Tuku katsiputunkgo tiku likgalhtawakgakgo
¿Kaj xmalakatsalima David akxni wa pi «putum kilhtamaku» xʼama malanki Dios, chuna la wan Salmo 61:8?
Nichuna. Tuku David tsokgwililh xaxlikana.
Kalilakpuwantit tuku tsokgwililh kʼuma versículo chu kʼatanu versículos. Xla wa: «Naklimalanki takilhtlin mintukuwani putum kilhtamaku chu chali chali nakmakgantaxti tuku klitayanit», «Kmalankiyan xliputum kinaku, oh, Jehová kiDios», chu «Nakmalanki mintukuwani putum kilhtamaku» (Sal. 61:8; 86:12; 145:1, 2).
Ni kaj xmalakatsalima tuku wa David. Xla xkatsi pi xmima kilhtamaku xʼama niy xlakata makglakgalhina xwanit (Gén. 3:3, 17-19; Sal. 51:4, 5). Liwana xkatsi pi asta kskujnin Jehová tiku ni makgxtakgkgolh, chuna la Abrahán, Isaac chu Jacob, na nikgolh. Na xkatsi pi xlatamat xʼama sputa (Sal. 37:25; 39:4). Pero tuku tsokgwililh kSalmo 61:8 limasiya pi xlakkaxwilinit namalanki Dios putum kilhtamaku, uma wamputun, putum kilhtamaku nema xlatamalh (2 Sam. 7:12).
Xmin kilhtamaku David xtsokgwili tuku xtitaxtuma, chuna la masiya niku tsuku Salmos 18, 51 chu 52. Anta kSalmo 23, lichuwinan pi Jehová xtachuna la mapuchwayanina tiku pulalinan, tlan mamakgkatsininan chu kakuentajtlawa xborregos. David chuna xkakuentajtlawa xborregos chu wa xlakata kskujnaniputun Jehová putuminika kxlatamat (Sal. 23:6).
Na kalakapastakwi pi tuku tsokgwililh David wa Dios malakpuwanilh. Makgapitsi tuku tsokgwililh xʼama kgantaxtu kkilhtamaku nema aku mima. Akgtum liʼakxilhtit, anta kSalmo 110, David wa pi xʼama chan kilhtamaku akxni xMalana xʼama tawila kxpaxtun Dios kʼakgapun chu xʼama makglhtinan lhuwa litliwakga. Xʼama limaklakaskin uma litliwakga xlakata xkamasputulh xtalamakgasitsin Dios chu “xkamalakgaxokgelh kachikinin”. David wa xkilhtsukut Mesías litaxtulh, tiku xʼama mapakgsinan kʼakgapun chu «sacerdote xʼama litaxtu putum kilhtamaku» (Sal. 110:1-6). Jesús masiyalh pi tuku wan Salmo 110 lichuwinan xpalakata chu la xʼama kgantaxtu uma kkilhtamaku nema aku mima (Mat. 22:41-45).
Chuna la akxilhnitawa, Jehová pulalilh David xlakata natsokgwili tuku lalh kxkilhtamaku chu tuku nala kkilhtamaku nema aku mima akxni xla nalakastakwanan chu tlan namalanki Jehová putum kilhtamaku. ¿Chu la kinkamakgtayayan uma naʼakgatekgsaw Salmo 37:10, 11, 29? Umakgolh versículos lichuwinan la xlamaka kxamakgan Israel chu la nalatamayaw kkilhtamaku nema aku mima kxlikalanka Katiyatni akxni Dios namakgantaxti xtamalaknun (kaʼakxilhti kʼuma revista artículo «Nakintatawilayapi kParaíso» kpárrafo 8).
Wa xlakata, Salmo 61:8 chu amakgapitsi versículos kinkamaʼakgatekgsnikgoyan pi David lu xmalankiputun Jehová akxni xla xlamajku. Chu na kinkamasiyaniyan tuku natlawa David kkilhtamaku nema aku mima, akxni Jehová namaxkipara latamat.