA AKGTUM PARAÍSO NAMAKGTLAWAYA KATIYATNI?
Akxni Jehová kawanilh latamanin «kamalakgatsamatit katiyatni chu kakuentajtlawatit», maʼakgatekgsninalh pi xʼama min kilhtamaku akxni akgtum Paraíso xʼama wan putuminika Katiyatni (Gén. 1:28). Tiku putum kilhtamaku nalatamakgo kKatiyatni xlimakgantaxtitkan nawan uma limapakgsin. Akxni sputnita nawan Armagedón ni tunkun katiʼanalh akgtum Paraíso, xlakata jardín xaʼEdén akglhuwa mil kata nialhtu ananit. Natalakaskin nalakkaxtlawakan putum tuku latamanin lakxtlawakgonit. ¡Naʼanan lhuwa taskujut!
Wa uma tuku tlawakgolh israelitas akxni kitaspitkgolh kBabilonia, xlakata 70 kata niti xlatamanit kxchachikinkan. Jehová xʼama kamakgtaya xlakata xkakaxtlawakgolh, chuna la wa palakachuwina Isaías: «Natlawa pi xakaskakni tiyat xtachuna la Edén nawan, chu kxakaxtum xakaskakni tiyat chuna la xjardín Jehová» (Is. 51:3). Israelitas kalilakgatit tlawakgolh xkachikinkan. Xtachuna la uma, xlakata Jehová nakamakgtaya, tiku nalatamakgo kKatiyatni akgtum Paraíso natlawakgo. Chu la uku anan tuku wix tlan natlawaya xlakata nalimasiyaya pi makgtlawaputuna uma lu tlan taskujut.
Pulaktum tuku tlan natlawaya wa pi xaskulunku nawiliya minchik chu minkilhtin, chuna la matlaniya. Tlan chuna natlawaya maski mintalakatsunin nichuna lismanikgonit natlawakgo. Nachuna, tlan namakgtayanana akxni kaxtlawakan chu kaxakakan kkimPukgalhtawakgakan chu kSalones de Asambleas. Chu komo matlaniya, tlan namakgtayanana klabores de socorro. Chuna nalimasiyaya pi xlikana kamakgtayaputuna tiku maklakaskinkgo. Kalakpuwanti: «¿Wi tuku tlan xakkatsinilh nema nakimakgtaya kxasasti kakilhtamaku komo Jehová nakimaxki talakaskin naklatama anta?».
¿TAKAXNITATA XLAKATA NAKAMAKGTAYAYA TIKU NALAKASTAKWANANKGO?
Akxni malakastakwanilh xtsumat Jairo, Jesús wa pi wi tuku xmawika (Mar. 5:42, 43). Max ni tuwa kuentajtlawakgolh aktsu tsumat tiku kajku 12 kata xkgalhi. Pero max lilakpuwanaw la xlilhuwa taskujut naʼanan akxni Jesús namakgantaxti uma tamalaknun: «Putum tiku wilakgolh kputaknun nakgaxmatkgo xtachuwin chu nataxtukgo» (Juan 5:28, 29). Maski Biblia ni lu lichuwinan, tiku nalakastakwanankgo namaklakaskinkgo liwat, niku natawilakgo chu lhakgat. ¿Tlan nalimasiyaya la uku pi wix na anta tawilaputuna xlakata namakgtayanana? Kalilakpuwanti umakgolh takgalhskinin.
¿Tuku tlan natlawaya wix la uku xlakata nalimasiyaya pi tlantiya nalatapaya kxasasti kakilhtamaku?
Akxni kmicongregación makatsininankan pi nakalakgapaxialhnanan superintendente de circuito, ¿lakkaxwiliya xlakata tlan natawayana? Max chatum betelita nawanikan pi namakgxtakga xtaskujut kBetel o chatum superintendente de circuito namakgxtakga xtaskujut. ¿Tlan xkamakgtaya natekgskgo niku natawilakgo? Komo niku lapat natlawakan lanka tamakxtumit, ¿tlan xwanti pi namakgtayanana akxni nina tsuku o akxni sputnita nawan asamblea, o xlakata nakamakgamakglhtinana natalan xalak atanu kachikin nema sucursales kamalakgacha?
¿TAKAXNITATA XLAKATA NAKAMASIYANIYA TIKU NALAKASTAKWANANKGO?
Tuku lichuwinan Hechos 24:15 kinkamalakapastakayan pi lhuwa millones latamanin nalakastakwanankgo. Lhuwa ni lakgapaskgolh Jehová akxni nina xnikgo, pero kxasasti kakilhtamaku tlan nalakgapaskgo.a Tiku skujnanikgo Jehová chu ni makgxtakgkgonit tlan namakgtayanankgo xlakata nakamasiyanikan tiku nalakastakwanankgo (Is. 11:9). Charlotte, chatum tala puskat tiku lichuwinanit Dios kʼEuropa, kSudamérica chu kʼÁfrica, lu kgalhkgalhima nachin uma kilhtamaku. Xla lu paxuwa chu wan: «Lu kkamasiyaniputun tiku nalakastakwanankgo. Akxni klikgalhtawakga xpalakata tiku latamalh makgasa, makglhuwa klakpuwan: “Komo uma lataman xtilakgapasli Jehová, lu tanu xwa xlatamat”. Lu kkawaniputun tiku nalakastakwanankgo putum tuku ni akxilhkgolh xlakata ni lakgapaskgolh xaxlikana».
Asta kskujnin Jehová tiku latamakgolh akxni Jesús nina xmin kKatiyatni lhuwa tuku nakatsinikgo. Nakgalhiyaw lanka talakgalhaman nawaniyaw Daniel la kgantaxtulh tuku lichuwinalh nema xla ni akgatekgsli (Dan. 12:8). Lu nalipaxuwayaw nakawaniyaw Rut chu Noemí pi Mesías milh kxfamiliajkan. Lu lanka talakgalhaman nawan namakgtlawayaw uma taskujut. Nialh katiʼanalh tuku nixatlan kʼuma kakilhtamaku.
¿La tlan nalimasiyaya pi makgtlawaputuna uma lu xlakaskinka taskujut? Pulaktum la natlawaya wa lu naliskuja xlakata tlakg tlan makgalhtawakgena nawana chu ankgalhin nalichuwinana Dios (Mat. 24:14). Maski lipinata kata o atanu tuku titaxtupat nema tlawa pi nialh lhuwa nalichuwinana Dios, komo natlawaya putum tuku matlaniya, nalimasiyaya pi tlan nakamasiyaniya tiku nalakastakwanankgo.
Kalilakpuwanti uma: ¿xlikana latapaputuna kxasasti kakilhtamaku?, ¿lipaxuwaya akxni lilakpuwana pi akgtum Paraíso namakgtlawaya Katiyatni, nakamakgtayaya tiku nalakastakwanankgo chu nakamasiyaniya xaxlikana? Nalimasiyaya pi tlantiya nalatapaya kxasasti kakilhtamaku komo la uku natlawa taskujut nema xtachuna tuku natlawaya anta.
a Ka’akxilhti artículo «Lhuwa tiku kamakgtayakan “xlakata natlawakgo tuku xaʼakgstitum”», nema min krevista Makatsinina xla septiembre kata 2022.