Gutpela Man Bilong Samaria Long Nau
WANPELA meri long Kanada i bagarap long ka. Wanpela Gutpela Man Bilong Samaria long nau i kam na helpim em. (Luk 10:29-37) Gutpela pasin bilong dispela man i kirapim meri long raitim pas i go long nius The Georgetown Independent. Em i rait olsem:
‘Yes Edita:
‘I gat tupela as na mi raitim dispela pas. Namba wan: Mi laik tok tenkyu long wanpela man bilong Jostaun i kam helpim mi taim mi no inap bosim stia bilong ka na ka i pundaun long wanpela baret.
‘Mista John Saunders i bin pasim ka bilong em na helpim mi inap long taim ambulens na polis i kam. Na em i mekim sampela tok bilong mekim gut bel bilong mi. Yu ken amamas long komyuniti bilong yupela i gat kain man olsem Mista Saunders—em i wanpela Gutpela Man Bilong Samaria.
‘Mista Saunders i laik save, mi orait o nogat, olsem na em i kam lukim mi na man bilong mi long haus sik. Mi kirap nogut long save, Mista Saunders em i wok long nambawan ofis bilong ol Witnes Bilong Jehova long Jostaun. Mi bin ting dispela lain i no bilip long marasin, tasol wanpela bilong ol—em Mista Saunders—em i gat save long helpim ol sikman o man i kisim birua, na em i bin helpim mi. Nau mi laik kamapim namba tu as bilong raitim dispela pas.
‘Mi laik tok sori long olgeta Witnes Bilong Jehova, long wanem, taim ol i save kam long haus bilong mi, mi save tok strong long ol. Mi ting yupela i kam bilong subim ol man long bilipim tok bilong yupela. Tasol samting Mista Saunders i mekim i kamapim long ples klia olsem dispela tingting bilong mi i tingting kranki. Nau mi save yupela i no narapela kain—yupela ol man i wok long mekim ol samting yupela i ting i stret long mekim.
‘Mista Saunders, mi laik tok tenkyu gen long yu, na yu mas bihainim yet bilip bilong yu. God i mas blesim yu.
‘T. M., long Toronto’
Ol Witnes Bilong Jehova i bilip olsem ‘yumi mas laikim tru ol [narapela] olsem yumi laikim yumi yet.’ (Luk 10:27) Sapos yu laik kisim sampela save moa long ol Witnes Bilong Jehova, o yu laik bai wanpela i kam lukim yu long haus na lainim yu long ol tok bilong Baibel, no gat pe, orait raitim pas long IBSA, Box 636, Boroko, N.C.D., Papua New Guinea, o lukim atres long pes 5 em i stret long yu.