Pisin Magpai i Save Stil?
LONG 1817 taim wanpela man Itali, em Rossini, i raitim singsing La gazza ladra (Magpai Bilong Stil), em i bilip tru olsem dispela pisin i save stil. Na planti man i gat wankain tingting long pisin magpai, em wanpela pisin i no save pret. Wanpela buk (Book of the North American Birds) i tok: ‘Magpai i olsem wanpela hambak pisin bilong hap bilong Westen Amerika.’ Maski ol man i save dispela pisin i gat blakpela maus i stap long planti kantri, ol i no bin save em i stap long Amerika inap long taim tupela man i gat nem, em Lewis na Clark, i bin raun long painim ol nupela ples long yia 1804-1806. Sampela man i raun wantaim Lewis na Clark i tok, ol magpai i bin kam insait long haus sel bilong ol na stilim kaikai.
Sapos yu stap long Yurop, o Esia, o Ostrelia, o Not Amerika, ating yu save long magpai bilong ples. Em i bikpela liklik. Longpela bilong en i olsem 56 sentimita, na pul na bodi bilong en i gat blakpela na waitpela mak. Tel bilong en i longpela na grinpela, na em i gat strongpela maus. Planti magpai i no save stap wanpis, ol i save bung wantaim wanlain bilong ol. Ol i strong long sakim birua—man tu—long kam insait long hap bilong ol.
Taim man i lukim magpai bilong Briten long namba wan taim, em inap ting em i gat tupela kala tasol—blakpela gras na waitpela mak long bel, na mak long pul bilong en. Tasol gras i gat sampela gutpela kala i stap hait liklik. Gras na longpela tel bilong en i retpela na grinpela, na ol sap bilong tel i braunpela. Tel i longpela tru, winim longpela bilong bodi bilong en.
Ol man i save amamas long harim krai bilong magpai bilong Ostrelia—em i gat gutpela nek. Yu save yu stap long Ostrelia taim yu harim krai bilong en na krai bilong pisin kukabara (laughing jackass). Nek bilong magpai i narapela kain long ol narapela pisin. Na gras bilong en long baksait, na pul, na aninit long tel bilong en, i gat waitpela mak.
Olsem na yumi laik save—tru em i wanpela pisin bilong stil? Wanpela buk (Song and Garden Birds of North America) i tok: ‘Inap longpela taim long hap bilong wes bilong Yunaitet Stets, ol man i no save laikim magpai i gat blakpela maus. Ol i tok, em pisin bilong stil na kaikai pipia tasol.’ Tasol laspela tok bilong dispela buk i gutpela tok. Bilong wanem i gutpela tok? Long wanem, pisin o animal i save raun na kaikai pipia o ol animal na pisin i dai pinis, i mekim gutpela wok long klinim ples. Olsem na maski ol man i daunim o litimapim nem bilong magpai, em i wanpela pisin bilong ol 9,300 kain kain pisin i save bilasim graun bilong yumi.