Yumi Bihainim Rot i Go We?

TINGIM olsem yu raun long wanpela hap yu no save long en. Longtaim pinis yu mas kamap long ples yu laik i go long en, tasol yu no lukim ol mak yu ting bai yu lukim​—nem bilong ol rot na ol taun samting i narapela kain. Yu tingting olsem: ‘Mi stap we? Mi bihainim rot i stret?’

Kain samting olsem i painim ol manmeri bilong nau. Ol i lukim pasin bilong ol man i go nogut tru, winim olgeta taim bipo, na i olsem ol i stap long ples ol i no save long en. Ol i kisim bikpela save bilong graun na ol inap wokim kain kain masin na i olsem gutpela taim i mas kamap, tasol nogat. Edita Russell Bourne i tok, long taim bilong yumi tasol “laik bilong ol man bilong bipo inap kamap, em ol i laik i stap olsem bikpela lain brata long olgeta hap.”​—Buk Great Ages of Man.

Tasol ol man i no kamap yet long dispela ples​—ol i no i stap olsem “bikpela lain brata long olgeta hap.” Ol i ting nau bai ol i lukim ol man i gat gutpela sindaun, na ol i gat kaikai inap long ol, na ol i stap gutpela long skin, na ol famili i stap amamas, tasol nogat. Wanpela buk i tok: “Ol saveman bilong saiens i kisim bikpela save moa, tasol planti taim dispela i kamapim bagarap na ol man i givim bikpela pen na hevi long ol narapela.”​—Buk Milestones of History.

Tru tumas, long nau ol manmeri i paul nabaut long ples ol i no save long en; ol i lusim pinis rot bilong bringim ol long gutpela taim; ol i no kisim bel isi na gutpela sindaun olsem ol i bin ting nau bai ol i kisim. Olsem na planti man i laik save wanem rot ol i mas bihainim na ol i askim olsem: “Wanem samting i mekim na yumi stap nogut olsem? Yumi bihainim rot i go we? Tru yumi stap long taim bilong las de?”

Pastaim yumi mas save yumi stap we long nau, na bai yumi inap save yumi bihainim rot i go we. Sampela i tok, klostu nau bai nupela taim i kamap; sampela i tok, bikpela bagarap i laik kamap. Baibel em i olsem mep, em inap helpim yumi long save yumi bihainim wanem rot long nau, na dispela rot bai bringim yumi i go we.

Taim yu raun long rot, yu mas was i stap bambai yu inap lukim ol samting i makim olsem yu stap we. Olsem tasol Baibel i kolim sampela samting na sampela pasin i mas kamap long graun bilong makim hap taim em Baibel i kolim “taim bilong las de.” (2 Timoti 3:​1-5) Dispela tok “taim bilong las de” i no makim olsem dispela graun yet wantaim skai bai pinis. Nogat. Dispela tok i makim olsem “pasin bilong dispela graun” bai pinis, o olsem wanpela Baibel i tok, “dispela taim bai pinis.”​—Matyu 24:​3, NW; Baibel Today’s English Version.

Aposel Kristen Pol i tok: “Long taim bilong las de planti hevi nogut tru bai i kamap.” (2 Timoti 3:1) Tru, yumi inap ting dispela tok i makim sampela hap taim long bipo; long olgeta narapela narapela taim long bipo i gat sampela hevi i bin kamap.

Orait, i gat wanem as na yumi ken bilip olsem dispela tok i makim taim bilong yumi?

[Piksa Kredit Lain long pes 3]

Tom Haley/Sipa Press