JON NAMBA WAN PAS EM I RAITIM

1 Mipela i stori long dispela man husat i stap olsem tok bilong laip,+ em i bilong bipo tru. Mipela i bin harim em i toktok, na mipela i bin lukim em long ai, na mipela i bin lukluk gut long em na han bilong mipela i bin holim em. 2 (Yes, laip i bin kamap ples klia, na mipela i bin lukim na tokaut long en na telimautim+ long yupela olsem dispela laip oltaim+ i stap wantaim Papa na i bin kamap ples klia long mipela.) 3 Dispela samting mipela i bin lukim na harim, mipela i kamapim long yupela+ na bai yupela tu i ken wok bung wantaim mipela. Na Papa na Pikinini bilong em, Jisas Krais, ol i insait long dispela pasin bilong yumi long wok bung wantaim.+ 4 Na mipela i raitim ol dispela samting na bai amamas bilong yumi i ken pulap tru.

5 Na dispela tok mipela i harim long em na mipela i autim long yupela i olsem, God em i lait+ na tudak i no stap long em. 6 Sapos yumi tok, “Yumi wok bung wantaim em,” tasol yumi wokabaut yet long tudak, orait yumi mekim pasin giaman na yumi no bihainim tok i tru.+ 7 Tasol sapos yumi wokabaut yet long lait olsem em yet i stap long lait, yumi olgeta i wok bung wantaim, na blut bilong Jisas, Pikinini bilong em, i rausim olgeta sin bilong yumi na mekim yumi i kamap klin.+

8 Sapos yumi tok, “Yumi no gat sin,” orait yumi giamanim yumi yet+ na tok i tru i no stap long yumi. 9 God i save bihainim tok bilong em na mekim stretpela pasin, olsem na sapos yumi autim ol sin bilong yumi, em bai fogivim ol sin bilong yumi na rausim olgeta pasin i no stret long yumi.+ 10 Sapos yumi tok, “Yumi no bin mekim sin,” orait yumi mekim em i kamap olsem man bilong giaman, na tok bilong em i no stap long yumi.

2 Ol pikinini bilong mi, mi rait na stori long ol dispela samting bai yupela i no ken mekim sin. Tasol sapos man i mekim sin, yumi gat wanpela helpim* i stap wantaim Papa, em Jisas Krais,+ wanpela stretpela man.+ 2 Em i wanpela sakrifais i mekim yumi i kamap wanbel wantaim God,*+ na i no bilong karamapim ol sin+ bilong yumi tasol, nogat, em bilong karamapim ol sin bilong olgeta manmeri bilong dispela graun.+ 3 Sapos yumi bihainim yet ol lo bilong em, orait dispela bai kamapim klia olsem yumi save long em. 4 Man i tok, “Mi save long em,” tasol em i no bihainim ol lo bilong em, em i man bilong giaman, na tok i tru i no stap long dispela man. 5 Tasol man i bihainim tok bilong em, orait pasin bilong dispela man long laikim God i kamap gutpela olgeta.+ Long dispela rot yumi save olsem yumi pas wantaim em.+ 6 Man i tok em i pas yet wantaim em, em tu i gat wok long wokabaut olsem Jisas i bin wokabaut.+

7 Ol pren tru, mi no rait na stori long yupela long wanpela nupela lo, nogat, mi stori long wanpela olpela lo em yupela i bin kisim long pastaim.+ Dispela olpela lo em dispela tok yupela i bin harim. 8 Tasol nau mi rait na stori long yupela long wanpela nupela lo, em wanpela lo Jisas i bihainim na yupela tu i bihainim, olsem na tudak i wok long pinis na lait tru i kamap na i lait i stap.+

9 Man i tok em i stap long lait, tasol em i heitim+ brata bilong em, em i stap yet long tudak.+ 10 Man i laikim brata bilong em, em i stap yet long lait,+ na i no gat wanpela samting inap mekim em i pundaun. 11 Tasol man i heitim brata bilong em, em i stap long tudak na i wokabaut long tudak,+ na em i no save em i go we,+ long wanem, tudak i pasim ai bilong em.

12 Ol pikinini, mi rait long yupela, long wanem, God i bin fogivim ol sin bilong yupela. Em i tingim nem bilong em*+ na i mekim olsem. 13 Ol papa, mi rait long yupela, long wanem, yupela i kisim save pinis long dispela man em i bilong bipo tru. Ol yangpela man, mi rait long yupela, long wanem, yupela i winim pinis Satan.*+ Ol liklik pikinini, mi rait long yupela, long wanem, yupela i kisim save pinis long Papa.+ 14 Ol papa, mi rait long yupela, long wanem, yupela i kisim save pinis long dispela man bilong bipo tru. Ol yangpela man, mi rait long yupela, long wanem, yupela i gat strong+ na tok bilong God i stap yet insait long yupela,+ na yupela i winim pinis Satan.+

15 No ken laikim pasin bilong dispela graun na ol samting bilong dispela graun.+ Sapos man i laikim pasin bilong dispela graun, pasin bilong laikim Papa i no stap long em,+ 16 long wanem, olgeta samting bilong dispela graun, olsem laik nogut bilong bel+ na pasin bilong aigris+ na pasin bilong hambak long mani kago, ol i no kam long Papa, nogat, ol i kam long dispela graun. 17 Na tu, ol manmeri i stap longwe long God, ol bai pinis na laik bilong ol tu bai pinis,+ tasol man i bihainim laik bilong God em bai stap oltaim oltaim.+

18 Ol liklik pikinini, taim i laik pinis, na yupela i bin harim tok long antikrais* bai kam,+ tasol nau yet i gat planti antikrais i kamap pinis.+ Dispela i givim save long yumi olsem taim i laik pinis. 19 Ol i lusim yumi, ol i no bilong lain bilong yumi,+ long wanem, sapos ol i bilong lain bilong yumi, ol bai stap yet wantaim yumi. Tasol ol i lusim yumi na dispela i soim ples klia olsem i no olgeta man i bilong lain bilong yumi.+ 20 Na yupela i bin kisim holi spirit long God,+ na yupela olgeta i gat save. 21 I no olsem yupela i no save long tok i tru+ na mi rait long yupela, nogat, mi rait long yupela, long wanem, yupela i save long tok i tru, na tok i tru i no inap kamapim tok giaman.+

22 Husat i man bilong giaman? Ating em dispela man i tok olsem Jisas em i no Krais,+ a? Antikrais*+ em dispela man i givim baksait long Papa na Pikinini. 23 Olgeta man husat i givim baksait long Pikinini, Papa i no orait long ol.+ Tasol man i tokaut olsem em i bilip long Pikinini,+ Papa i orait long dispela man.+ 24 Tasol yupela i mas holim yet tok yupela i harim long bipo.+ Sapos yupela i holim yet tok yupela i bin harim long bipo, orait yupela bai pas wantaim Pikinini na Papa. 25 Na tu, dispela em samting em yet i bin promisim yumi, em laip i stap oltaim oltaim.+

26 Mi raitim ol dispela tok long yupela na stori long ol man husat i laik giamanim yupela. 27 God i bin makim yupela long holi spirit bilong em+ na dispela spirit i stap yet wantaim yupela. Olsem na i no gat wok long wanpela man i skulim yupela. Tasol mak yupela i kisim long holi spirit, dispela i tru na i no giaman, na i skulim yupela long olgeta samting.+ Na olsem dispela spirit i bin skulim yupela, yupela i mas pas yet wantaim em.+ 28 Olsem na ol pikinini, yupela i mas pas yet wantaim em, na taim em i kamap ples klia, yumi bai i no surik long tokaut.+ Na yumi no kisim sem na stap longwe long em taim em i kam i stap. 29 Sapos yupela i save olsem em i stretpela man, orait yupela i save tu olsem olgeta man i bihainim stretpela pasin ol i pikinini bilong em.+

3 Olaman! Pasin laikim Papa i mekim long yumi i bikpela tru.+ Em i larim yumi kisim nem olsem ol pikinini bilong God,+ na tru tumas yumi stap olsem. Olsem na ol manmeri bilong dispela graun i no save long yumi,+ long wanem, ol i no save long em.+ 2 Ol pren tru, yumi stap pikinini bilong God.+ Tasol inap long nau yumi no save yumi bai kamap wanem kain long bihain.+ Yumi save olsem taim God i kamap ples klia, yumi bai wankain olsem em, long wanem, yumi bai lukim em stret. 3 Olgeta man i bilip long God, ol i mekim ol yet i kamap klin+ olsem em yet i klin.

4 Olgeta man i wokabaut long pasin bilong sin, ol i wokabaut tu long pasin bilong brukim lo, olsem na sin em i pasin bilong brukim lo. 5 Yupela i save tu olsem Jisas i bin kamap ples klia bilong tekewe ol sin bilong yumi,+ na sin i no stap long em. 6 Olgeta man i pas wantaim em, ol i no wokabaut long pasin bilong sin.+ Na man i wokabaut long pasin bilong sin, em i no bin lukim em na i no save long em. 7 Ol pikinini, no ken larim wanpela i giamanim yupela; man i bihainim stretpela pasin em i stretpela man, olsem Jisas em i stretpela man. 8 Man i bihainim pasin bilong sin em i stap long sait bilong Devil,* long wanem, Devil i bin mekim ol sin kirap long pastaim tru.+ As na Pikinini Bilong God i kamap ples klia em i olsem: Em bilong bagarapim ol samting Devil i kamapim.+

9 Olgeta man i pikinini bilong God ol i no save bihainim pasin bilong sin,+ long wanem, holi spirit* bilong Em i stap long ol. Na ol i no inap wokabaut long pasin bilong sin, long wanem, ol i pikinini bilong God.+ 10 Samting i kamapim klia husat ol i pikinini bilong God na husat ol i pikinini bilong Devil i olsem: Olgeta man husat i no bihainim stretpela pasin ol i no stap long sait bilong God, na ol man i no laikim brata bilong ol,+ ol tu i no stap long sait bilong God. 11 Long wanem, dispela em tok yupela i harim long pastaim, olsem yumi mas laikim tru narapela narapela.+ 12 Yumi no ken bihainim pasin bilong Kein, em i stap long sait bilong Satan* na kilim i dai brata bilong em.+ Na i gat wanem as na em i kilim i dai brata bilong em? Em i mekim olsem, long wanem, ol samting em i kamapim i nogut,+ tasol ol samting brata bilong em i kamapim i stretpela.+

13 Ol brata, no ken kirap nogut olsem ol manmeri bilong dispela graun i heitim yupela.+ 14 Yumi save olsem yumi bin lusim dai na nau yumi kisim laip,+ long wanem, yumi laikim ol brata.+ Man husat i no laikim brata bilong em, em i stap yet long dai.+ 15 Olgeta man husat i heitim brata bilong ol, ol i kilman,+ na yupela i save olsem i no gat wanpela kilman i gat laip oltaim i stap long em.+ 16 Long dispela rot yumi bin kisim save long pasin laikim, long wanem, dispela man i bin givim laip bilong em yet bilong helpim yumi.+ Na yumi gat wok long givim laip bilong yumi long helpim ol brata bilong yumi.+ 17 Tasol man husat i gat mani na kaikai samting na em i lukim brata bilong em i sot na em i no laik sori long em, orait olsem wanem pasin bilong laikim God i stap long em?+ 18 Ol pikinini, yumi no ken kamapim pasin laikim long tok o long maus tasol,+ nogat, yumi mas kamapim tu long ol samting yumi mekim+ na long pasin i tru.+

19 Long ai bilong God, yumi ken bilip tru long bel bilong yumi olsem em i orait long yumi na long dispela rot yumi bai save olsem yumi stap long sait bilong tok i tru. 20 Olsem na maski bel bilong yumi i kotim yumi long wanpela samting, God i winim tru bel bilong yumi na em i save long olgeta samting.+ 21 Ol pren tru, sapos bel bilong yumi i no kotim yumi, orait yumi no surik long toktok wantaim God.+ 22 Na wanem wanem samting yumi askim em long en, em i save givim long yumi,+ long wanem, yumi save bihainim ol lo bilong em na yumi mekim ol samting em i laikim. 23 Tru tumas, lo bilong em i olsem: yumi mas bilip long nem bilong Pikinini bilong em, Jisas Krais,+ na laikim narapela narapela+ olsem em i bin tokim yumi long mekim. 24 Na tu, man i bihainim ol lo bilong em i pas yet wantaim em, na em tu i pas wantaim dispela man.+ Na long rot bilong holi spirit em i givim long yumi, yumi kisim save olsem em i pas yet wantaim yumi.+

4 Ol pren tru, no ken bilipim olgeta tok profet,+ tasol yupela i mas traim ol dispela tok profet bilong save olsem ol i kam long God o nogat,+ long wanem, planti giaman profet i kamap pinis long dispela graun.+

2 Yupela inap save long tok profet i kam long God long dispela rot: Olgeta tok profet i tokaut olsem Jisas Krais i bin kamap man bilong graun, ol i kam long God.+ 3 Tasol olgeta tok profet i no tokaut long Jisas, ol i no kam long God.+ Na tu, dispela em ol tok bilong antikrais,* na yupela i bin harim olsem ol dispela tok bai kamap,+ na nau i kamap pinis long dispela graun.+

4 Ol pikinini, yupela i stap long sait bilong God, na yupela i winim pinis+ ol dispela giaman profet, long wanem, man i pas wantaim yupela+ em i winim man i pas wantaim ol manmeri i stap longwe long God.+ 5 Ol dispela giaman profet i stap long sait bilong ol dispela manmeri i stap longwe long God.+ Olsem na ol giaman profet i mekim wankain tok olsem ol dispela manmeri. Na ol manmeri i harim tok bilong ol.+ 6 Yumi stap long sait bilong God. Man i kisim save long God em i save harim tok bilong yumi.+ Man i no stap long sait bilong God em i no save harim tok bilong yumi.+ Long dispela rot yumi inap luksave long tok profet i tru na tok profet i kranki.+

7 Ol pren tru, yumi mas wok yet long laikim narapela narapela,+ long wanem, pasin laikim i kam long God, na olgeta man husat i mekim pasin laikim, ol i pikinini bilong God na ol i save long God.+ 8 Man i no mekim pasin laikim em i no kisim save long God, long wanem, God em i pasin laikim.*+ 9 Pasin laikim bilong God i kamap ples klia long yumi olsem: God i salim Pikinini bilong em, em pikinini tru*+ bilong em, i kam long dispela graun bai yumi inap kisim laip long rot bilong em.+ 10 I no olsem yumi laikim God na em i mekim dispela samting, nogat. Em olsem, God i laikim yumi na salim Pikinini bilong em i kam olsem sakrifais long ol sin bilong yumi+ bilong mekim yumi kamap wanbel wantaim God.*+

11 Ol pren tru, sapos God i laikim yumi olsem, orait yumi tu i gat wok long laikim narapela narapela.+ 12 I no gat wanpela taim we wanpela man i bin lukim God.+ Sapos yumi wok yet long laikim narapela narapela, orait God i stap yet wantaim yumi na pasin laikim bilong em i kamap gutpela olgeta long yumi.+ 13 Em i givim spirit bilong em long yumi, na long dispela rot yumi save olsem yumi pas yet wantaim em na em i pas wantaim yumi. 14 Na tu, yumi yet i bin lukim na tokaut olsem Papa i bin salim Pikinini bilong em i kam olsem seivia bilong ol manmeri.+ 15 Man i tokaut olsem Jisas em i Pikinini Bilong God,+ God i pas yet wantaim dispela man na dispela man i pas wantaim God.+ 16 Na yumi bin kisim save na bilip long pasin laikim God i mekim long yumi.+

God em i pasin laikim,+ na man i kamapim pasin laikim long olgeta taim em i pas yet wantaim God na God i pas yet wantaim em.+ 17 Long dispela rot pasin laikim i kamap gutpela olgeta long yumi, olsem na long de bilong kot bai yumi no surik long toktok,+ long wanem, long dispela graun yumi stap wankain olsem Krais. 18 Pret i no stap insait long pasin laikim,+ nogat, tasol pasin laikim i gutpela olgeta em i save rausim pret, long wanem, pret i save pasim yumi. Tru tumas, man i pret, pasin laikim i no kamap gutpela olgeta long em.+ 19 Tasol yumi mekim pasin laikim, long wanem, em i bin laikim yumi pastaim.+

20 Sapos wanpela man i tok, “Mi laikim God,” tasol em i heitim brata bilong em, em i man bilong giaman.+ Long wanem, man i no laikim brata bilong em+ we em i bin lukim, em i no inap laikim God em man em i no bin lukim.+ 21 Na lo yumi kisim long em i olsem, man i laikim God em i mas laikim brata bilong em tu.+

5 Olgeta man i bilip olsem Jisas em i Krais, ol i pikinini bilong God,+ na olgeta man husat i laikim God, ol i laikim tu ol pikinini bilong God. 2 Taim yumi laikim God na bihainim ol lo bilong em, long dispela rot yumi save olsem yumi laikim ol pikinini bilong God.+ 3 Pasin bilong laikim God i olsem, yumi bihainim ol lo bilong em;+ na ol lo bilong em i no givim hevi long yumi,+ 4 long wanem, olgeta pikinini bilong God i save winim strong bilong dispela graun.+ Na samting i mekim na yumi winim strong bilong dispela graun, em bilip bilong yumi.+

5 Husat inap winim strong bilong dispela graun?+ Em dispela man i bilip olsem Jisas em i Pikinini Bilong God, a?+ 6 Jisas Krais em dispela man i kam long rot bilong wara na blut. Na em i no kam wantaim wara tasol,+ nogat, em i kam wantaim wara na blut.+ Na holi spirit i tokaut long dispela samting,+ long wanem, holi spirit em i tok i tru. 7 I gat tripela i mekim tokaut: 8 holi spirit+ na wara+ na blut;+ na tripela i wanbel.

9 Yumi save bilipim tokaut bilong ol man, tasol tokaut bilong God i win tru, long wanem, tokaut God i mekim em tokaut bilong em long Pikinini bilong em. 10 Man i bilip long Pikinini Bilong God, em yet i kisim tokaut. Man i no bilip long God em i mekim olsem God i man bilong giaman,+ long wanem, em i no bilipim ol samting God i tok em i tru, em ol samting i stori long Pikinini bilong em. 11 Dispela tokaut i olsem, God i givim laip oltaim+ long yumi, na dispela laip i stap long Pikinini bilong em.+ 12 Man i pas wantaim Pikinini em i gat dispela laip. Man i no pas wantaim Pikinini Bilong God em i no gat dispela laip.+

13 Mi raitim ol dispela samting long yupela bai yupela i ken save olsem yupela i gat laip oltaim.+ Mi tok long yupela husat i bilip long nem bilong Pikinini Bilong God.+ 14 Na bilip yumi gat long em i olsem,+ maski wanem wanem samting yumi askim em long en na i stret wantaim laik bilong em, em bai harim yumi.+ 15 Na sapos yumi save olsem em i harim yumi long wanem wanem samting yumi askim em long en, orait yumi save yumi bai kisim, long wanem, yumi askim em long ol dispela samting.+

16 Sapos wanpela man i lukim brata bilong em i mekim wanpela sin we i no save kamapim dai, orait em bai beten long helpim em, na God bai givim laip long dispela brata.+ Yes, em bai givim laip long ol man i mekim sin we i no save kamapim dai. Tasol i gat wanpela sin we i save kamapim dai.+ Na mi no tok long dispela man i mekim beten bilong helpim man i mekim kain sin olsem. 17 Olgeta pasin i no stret em sin.+ Tasol i gat wanpela sin we i no save kamapim dai.

18 Yumi save olsem olgeta man i stap pikinini bilong God ol i no save wokabaut long pasin bilong sin, tasol dispela Man* em i pikinini bilong God em i save was long ol, na Satan* i no inap holimpasim ol.+ 19 Yumi save yumi stap long sait bilong God, tasol dispela graun olgeta i stap long han bilong Satan.+ 20 Tasol yumi save olsem Pikinini Bilong God i bin i kam,+ na em i opim tingting bilong yumi na bai yumi inap kisim save long God tru.+ Yes, dispela em i God tru na em i as bilong laip oltaim.+ Na long rot bilong Pikinini bilong em, Jisas Krais, yumi pas wantaim em. 21 Ol pikinini, yupela i mas i stap longwe long ol imis.+