Kolmanskop—Wesan na Ros i Bagarapim Ol Samting

Long ples wesan bilong Namib long hap saut Namibia i gat ol pipia ston samting bilong wanpela taun​—Kolmanskop. Ol man i bin stap long dispela taun klostu long 50 yia tasol.

Long yia 1908 ol man i bin painim ston daimon, olsem na kain kain man i kam bilong painim dispela naispela ston​—ol man bilong digim graun na painim dispela ston, na ol maniman i wok bisnis na sampela man nogut, olgeta i kam. I no longtaim na planti man i sindaun long Kolmanskop. Ol i wokim ol naispela haus, i gat pos ofis na hotel tu. Na i gat wanpela bikpela haus i gat tupela plua na ol man i save pilai laki long en.

Samting i mekim na planti man i kamap long Kolmanskop, dispela samting tasol i mekim na ol man i lusim dispela ples. Wok bisnis long painim ol naispela ston olsem daimon i pinis, long wanem, ol i kisim pinis ol dispela ston. Olsem na ol man i bin wok long painim dispela kain ston ol i go long ol narapela hap i gat ol daimon. Bihain long yia 1900 planti man i no baim ol daimon, olsem na ol man i no kisim moa bikpela mani long dispela ston. Em nau, isi isi ol man i lusim dispela taun Kolmanskop, na long 1956 i no gat wanpela man i stap long dispela taun.

Long nau ol masin samting i stap nating na ros na bikpela san bilong Afrika i wok long bagarapim. Dispela samting i mekim na yumi save, taim man i wok long rausim ol samting long graun olsem ol naispela ston samting, dispela wok bilong ol man i no save stap longtaim. Olsem na taim yumi tingim ol samting i kamap long Kolmanskop yumi tingim tok bilong Jisas long Matyu 6:20. Em i tok: “Yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting.”