Em i Painim Ol Meri Bilong Tok Tru Tasol

Wanpela yangpela meri long Ekwado i painim wok na em i go toktok wantaim wanpela bos. Bihain long em i toktok wantaim ol narapela em ol i kam bilong kisim dispela wok​—⁠em 36 olgeta​—⁠em i save olsem em i no inap kisim dispela wok. Ol i save long dispela kain wok na ol i bin kisim skul long yunivesiti, tasol em yet nogat. Na em i no bin bekim gut tupela bilong sikspela askim bos i givim long em. Tasol wanpela askim i bilong kamapim bel bilong em yet: “Yu yet i ting tok tru em wanem samting?”

Meri i bekim olsem: “Tok tru i no wanpela tingting nating yumi no inap save long en, tasol em i samting yumi mas bihainim. Yumi mas mekim tok tru na no ken giaman, long wanem, sapos yumi giaman, yumi bihainim ol pasin bilong Satan. Sapos yumi mekim tok tru, yumi amamasim God na dispela i helpim yumi long planti samting.”

Taim bos i askim meri long lotu bilong em, em i tok em i wanpela Witnes Bilong Jehova. Long de bihain bos i tokim em olsem ol i makim em bilong kisim dispela wok. Wanpela mun bihain meri i askim bos olsem wanem na em i makim em bilong kisim dispela wok, na bos i tok, long wanem, em i no giaman, em i tok tru tasol.

Tru tumas, planti manmeri long nau i no save mekim tok tru. Tasol ol man i daun long Baibel ol i gat nem olsem ol man i save mekim tok tru. Wastaua bilong Julai 1, 1995, i tok: “Long Baibel, dispela tok olsem ‘tok tru’ i no wankain olsem tingting bilong ol saveman bilong graun long tok i tru, em ol i paitim tok long en i go i kam.”

Taim yu kaunim Wastaua long olgeta taim em bai helpim yu. Wastaua i gat nem long olgeta hap bilong graun olsem nius bilong kamapim tok tru bilong Baibel. Sapos yu laik kisim wanpela o yu laik bai wanpela i kam long haus na stadi wantaim yu long Baibel, no gat pe, orait raitim pas long IBSA, Box 636, Boroko, NCD 111, Papua New Guinea, o lukim atres long pes 5 em i stret long yu.