¿Chuntiya kilimatlawanit kimputlaw?

KALILAKPUWANTI chatum lataman tiku lina kata. Lu lakgati matlawani xputlaw o xmotocicleta xlakata tlan an niku xla amputun chu ni talakaskin wi tiku namakgtaya. Pero xtalilakgapasni chu xʼamigos lu likgaputsakgo chu lakpuwankgo pi xla nialh xlimatlawanit xputlaw. Pero xla ni akgatekgsa tuku xlakata lu lilakgaputsakgo.

¿Wix nachuna titaxtupat? Komo chuna, ¿tuku namakgtayayan nalaksaka komo chuntiya milimatlawanit mimputlaw o nialh milimatlawanit?

Kmakgapitsi países anankgo limapakgsin niku kawanikan tiku linkgoya kata pi kalakgankgolh chatum makuchina xlakata nakawani o nakamaxki maktum kapsnat niku nawan pi tlan chuntiya namatlawanikgo putlaw. Kstalaninanin Cristo tiku lamakgolh kʼumakgolh países, kgalhakgaxmatkgo tuku wan limapakgsin (Rom. 13:1). Pero maski niku wix lapat ni skinkan pi chuna katlawa, wi tuku militlawat xlakata miʼakstu naʼakxilha komo tlanku namatlawaniya mimputlaw.

KAʼAKXILHTI KOMO TLANKU NAMATLAWANIYA MIMPUTLAW

Instituto Nacional sobre el Envejecimiento (NIA, siglas kxaʼinglés), xalak Estados Unidos, wan pi chatum lataman xlilakpuwanat uma:

¿Tuwa kmakgkatsi naklikgalhtawakga señales nema wilakgo kcarretera o tuwa kmakgkatsi naklakawanan akxni tsiswanita?
¿Tuwa kmakgkatsi naktalakgaspita xlakata nakakxilha tuku tasiya kʼespejos o kuentajnaktlawa putum tuku lama nema ni tasiya kkiʼespejos?
¿Tuwa kmakgkatsi lakapala nakmatsuwi kintantun akxni klaktayaninit xaʼacelerador chu talakaskin naklaktayani xafreno?
¿Lu lakatsuku kmatlawani kimputlaw chu kkamalakgachokgo amakgapitsi putlaw?
¿Makglhuwata atsinu ni kchokarlinit kimputlaw, o wi niku kkimalakawakanit?
¿Kimachokgonit policía xlakata la kmatlawani kimputlaw?
¿Klhtatatawilanit akxni kmatlawaninama?
¿Kwama likuchun nema tlawa pi tuwa nakmakgkatsi nakmatlawani kimputlaw?
¿Lilakgaputsakgo tiku xalak kifamilia chu kiʼamigos pi chuntiya nakmatlawani kimputlaw?

Komo akxni xlilakpuwampat umakgolh takgalhskinin, makgtum o makgtiy kgalhtinanti pi chuna, max natalakaskin wi tuku nalakgpaliya. Max tlakg tlan nawan pi nialh lu lhuwa kilhtamaku namatlawaniya putlaw, liwaka komo katsisnita. Nachuna, ni xmakgasni kaʼakxilhti komo tlanku liwana matlawaninana. Max tlan xkgalhskinti chatum miʼamigo o chatum tiku xalak mifamilia tuku xla lakpuwan, o asta tlan xpit niku namasiyanikana la tlakg tlan namatlawaniya mimputlaw. Pero komo akxni xlilakpuwampat umakgolh takgalhskinin, makglhuwa kgalhtinanti pi chuna, max tlakg tlan nawan nialh namatlawaniya mimputlaw.a

TASTAKYAW XALAK BIBLIA NEMA NAKINKAMAKGTAYAYAN

Max akinin ni akxilhaw pi nialh liwana matlawaniyaw kimputlawkan chu pi talakaskin pi nialh namatlawaniyaw. Max tuwa namakgkatsiyaw nalilakpuwanaw uma. Pero kaʼakxilhwi pulaktiy tastakyaw xalak Biblia nema nakinkamakgtayayan naʼakxilhaw tuku tlan natlawayaw chu tlan tuku nalaksakaw.

Kalitayaw pi wi tuku nialhla tlawayaw (Prov. 11:2). Kimputumkan, akxni linawa kata, nialh liwana akxilhaw, kgaxmataw chu kimaknikan taxlajwani. Wa xlakata lhuwa latamanin tiku linkgoya kata nialh tlawakgo lhuwa ejercicio o nialh kgamanankgo xlakata tlakg lakapala kaʼakgspula tuku nitlan. Chu nachuna kitaxtu akxni matlawaniyaw putlaw: max namin kilhtamaku naʼakxilhaw pi wi tuku nialhla tlawayaw chu nalaksakaw nialh namatlawaniyaw kimputlawkan xlakata ni nakinkaʼakgspulayan tuku nitlan (Prov. 22:3). Chu komo wi tiku nakinkawaniyan pi lilakgaputsa chuna la matlawaniyaw kimputlawkan, kataktujuw chu kuenta katlawaw tuku nakinkawaniyan (katamalakxtupi tuku wan 2 Samuel 21:15-17).

Ni litawilaputunaw kuenta (Deut. 22:8). Akxni nitlan matlawaniyaw kimputlawkan max lu nitlan tuku nakalitlawaniyaw amakgapitsin. Chatum lataman tiku akxilhnita pi nialhla liwana matlawani xputlaw pero chuntiya matlawanima, kalipekua wilima xlatamat chu xlatamatkan amakgapitsin. Chu komo wi tiku natachokarli o natitiya, max namakgni chu nalitawila kuenta.

Komo natalakaskin pi nialh namatlawaniya mimputlaw, ni kalakpuwanti pi nialhtu litaxtuya. Jehová lu paxkiyan xlakata taktujuya, katsiya tuku nialhla tlawaya chu kalilakgaputsaya amakgapitsin. Xla malaknu pi namakgtayayan chu nakuentajtlawayan (Is. 46:4). Nikxni katimakgxtakgni. Tlan naskiniya pi kamaxkin liskgalala chu kamakgtayan nalilakpuwana tastakyaw nema namakgtayayan tlan tuku nalaksaka.

¿Tuku tlan natlawakgo amakgapitsin?

Tiku kalakgchan natachuwinankgo tiku lina kata wa tiku xalak xfamilia. Pero max namin kilhtamaku, xʼamigos tiku lina kata, wa tiku nakgaxmatkgo pi lichuwinankan pi nialh tlan la matlawani xputlaw. Komo wix kgaxpatti pi chuna lichuwinamaka, lu kuenta katlawa tuku wankgo amakgapitsin. Max natalakaskin akxtum natapina tiku lina kata akxni namatlawani xputlaw, chu komo naʼakxilha pi talakaskin, katachuwinanti. Pero akxni natachuwinana, kalilakpuwanti la xlakaskinti wix pi xlikatsinika komo chuna xtitaxtu. Lakatitum katachuwinanti, pero tlan kalikatsini. Ni wa kalitachuwinanti pi lina kata, wata kalitachuwinanti la matlawani xputlaw. Ni kawani: «Nialh tlan la matlawaniya mimputlaw», wata max tlakg tlan pi xwani: «Klilakgaputsayan pi naʼakgspulayan tuku nitlan». Kamalakapastaka tastakyaw xalak Biblia nema lichuwinaw kʼuma artículo chu kawani pi wix katsiya pi xla na kgalhakgaxmatputun umakgolh tastakyaw.

Kimputumkan kililakpuwatkan la makgkatsikgo tiku linkgoya kata chu talakaskin nialh namatlawanikgo xputlawkan. Xlakan max lakpuwankgo pi nialhla tuku xʼakstukan tlawakgo. ¿La tlan xkamakgtayaw? Ankgalhin kuenta katlawaw tuku maklakaskinkgo chu kakamakgtayaw (Prov. 17:17). Ni kakgalhkgalhiw asta akxni nakinkawanikgoyan pi wi niku kakaliw. Max tlan xtalaknuw xlakata xtlawaw akgtum programa xlakata ankgalhin wi tiku nakalin niku xliʼanatkan, chuna la ktamakxtumit, akxni ankgo lichuwinankgo Dios, akxni amputunkgo tamawanankgo chu akxni xliʼanatkan kpumakuchin. Liwana kakaniw pi xatapaxuwan kamakgtayayaw chu pi lu lakgatiyaw akxni akxtum katatawilayaw (Rom. 1:11, 12).

a Komo tlakg katsiputuna, kaʼakxilhti artículo «¿Corre usted un gran riesgo de sufrir accidentes de tránsito?», nema min krevista ¡Despertad! 22 xla agosto kata 2002.