Ol i Kirapim Tru Bel Bilong Papa Bilong Mi

Wanpela meri bilong Westeli, long Ailan Rot long Amerika, em i raitim pas na i tok, ‘Papamama bilong mi i bilong Itali, na lotu bilong ol em lotu Katolik. Tupela i nolaik tru long kaunim Wastaua na Kirap!’ Tasol dispela meri i tok, nau Wastaua i kirapim tru bel bilong papa. Em i stori long samting i bin kamap, olsem:

“Wanpela taim mi kisim trak bilong papa bilong mi. I gat kaset i stap long trak, tasol mi save papa i no mekim wok long dispela kaset. Olsem na mi tingting long putim wanpela kaset bilong Wastaua long en. Taim mi bekim trak long papa, mi no rausim dispela kaset. Orait bihain papa bilong mi i kisim trak bilong em i go na em i opim kaset na em i harim dispela kaset bilong Wastaua.

“Papa bilong mi em i narapela kain man​—taim em i harim dispela kaset bilong Wastaua, em i ting ol Witnes i mekim tok long redio. Olsem na em i wok long senisim senisim ol program long redio, tasol em i harim ol toktok i stori long ol Witnes tasol. Tupela de bihain em i kisim save olsem dispela i no redio, em wanpela kaset. Tasol em i bin harim harim ol dispela tok bilong Wastaua, olsem na em i laikim ol dispela tok em i harim.

“Mi save, papa i bin lain long sampela tok em i bin harim long dispela kaset, long wanem, em wantaim mama i wok long tokim mi long ol samting papa i bin harim long dispela kaset. Olsem na taim mi laik lusim haus long moningtaim bilong i go autim tok bilong Baibel long ol man, mi wok long senisim kaset na putim narapela kaset long ka. Na olgeta moningtaim, taim mipela i kaikai wantaim, papa i givim sampela askim long mi olsem: ‘Man bilong yu em i wanpela elda?’ o ‘Baibel i no stori long klinpaia o bikpaia, a?’ Olsem na mi save, isi isi papa i wok long kisim save long Baibel.”