PAS I GO LONG OL KOLOSI

1 Mi Pol, na long laik bilong God mi kamap wanpela aposel bilong Krais Jisas. Na brata bilong yumi Timoti+ i stap wantaim mi. 2 Dispela pas i go long yupela ol lain holi i stap long Kolosi, yupela ol brata bilong bihainim tok na i pas wantaim Krais:

Bikpela pasin helpim na bel isi bilong God, Papa bilong yumi, i ken i stap wantaim yupela.

3 Taim mipela i beten long yupela, oltaim mipela i save tok tenkyu long God, Papa bilong Bikpela bilong yumi, Jisas Krais. 4 Mipela i harim pinis tok long bilip bilong yupela long Krais Jisas na long pasin bilong yupela long laikim tru ol lain holi. 5 As bilong en, em samting God i makim bilong yupela long heven, na yupela i bilip na wet long en.+ Bipo ol man i bin autim tok i tru bilong gutnius, na long dispela rot yupela i bin harim tok long dispela samting yupela i wetim. 6 Em dispela gutnius i kam pinis long yupela, na i wok long karim kaikai na kamap bikpela long olgeta hap bilong graun.+ Em i karim kaikai namel long yupela tu, stat long dispela taim yupela i bin harim na kisim stretpela save long bikpela pasin helpim bilong God i wanem samting tru. 7 Epafras+ i bin skulim yupela long dispela samting. Em i gutpela brata yumi laikim tumas, na em i kisim ples bilong mipela na mekim wok olsem wanpela wokboi bilong Krais. 8 Na tu, em i bin tokim mipela long pasin laikim yupela i kamapim long rot bilong spirit bilong God.

9 Olsem na kirap long taim mipela i bin harim tok long dispela samting, oltaim mipela i save beten askim God long helpim yupela.+ Mipela i beten olsem stretpela save long ol laik bilong em i ken pulap long yupela+ na yupela i ken kisim olgeta savetingting na holi spirit i ken helpim yupela long kisimgut ol tok,+ 10 na bai yupela inap wokabaut olsem ol manmeri tru bilong Jehova* na olgeta samting yupela i mekim bai amamasim em. Na long seim taim bai yupela i karim kaikai yet long rot bilong olgeta gutpela wok, na stretpela save bilong yupela long God i ken kamap bikpela moa;+ 11 na bikpela pawa bilong God i ken givim strong long yupela+ inap long yupela i ken sanap strong na i no les kwik, na yupela i ken mekim wantaim amamas, 12 na tenkyu long Papa husat i mekim na yupela inap winim mak bilong insait long dispela samting em i makim bilong ol lain holi+ i stap long lait.

13 Yumi bin stap aninit long strong bilong tudak, na em i bin kisim bek yumi+ na putim yumi i go insait long kingdom bilong dispela Pikinini em i laikim tumas. 14 Long rot bilong pe bilong baim bek man, Pikinini bilong em i mekim yumi i kamap fri, dispela i makim olsem ol sin bilong yumi i tekewe.+ 15 Em i piksa tru bilong dispela God ol man i no inap lukim,+ na em i fesbon bilong olgeta samting God i bin wokim;+ 16 long wanem, long rot bilong dispela man, God i wokim olgeta arapela samting long heven na long graun. Em ol samting man inap lukim na ol samting man i no inap lukim,+ maski em ol wok king, o wok bos, o gavman, o namba. Olgeta arapela samting i kamap long rot bilong em+ na ol i bilong em. 17 Na tu, em i kamap paslain long olgeta arapela samting,+ na long rot bilong em, God i bin mekim olgeta arapela samting i kamap. 18 Na em i het bilong bodi, em kongrigesen.+ Em i kirap bilong olgeta samting, em i dispela fesbon husat i namba 1 man long kirap bek long dai,+ olsem bai em i ken kamap man i stap fes long olgeta samting; 19 long wanem, God i laik bai olgeta samting i mas pulap long dispela man,+ 20 na long rot bilong em, God i mekim olgeta arapela samting i kamap wanbel wantaim em yet,+ maski em ol samting long graun o ol samting long heven. Dispela pasin wanbel i kamap long rot bilong blut+ em dispela man i bin kapsaitim long diwai pos.*

21 Tru tumas, bipo yupela i stap birua bilong God na yupela i stap longwe long em, long wanem, tingting bilong yupela i stap long ol wok nogut, 22 nau em i kamapim pasin wanbel long rot bilong bodi bilong dispela man husat i givim em yet long i dai. Em i mekim olsem, na long ai bilong em yupela i ken i stap holi na i no gat rong na i no gat wanpela inap sutim tok long yupela+— 23 tasol yupela i mas holimpas bilip+ we i pas strong antap long dispela faundesen+ na sanap strong.+ Na yupela i no ken larim wanpela samting i pulim yupela na yupela i lusim pasin bilong bilip na wet long dispela samting em gutnius yupela i bin harim i as bilong en. Ol i bin autim dispela gutnius long olgeta hap bilong graun aninit long skai.+ Mi Pol, mi bin kamap wokman bilong autim dispela gutnius.+

24 Nau mi amamas long karim pen bilong helpim yupela,+ tasol nau yet mi no karim pen na hevi bilong Krais long bodi bilong mi inap long mak.+ Pen na hevi mi karim em bilong helpim bodi bilong Krais, em kongrigesen.+ 25 Mi kamap wokman bilong dispela kongrigesen, dispela i stret long wok+ God i givim long mi bilong helpim yupela. Em wok bilong mekim gut tru wok bilong autim tok bilong God 26 long dispela tok hait holi+ i bin i stap hait long olgeta haptaim bipo*+ na i bin i stap hait long olgeta lain pipol long bipo. Tasol nau em i kamap ples klia long ol lain holi bilong em,+ 27 em dispela lain God i bin amamas long kamapim ol nambawan gutpela samting bilong dispela tok hait holi long ol.+ Na em i mekim olsem namel long olgeta lain man. Dispela tok hait holi em olsem, Krais i pas wantaim yupela, dispela i makim olsem yupela i bilip na wet long kisim glori wantaim em.+ 28 Em dispela man mipela i autim tok long en. Mipela i givim strongpela tok long olgeta man, na mipela i bihainim savetingting na skulim ol, bai mipela inap bringim ol i go long ai bilong God olsem ol strongpela disaipel bilong Krais.+ 29 Olsem na mi wok hat, mi taitim bun na mekim wok i stret wantaim strong em i givim mi, em dispela strong i wok insait long mi.+

2 Mi laik bai yupela i save long olsem wanem mi wok strong tru long helpim yupela na ol lain i stap long Laodisia+ na olgeta husat i no bin lukim mi. 2 Mi mekim olsem bai bel bilong ol i ken stap isi+ na ol i ken pas gut wantaim long rot bilong pasin laikim,+ na ol i ken kisim ol gutpela samting, olsem ol i ken bilip olsem samting ol i kliagut long en em i tru olgeta. Na ol i ken kisim stretpela save long tok hait holi bilong God, em Krais.+ 3 Olgeta nambawan gutpela samting bilong savetingting na save, ol i hait gut tru insait long em.+ 4 Mi tok olsem, long wanem, mi no laik bai wanpela man i giamanim yupela long ol tok gris. 5 Mi no stap wantaim yupela, tasol long tingting i olsem mi stap wantaim yupela. Mi amamas long lukim ol wok bilong yupela i ron gut+ na strongpela bilip bilong yupela long Krais.+

6 Yupela i kisim pinis Bikpela Krais Jisas, olsem na yupela i mas pas wantaim em na wokabaut yet wantaim em. 7 Yupela i mas holimpas em na wok yet long kamap strong long rot bilong em+ na sanap strong long bilip+ olsem yupela i lain pinis long en. Na tenkyu bilong yupela long God i ken pulap na kapsait.+

8 Yupela lukaut, nogut wanpela i trapim yupela* long rot bilong savetingting bilong ol man na tok giaman.+ Kastam bilong ol man i as bilong ol dispela samting na i stret wantaim ol bikpela tingting bilong graun, tasol i no stret wantaim ol tok Krais i skulim ol man long en; 9 long wanem, olgeta pasin bilong God i pulap tru long em.+ 10 Olsem na long rot bilong em yupela i no sot long wanpela samting. Em i het bilong olgeta gavman na olgeta man i gat namba.+ 11 Yupela i poroman wantaim em na yupela tu i kamap olsem lain i bin katim skin,* tasol dispela i no kamap long rot bilong ol man, nogat, em i kamap long rot bilong rausim pasin bilong sin long bodi.+ Yupela i bin katim skin long dispela pasin em ol wokman bilong Krais i save bihainim.+ 12 God i planim yupela wantaim Krais long baptais bilong em.+ Yupela i poroman wantaim em, olsem na God i kirapim bek yupela wantaim em,+ long wanem, yupela i bilip long strongpela wok bilong God husat i bin kirapim bek em long dai.+

13 Na tu, yupela i bin stap olsem ol daiman, long wanem, yupela i bin mekim ol rong na yupela i no bin katim skin. Tasol God i mekim yupela i kisim laip na i mekim yupela i pas wantaim em.+ Long gutpela pasin em i lusim olgeta rong bilong yumi+ 14 na em i bin rausim dispela Lo+ i gat ol tok long en+ na i stap olsem birua bilong yumi.+ Na em i tekewe dispela lo long yumi na nilim long diwai pos.*+ 15 Em i rausim olgeta samting long ol gavman na ol hetman, na em i sanapim ol na mekim ol i mats i go long ai bilong ol man olsem ol lain em i bin daunim long rot bilong en.*+

16 Olsem na no ken larim wanpela man i tokim yupela long wanem kaikai o dring yupela i mas kisim,+ o long yupela i mas tingim wanpela bikpela bung o nupela mun+ o de sabat.+ 17 Ol dispela samting i olsem sedo tasol bilong ol samting bai kamap bihain,+ tasol Krais em i samting tru.+ 18 No ken larim wanpela man husat i amamas long giaman long bihainim pasin daun na i save lotuim ol ensel i mekim na yupela i lus long kisim prais.+ Ol kain man olsem ol i strong long samting ol i bin lukim. Ol i save bihainim tingting bilong graun na dispela i mekim ol i hambak nating. 19 Ol i no holimpas het tru bilong yumi.+ Long dispela het, God i mekim bodi olgeta i gro. Long rot bilong ol join na ol rop samting, ol hap bilong bodi i kisim ol samting ol i gat wok long en na i pas gut wantaim.+

20 Olsem na sapos yupela i stap olsem daiman wantaim Krais long ol bikpela tingting bilong dispela graun,+ orait bilong wanem yupela i wokabaut yet olsem yupela i bilong dispela graun na yupela i daun long ol lo olsem:+ 21 “No ken holim, no ken teistim, no ken tatsim”? 22 Em ol samting ol man bai mekim wok long en inap long ol dispela samting i pinis olgeta. Ol man tasol i kamapim ol dispela lo.+ 23 Tru, taim man i bihainim ol dispela lo na mekim wanpela kain pasin bilong lotu em yet i makim na giaman long bihainim pasin daun na mekim samting i nogutim bodi, i luk olsem em i bihainim savetingting.+ Tasol ol dispela lo i no inap helpim man liklik long daunim laik bilong bodi.

3 Tasol sapos God i bin litimapim yupela wantaim Krais,+ orait wok yet long kisim ol samting bilong ples antap, em ples we Krais i sindaun long rait han bilong God.+ 2 Oltaim tingting bilong yupela i mas stap long ol samting bilong ples antap,+ na i no long ol samting i stap long graun.+ 3 Long wanem, yupela i bin i dai, na laip bilong yupela i stap hait wantaim Krais olsem laik bilong God i makim. 4 Krais em i laip bilong yumi,+ na taim em i kamap ples klia, orait yupela tu bai kamap ples klia wantaim em long glori.+

5 Olsem na yupela i mas kilim i dai ol laik i stap long ol hap bilong bodi bilong yupela,+ olsem pasin pamuk,* pasin i no klin, bel i kirap tru long slip wantaim narapela,+ ol laik nogut, na pasin gridi, em wankain olsem pasin bilong lotuim imis. 6 Ol dispela samting i as na belhat bilong God bai kam. 7 Bipo yupela tu i bin mekim* ol kain pasin olsem.+ 8 Tasol nau yupela i mas lusim olgeta dispela kain pasin: pasin bilong belhat, kros, pasin nogut,+ tok nogut,+ na ol tok doti+ i no ken kamap long maus bilong yupela. 9 Yupela i no ken giamanim narapela narapela.+ Rausim olpela pasin+ wantaim ol samting yupela i bin mekim bipo, 10 na yupela i mas werim nupela pasin olsem yupela i werim klos.+ Stretpela save i mekim na dispela pasin i wok long kamap nupela na i stret long dispela Man husat i bin kamapim.+ 11 Olsem na i no gat man Grik o man Juda, o pasin bilong katim skin o pasin bilong i no katim skin, o man bilong narapela ples, o man Sitia,* o wokboi, o friman; tasol Krais em i olgeta samting na em i stap insait long olgeta.+

12 Yupela ol lain God i bin makim,+ yupela i holi na God i laikim yupela tumas, olsem na yupela i mas kisim* bikpela pasin sori,+ pasin helpim, pasin daun,+ pasin isi,+ na pasin bilong i no les kwik.+ 13 Yupela i mas wok yet long karim hevi narapela i putim long yupela na amamas long fogivim narapela,+ na mekim olsem maski sapos i gat as na wanpela i gat tok long narapela.+ Jehova* i amamas long fogivim yupela, olsem na yupela tu i mas mekim wankain pasin.+ 14 Na i no ol dispela samting tasol. Yupela i mas werim pasin laikim olsem yupela i werim klos,+ long wanem, pasin laikim em i nambawan gutpela rot bilong mekim ol man i kamap wanbel.+

15 Na tu, larim bel isi bilong Krais i bosim bel bilong yupela,+ long wanem, God i bin singautim yupela na bai yupela i ken kamap wanpela bodi na stap bel isi. Na yupela i mas kamapim tenkyu bilong yupela. 16 Yupela i mas larim tok bilong Krais i pulap tru insait long yupela na bai yupela i gat olgeta savetingting. Yupela i mas wok yet long skulim na strongim* narapela narapela long rot bilong ol song,+ na ol singsing i litimapim nem bilong God, na ol singsing lotu na ol singsing bilong tok tenkyu, na long bel yupela i mas singsing long Jehova.*+ 17 Na long olgeta toktok o wok yupela i mekim, mekim olgeta samting long nem bilong Bikpela Jisas, na long rot bilong em tok tenkyu long God Papa.+

18 Yupela ol maritmeri, yupela i mas daun long man bilong yupela,+ dispela pasin i stret long ai bilong Bikpela. 19 Yupela ol maritman, yupela i mas laikim yet meri bilong yupela,+ na no ken belhat nogut tru* long ol.+ 20 Yupela ol pikinini, yupela i mas bihainim tok bilong papamama bilong yupela long olgeta samting,+ long wanem, Bikpela i save laikim dispela kain pasin. 21 Yupela ol papa, yupela i no ken sikirapim bel bilong ol pikinini bilong yupela,+ nogut bel bilong ol i bagarap. 22 Yupela ol wokboi, yupela i mas bihainim olgeta tok bilong ol bosman bilong yupela long graun.+ No ken mekim tasol long taim ol i lukim yupela, olsem ol man i laik amamasim ol man tasol i save mekim, nogat. Yupela i mas givim bel tru na mekim wantaim pasin bilong pret long Jehova.* 23 Olgeta samting yupela i mekim, yupela i mas mekim olsem yupela i mekim long Jehova*+ na i no long ol man, na givim bel olgeta na strong olgeta long mekim. 24 Yupela i save olsem Jehova* tasol bai givim yupela prais em i bin makim bilong yupela.+ Yupela i mas stap olsem wokboi bilong Bosman, em Krais. 25 Tru tumas, man i mekim rong, em bai kisim pe bilong rong em i mekim.+ God i save skelim ol man long wankain pasin.+

4 Yupela ol bosman, mekim stretpela pasin na pasin i fea long ol wokboi bilong yupela. Yupela i save, yupela tu i gat Bosman i stap long heven.+

2 Oltaim holim strong pasin bilong beten.+ Yupela i mas was i stap na no ken lusim dispela pasin, na tok tenkyu long God.+ 3 Na yupela i mas beten long God i ken helpim mipela tu,+ olsem em i ken opim rot long mipela long tokaut long tok hait holi i stori long Krais. Em long dispela as na mi stap kalabus,+ 4 na bai mi ken autim klia dispela tok olsem mi mas mekim.

5 Bihainim yet savetingting long ol samting yupela i mekim long ol man i stap ausait. Yupela i mas yusim gut taim bilong yupela.*+ 6 Oltaim tok bilong yupela i mas gutpela, olsem yupela i putim sol long en,+ na bai yupela inap save long wanem tok i stret long bekim long olgeta man wan wan.+

7 Tikikus,+ em brata mi laikim tumas na gutpela wokman na wanpela wokboi bilong Bikpela wankain olsem mipela, em bai tokim yupela long olgeta samting i kamap long mi. 8 Mi salim em i go long yupela bai yupela i ken save long mipela i stap olsem wanem na em i ken mekim isi bel bilong yupela. 9 Onesimus+ tu i kam wantaim em. Onesimus em i gutpela brata mi laikim tumas. Bipo em i bin stap wantaim yupela; tupela bai tokim yupela long olgeta samting i kamap long hia.

10 Aristarkus,+ em wankalabus bilong mi, i salim gude bilong em long yupela, na Mak+ tu i mekim olsem, em kasen bilong Barnabas, (Mak i dispela man yupela i bin kisim tok long welkamim+ em sapos em i kam long yupela), 11 na Jisas em ol i kolim Jastus, em tu i salim gude long yupela. Ol dispela man ol i bilong lain i katim skin. Ol tasol ol i wanwok bilong mi long mekim wok bilong Kingdom Bilong God, na ol i stap olsem helpim bilong strongim mi. 12 Epafras,+ em wanpela wokboi bilong Krais Jisas, na bipo em i bin stap wantaim yupela, em i salim gude bilong em long yupela. Oltaim em i save strong tru long beten askim God long helpim yupela, bai yupela i ken kamap strong olgeta na bilip tru long olgeta laik bilong God. 13 Mi ken tokaut long yupela olsem em i wok strong tru long helpim yupela na ol lain i stap long Laodisia na Hierapolis.

14 Luk,+ dispela dokta yumi laikim tumas, i salim gude bilong em long yupela, na Demas+ tu i mekim olsem. 15 Givim gude bilong mi long ol brata long Laodisia na long susa bilong yumi, Nimfa, na long kongrigesen i bung long haus bilong em.+ 16 Na taim yupela i ritim pinis dispela pas, stretim rot na ol bai ritim dispela pas tu+ long kongrigesen bilong Laodisia. Na pas mi salim i go long Laodisia, yupela tu i mas ritim. 17 Na tu, tokim Arkipus:+ “Oltaim wok strong long inapim dispela wok yu bin kisim long Bikpela.”

18 Mi Pol, mi raitim dispela gude long han bilong mi yet.+ Tingim yet olsem mi stap long kalabus.+ Bikpela pasin helpim bilong God i ken i stap wantaim yupela.