3 Na ol i bekim tok olsem: “Sapos yupela i laik salim Bokis Kontrak bilong Jehova, em God bilong ol Israel, i go bek long ples bilong en, orait yupela i no ken salim i go bek nating, nogat. Yupela i mas salim wantaim ofa bilong mekim i dai asua.+ Sapos yupela i mekim olsem, bai yupela i kamap orait, na bai yupela i save long as na em i mekim save long yupela.” 4 Orait ol manmeri i tok: “Bai mipela salim wanem kain ofa bilong mekim i dai asua?” Na ol i tok: “Kisim gol na wokim 5-pela imis bilong ol buk nogut* na wokim tu 5-pela imis bilong ol rat na salim i go. Namba bilong ol dispela buk nogut na rat i mas stret long namba bilong ol king bilong ol Filistia.+ Long wanem, wankain sik i bin kamap long yupela olgeta i kamap tu long ol king bilong yupela.