18 Na mi lukim 7-pela naispela patpela bulmakau i lusim Wara Nail na ol i kam antap. Na ol i wok long kaikai gras i stap arere long Wara Nail.+ 19 Na bihain narapela 7-pela bulmakau i kam antap. Skin bilong ol i slek na ol i bun nating na ol i luk nogut stret. Mi no bin lukim ol kain rabis bulmakau olsem long wanpela hap bilong Isip. 20 Na ol dispela bun nating bulmakau, ol i kaikai ol dispela 7-pela patpela bulmakau. 21 Ol i kaikai pinis tasol i luk olsem ol i no kaikai ol dispela patpela bulmakau, long wanem, ol i bun nating yet na ol i luk nogut wankain olsem bipo. Mi lukim dispela na mi kirap long slip.