Tuku kgalhkgalhipat, nakgantaxtu

1. ¿Tuku xlakata wanaw pi tuku xkgalhkgalhima Abrahán xlikana xʼama kgantaxtu?

JEHOVÁ malaknunilh xʼamigo, Abrahán, pi xʼama kamaklakaskin xkamanan xlakata xkasikulunatlawalh putum kachikinin xalak katiyatni (Gén. 15:5; 22:18). Xlakata Abrahán lu xkanajlani Dios, liwana xkatsi pi xʼama kgantaxtu xtamalaknun. Pero akxni Abrahán atsinu ni xmakgatsi 100 kata chu xpuskat xkgalhi 90 kata, nina xkgalhikgo kamanan (Gén. 21:​1-7). Pero Biblia wan pi Abrahán lipawa xtakgalhkgalhin chu «xkanajla pi xʼama litaxtu xtlat lhuwa kachikinin» (Rom. 4:18). Chu xtakgalhkgalhin kgantaxtulh: lakachilh xkgawasa, Isaac. ¿Tuku xlakata Abrahán liwana xkatsi pi Jehová xʼama makgantaxti xtamalaknun?

2. ¿Tuku xlakata Abrahán liwana xkanajla pi Jehová xʼama makgantaxti tuku xmalaknuninit?

² Xlakata Abrahán liwana xlakgapasa Jehová, «xkanajla» pi xʼama makgantaxti tuku xmalaknuninit (Rom. 4:21). Xlakata xkanajla, Jehová xaʼakgstitum liʼakxilhli Abrahán (Sant. 2:23). Chuna la wan Romanos 4:​18, Abrahán xkgalhi takanajla chu takgalhkgalhin. Kaʼakxilhwi tuku lichuwinalh Pablo xlakata takgalhkgalhin kRomanos capítulo 5.

3. ¿Tuku lichuwinalh Pablo xlakata takgalhkgalhin?

³ Pablo wa tuku xlakata liwana nakanajlayaw pi «takgalhkgalhin ni katitlawalh pi natamamaxaniyaw» (Rom. 5:5). Na kinkamakgtayayan naʼakgatekgsaw la tlan chuntiya natatliwakglha kintakgalhkgalhinkan. Chuna la naʼakxilhtilhayaw tuku wan Romanos 5:​1-5, kalilakpuwanti la tatliwakglhtilhanit mintakgalhkgalhin chuna la titaxtunit kilhtamaku. Nachuna, tuku naʼakxilhaw namasiyaniyan tuku tlan natlawaya xlakata chuntiya namatliwakglha mintakgalhkgalhin. Pulana kalichuwinaw xastlan takgalhkgalhin nema lichuwinalh Pablo pi ni katitlawalh pi natamamaxaniyaw.

XASTLAN KINTAKGALHKGALHINKAN

4. ¿Tuku lichuwinan Romanos 5:​1, 2?

⁴ (Kalikgalhtawakga Romanos 5:​1, 2). Pablo katsokgnanilh umakgolh tachuwin natalan xalak Roma. Xlakan xkatsinikgonit xlakata Jehová chu Jesús, xlimasiyakgonit takanajla chu kstalaninanin Cristo xlitaxtukgonit. Wa xlakata Dios «xaʼakgstitum [kali’akxilhli] xlakata takanajla» chu kalilaksakli espíritu santo. Lata ama kilhtamaku, xkgalhikgo lu xastlan takgalhkgalhin chu tlan xkanajlakgolh pi xʼama kgantaxtu.

5. ¿Tuku takgalhkgalhin kgalhikgo tiku xatalaksakni?

⁵ Pablo kalitachuwinalh xatalaksakni kstalaninanin Cristo xalak Éfeso xlakata takgalhkgalhin nema Dios xkamaxkinit. Kawanilh pi xʼamakgolh makgamakglhtinankgo tuku xʼamaka kamaxkikan «tiku xasantos» (Efes. 1:18). Chu kawanilh colosenses pi «kʼakgapun» xʼamakgo makgamakglhtinankgo tuku xkgalhkgalhimakgo (Col. 1:​4, 5). Wa xlakata tiku xatalaksakni kgalhkgalhikgo pi nalakastakwanankgo chu putum kilhtamaku nalatamakgo kʼakgapun, niku natamapakgsinankgo Cristo (1 Tes. 4:​13-17; Apoc. 20:6).

6. ¿Tuku wa chatum tala tiku xatalaksakni xwanit xlakata xtakgalhkgalhin?

⁶ Kstalaninanin Cristo tiku xatalaksakni lu xtapalh liʼakxilhkgo xtakgalhkgalhinkan. Akgtum liʼakxilhtit, kkata 1991 tala Frederick Franz, wa: «Kintakgalhkgalhinkan nakgantaxtu, chu tiku makgtapakgsiyaw kʼgrupo xla 144,000 tiku ni xalhuwa borregos namakgamakglhtinanaw asta tuku ni xlakpuwanitaw». ¿La xmakgkatsi tala Franz maski akglhuwata kata kskujnaninit Jehová? Xla wa: «Ni klakpuwanaw pi kintakgalhkgalhinkan nialh lhuwa xtapalh. Wata [...] tlakg xtapalh kliʼakxilhaw chuna la titaxtutilhanit kilhtamaku. Maski akgtum millón kata nakkgalhkgalhiyaw, ni kaj paxkat katiwa kinkilhtamakujkan. La uku tlakg xtapalh kliʼakxilha kintakgalhkgalhinkan nixawa xapulana».

7, 8. ¿Tuku takgalhkgalhin kgalhikgo lhuwa xlakskujnin Dios? (Romanos 8:​20, 21).

⁷ Lhuwa tiku skujnanikgo Jehová kgalhikgo atanu takgalhkgalhin. Watiya takgalhkgalhin nema xkgalhi Abrahán: nalatamakgo kKatiyatni putum kilhtamaku akxni namapakgsinan xTamapakgsin Dios (Heb. 11:​8-10, 13). Pablo na lichuwinalh uma xatlan takgalhkgalhin (kalikgalhtawakga Romanos 8:​20, 21). Akxni wix katsi tuku masiya Biblia xlakata tuku nala kkilhtamaku nema aku mima, ¿tuku tlakg lakgati? ¿La limakgkatsi akxni katsini pi nialh katiʼanalh talakgalhin? ¿Paxuwa akxni katsi pi tiku nikgonita nalakastakwanankgo chu nalatamakgo kʼakgtum Paraíso? Xlakata takgalhkgalhin nema Dios masta, wix namakgamakglhtinana lhuwa tasikulunalin.    

⁸ Putum akinin kgalhiyaw akgtum takgalhkgalhin nema lu kinkamakgapaxuwayan, nalatamayaw putum kilhtamaku max kʼakgapun o kKatiyatni. Chu chali chali tlan tlakg nalipawanaw pi kintakgalhkgalhinkan xlikana nakgantaxtu. ¿La tlan chuna natlawayaw? Kaʼakxilhwi tuku tsokgli Pablo. Xtachuwin kinkamakgtayayan liwana nakatsiyaw pi kintakgalhkgalhinkan ni kintikamamaxanin.   

LA TLAKG NALIPAWANAW PI NAKGANTAXTU KINTAKGALHKGALHINKAN

9, 10. Xtachuna la Pablo, ¿tuku liwana katsiyaw pi natitaxtuyaw? (Romanos 5:3; na kaʼakxilhti dibujos).

⁹ (Kalikgalhtawakga Romanos 5:3). Pablo wa tuku max kaks nakinkamalakawaniyan: akxni titaxtuyaw takatsanajwat tatliwakglha kintakanajlakan. Putum kstalaninanin Cristo katsiyaw pi natitaxtuyaw tuku tuwa. Kalilakpuwaw tuku kawanilh Pablo kstalaninanin Cristo xalak Tesalónica: «Akxni anta xakkatawilachan, xakkawaniyana pi xakamaw titaxtuyaw umakgolh takatsanajwat, chu wa uma tuku ktitaxtumaw» (1 Tes. 3:4). Chu tiku xalak Corinto, kawanilh: «Klakaskinaw kakatsitit, natalan, xpalakata taʼakglhuwit nema kkgalhiw [...] chu ni liwana xakkatsiyaw komo xakamaw lakgtaxtuyaw» (2 Cor. 1:8; 11:​23-27).

¹⁰ La uku, katsiyaw pi na natitaxtuyaw takatsanajwat (2 Tim. 3:12). ¿Tuku tuwa titaxtunita wix lata kanajlani Jesús chu tsuku stalaniya? Max miʼamigos chu tiku xalak mifamilia likgalhkgamanankgonitan, o asta nitlan likatsinikgonitan. ¿Kgalhinita taʼakglhuwit kmintaskujut xlakata ni akgskgawinana o ni kgalhanana? (Heb. 13:18). ¿Putsastalanikgonitan mapakgsinanin xlakata kalitachuwinana amakgapitsin mintakgalhkgalhin? Maski lhuwa tuku tuwa titaxtuyaw, Pablo kinkawaniyan pi kapaxuwaw. ¿Tuku xlakata?

11. ¿Tuku xlakata talakaskin natayaniyaw?

¹¹ Paxuwayaw akxni titaxtuyaw tuku tuwa xlakata uma kinkamakgtayayan nakgalhiyaw akgtum lu xlakaskinka tayat. Romanos 5:3 wan: «Takatsanajwat kinkamakgtayayan natayaniyaw». Xlakata putum kstalaninanin Cristo titaxtuyaw tuku tuwa, talakaskin pi putum natayaniyaw. Komo natayaniyaw, namakgamakglhtinanaw tasikulunalin nema kgalhkgalhimaw. Akinin ni litaxtuputunaw chuna la tiku kalichuwinalh Jesús akxni lichuwinalh talhtsi nema tamakgoyacha kkachiwixni. Xlakan xatapaxuwan makgamakglhtinankgo «tachuwin», pero akxni kalakgchin «taʼakglhuwit o taputsastalanit» akgchakgxkgo (Mat. 13:​5, 6, 20, 21). Xlikana pi niti lakgati naputsastalanikan o natitaxtu tuku tuwa, pero lu litamakgtayayaw akxni tayaniyaw. Kalichuwinaw tuku xlakata.

12. ¿Tuku lu tlan kitaxtu akxni tayaniyaw?

¹² Discípulo Santiago lichuwinalh tuku tlan kitaxtu akxni tayaniyaw. Xla tsokgwililh: «Xatakgatsin nawanatit chu putum tlan natlawayatit, chu nitu nakatsankganiyan» (Sant. 1:​2-4). Wa xlakata akxni tayaniyaw, kinkamakgtayayan tlakg nakgalhkgalhinanaw, tlakg tliwakga nakgalhiyaw kintakanajlakan chu tlakg nalipawanaw Dios. Pero wi atanu tuku lu tlan kitaxtu.

13, 14. ¿Tuku atanu tlan kitaxtu akxni tayaniyaw, chu la litamakgtayayaw akxni katsiyaw pi makgapaxuwamaw Jehová? (Romanos 5:4).

¹³ (Kalikgalhtawakga Romanos 5:4). Pablo lichuwinalh pi «akxni tayaniyaw tlawa pi Dios tlan nakinkaʼakxilhan». Uma ni wamputun pi Jehová paxuwa akxni titaxtuyaw tuku tuwa, wata paxuwa xlakata tayaniyaw. Lu tlan limakgkatsiyaw pi makgapaxuwayaw Jehová xlakata tayaniyaw chu ni makgatsankgananiyaw (Sal. 5:12).

¹⁴ Kalilakpuwaw Abrahán. Dios tlan liʼakxilhli xlakata tayanilh tuku tuwa. Jehová xʼamigo limaxtulh chu xaʼakgstitum liʼakxilhli (Gén. 15:6; Rom. 4:​13, 22). Nachuna nakitaxtu kimpalakatakan. Tuku natlawa pi Dios xaʼakgstitum nakinkaliʼakxilhan ni wa komo lhuwa tuku tlawayaw akxni skujnaniyaw chu nipara tuku lakgayaw kcongregación, wata wa akxilha komo ni makgatsankgananiyaw chu tayaniyaw. Chu putum akinin tlan chuna natlawayaw maski tanu tanu kinkatakan, tuku titaxtumaw o tuku tlan tlawayaw. ¿Titaxtupat tuku tuwa la uku? Kakatsi pi komo ni namakgatsankgananiya Jehová, xla xaʼakgstitum naliʼakxilhan. Akxni katsiyaw pi makgapaxuwamaw Jehová, kinkamakgtayayan tlakg liwana nakanajlayaw pi xlikana nakgantaxtu tuku kgalhkgalhimaw.

KANAJLAYAW PI XLIKANA NAKGANTAXTU KINTAKGALHKGALHINKAN

15. ¿Tuku chuntiya lichuwinalh Pablo, chu tuku max nalilakpuwanaw?

¹⁵ Chuna la akxilhnitaw, Pablo lichuwinalh pi Dios xaʼakgstitum nakinkaliʼakxilhan komo natayaniyaw. La uku kaʼakxilhwi tuku chuntiya lichuwinalh: «Dios tlan nakinkaʼakxilhan, chu uma kinkamakgtayayan nakgalhkgalhinanaw, chu takgalhkgalhin ni katitlawalh pi natamamaxaniyaw» (Rom. 5:​4, 5). Anta kRomanos 5:​2, Pablo xlichuwinanita pi kstalaninanin Cristo xalak Roma xkgalhikgoya takgalhkgalhin, “pi Dios xʼama kamaxki kakni”. Wa xlakata max nalilakpuwanaw uma takgalhskinin: «Komo xkgalhikgoya takgalhkgalhin, ¿tuku xlakata Pablo kalitachuwinampara takgalhkgalhin?».

16. Kalichuwinanti tuku makgtaya chatum lataman liwana nakanajla pi takgalhkgalhin nema masta Biblia xaxlikana. (Na kaʼakxilhti dibujos).

¹⁶ Tlan naʼakgatekgsaw tuku wa Pablo komo nalilakpuwanaw pi chuna la titaxtu kilhtamaku tlan tlakg nakanajlayaw pi kintakgalhkgalhinkan xlikana nakgantaxtu. Akgtum liʼakxilhtit, kalilakpuwanti akxni xapulana kgaxpatti pi tlan nalatapaya putum kilhtamaku kʼakgtum paraíso kKatiyatni. Max lakpuwanti pi lu tlan xtakgaxmata pero max ni xlikana xwanit. Pero akxni tsuku lakgapasa Jehová chu tuku malaknu Biblia, liwana kanajla pi uma takgalhkgalhin nakgantaxtu.     

17. ¿La tatliwakglhtilhanit mintakanajla lata tamunu?

¹⁷ Lata tamunu, tlakg lipawanita pi mintakgalhkgalhin nakgantaxtu, xlakata tlakg katsininita tuku masiya Biblia chu tlakg tatliwakglhnit mintakanajla (Heb. 5:13–6:1). Xlikana pi max titaxtunita tuku wan Romanos 5:​2-4, kgalhinita takatsanajwat chu akxilhnita pi Jehová xaʼakgstitum liʼakxilhan. Xlakata liwana katsiya pi makgapaxuwaya Jehová, tlakg kanajlaya pi namakgantaxti xtamalaknun. La uku tlakg lipawana pi xlikana nakgantaxtu mintakgalhkgalhin. Tlakg xaxlikana liʼakxilha chu xtapalh litaxtu. Makgtayayan xliputum tuku tlawaya kmilatamat. La uku tlakg tlan kalikatsiniya mifamilia, tlan tuku laksaka chu tlakg tlan maklakaskina minkilhtamaku.

18. ¿Tuku xlakata lipawanaw pi kintakgalhkgalhinkan nakgantaxtu?

¹⁸ Akxni Pablo xlichuwinanita pi akxni Dios xaʼakgstitum kinkaliʼakxilhan tlawa pi nakgalhiyaw takgalhkgalhin, lichuwinampa tuku lu xlakaskinka: tlan nalipawanaw pi uma takgalhkgalhin nakgantaxtu. ¿Tuku xlakata? Xlakata tuku Jehová malakpuwanilh Pablo xkatsokgnanilh kstalaninanin Cristo: «Takgalhkgalhin ni katitlawalh pi natamamaxaniyaw; xlakata Dios limaklakaskin xʼespíritu santo nema xla kinkamaxkiyan xlakata nalimasiya pi kinkapaxkiyan» (Rom. 5:5). Wa xlakata, liwana kakatsi pi mintakgalhkgalhin xlikana nakgantaxtu.

19. ¿Tuku liwana katsiyaw?

¹⁹ Tlan nawan komo nalilakapastakaw xliʼakxilhtit Abrahán. Jehová wi tuku malaknunilh, xaʼakgstitum liʼakxilhli chu xʼamigo limaxtulh. Tuku xkgalhkgalhima Abrahán kgantaxtulh. Biblia wan: «Abrahán makglhtinalh uma tamalaknun akxni lu xkgalhkgalhinanita» (Heb. 6:15; 11:​9, 18; Rom. 4:​20-22). Xtachuna la Abrahán, liwana katsiyaw pi komo ni namakgatsankgananiyaw Jehová, kintakgalhkgalhinkan ni kintikamamaxanin, wata namakgamakglhtinanaw lhuwa tasikulunalin. Takgalhkgalhin nema kgalhiyaw xaxlikana, chu uma lu kinkamakgapaxuwayan (Rom. 12:12). Pablo tsokgwililh: «Dios tiku kinkamakgtayayan nakgalhkgalhinanaw, kalimatsamalh minakujkan tapaxuwan chu takaksni, xlakata lipawantit. Chu xlakata xlitliwakga espíritu santo kalikgalhkgalhinantit xliputum minakujkan» (Rom. 15:13).