Graun i Laik Bagarap
‘Sapos yumi no kirap kwik na mekim wanpela samting, ol wok mani na bisnis samting bai go nogut na bikpela hevi bai painim ol man na ol i no ken i stap isi’
EM TOK bilong Lester Brown, em presiden bilong wanpela lain (Worldwatch Institute) i gat wok long skelim ol samting bilong graun i wok long bagarap.
Em i tok, long nau ol man i wok long bagarapim graun na wara na solwara na win, na ol i katim ol bus, na nau taim bilong san i save stap longtaim na i no gat ren, na san i mekim na graun i go strong, long wanem i no gat gras o diwai samting long en, na gutpela hap graun bilong antap i tekewe long taim bilong ren, na graun i bruk; na narapela hevi tu, em planti pikinini i wok long kamap. Em i tok, ‘Sapos ol i no stretim kwik ol dispela hevi, graun i no inap kamapim kaikai bilong ol dispela planti manmeri, na bai planti lain i kamap rabis.’ Na em i tok, ol kaikai em ol fama i kamapim i wok long i go liklik, na ol wit na rais samting ol gavman i bungim i stap, dispela tu i wok long i go liklik insait long 15 yia i kam inap long nau.
Na dispela man i tok moa olsem: ‘Taim i sot pinis. Yumi mas stretim dispela hevi nau tasol na yumi no ken lusim taim. Sapos yumi wet na yumi laik mekim bihain long 1999 samting, bai yumi no gat rot moa bilong stretim. Na sapos taim bilong bikpela san i painim gen ol fama, bai bikpela hevi tru i kamap. Bai yumi no gat wit o rais samting bilong baim i go long ol narapela kantri, na pe bilong en bai go antap tru. Dispela hevi bai winim tru hevi i kamap taim ol kantri i sot long wel bilong wokim bensin samting. Tru taim i pinis nau bilong stretim dispela hevi long sampela hap bilong Afrika—graun i bagarap olgeta na ol i no inap mekim wanpela samting bilong stretim. Ating i no longtaim na Saut Amerika bai wankain.’
Ol dispela hevi i truim tok profet bilong Baibel i tok long ol samting bai kamap long taim bilong yumi, olsem bikpela hangre, bikpela sik, pait, dai, na ol man bai “bagarapim graun.” Jisas i tok, long pinis bilong dispela taim “bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” Dispela bai pinisim dispela taim nogut nau yumi stap long en, na bihain long en God bai kamapim nupela taim long dispela graun.—Kamapim Tok Hait 6:1-8; 11:18; Matyu 24:21; 2 Pita 3:10-13.