Ol i Tingim Narapela

WINIM 4 milion Witnes Bilong Jehova i stap long 69,000 samting kongrigesen long olgeta hap bilong graun. Ol Witnes i givim bel long skulim ol man long ol samting God i laik mekim, na tu, narapela i laikim tru narapela olsem Jisas i tok ol i mas mekim. (Jon 13:​34, 35) Olsem na ol i mekim sampela samting bilong kamapim sori bilong ol.

Olsem: Wanpela Sarere moningtaim long 6 klok, klostu 30 Witnes bilong Kongrigesen Is San Makos, long Kalifonia i bin bung bilong kaikai. Ol i laik mekim wanpela wok, olsem stretim sampela samting long haus bilong sampela long kongrigesen.

Em haus bilong ol papa o mama i stap wanpis, na ol meri em man bilong ol i dai pinis, na ol lapun. Wok ol i mekim em olsem: Stretim rup bilong haus, o putim kolta long rot bilong ka, o putim ol sekuriti-lait, o putim dua bilong haus ka, o penim sampela samting, o katim i go liklik ol diwai na sampela samting moa. Wanpela mun samting paslain long ol i kirap na mekim dispela wok, ol i bin stretim toktok long ol bai mekim wok olsem wanem, na baim ol samting bilong mekim wok.

Long Sarere ol i bin makim bilong kirapim wok, ol i stretim tok taim ol i kaikai long moningtaim. Ol i makim ol grup bilong wok na makim wok ol i mas mekim. Ol meri i redim kaikai bilong ol. Samting ol i mekim long dispela de i bin amamasim ol papa bilong haus na olgeta bilong kongrigesen.