“Kirap! i Helpim Mi na Mi No Dai”

Arthur, long taun Suva, long Fiji, em i tok: “Long 10 klok long nait long Novemba 11, mi kirap pilim pen long bros bilong mi na mi ting em pen nating tasol. Meri bilong mi, em Esther, em i tingting strong olsem mi kisim hat-atek. Em i tok, ol mak bilong sik bilong mi i wankain olsem sik em Kirap! bilong Disemba 8, 1996, (tok Inglis) i stori long en. Het-tok bilong dispela Kirap! em, ‘Heart Attack​—⁠What Can Be Done?,’ na nau tasol em i kaunim.

“Mi ringim dokta bilong mi na tokim em long sik bilong mi. Em i tokim mi long kisim sampela marasin na go slip, na long moningtaim mi go lukim em. Tasol pen i strong yet. Nau mi askim Esther long kisim Kirap! na kaunim dispela hap ‘Symptoms of a Heart Attack.’ Taim em i kaunim pinis long mi, mi orait long ol i kisim mi i go long haus sik.

“Dokta i sekim mi na em i painimaut olsem mi kisim hat-atek, na mi mas slip long haus sik. Inap faipela de em i givim mi strongpela marasin bilong slip na mi malolo gut. Dispela dokta bilong helpim ol man i gat sik long klok i tok, gutpela tru yu luksave yu bin kisim hat-atek.

“Long Janueri 9, 1997, inap fopela aua dokta i katim mi bilong stretim klok bilong mi, long Sidni, Ostrelia. Ripot bilong dokta i katim mi i tok, ‘dispela sik long rop i go long klok em i nogut tru.’ Samting long rop bilong klok bilong mi i makim olsem mi inap kisim bikpela hat-atek insait long sampela mun sapos mi no luksave long dispela hat-atek i bin kamap long Novemba 11.

“Mi inap tokaut stret olsem, Kirap! i helpim mi na mi no dai, long wanem, sapos mi no bin kaunim Kirap! bai mi ting dispela hat-atek bilong mi em wanpela pen nating i kamap.”

Kirap! i save kamapim stori bilong ol samting i kamap stret long taim bilong yumi, na i kamapim tu ol save ol i kisim pinis long kain kain samting. Sapos yu laik kisim dispela nius long olgeta taim, toksave long ol Witnes Bilong Jehova long narapela taim yu lukim ol, o raitim pas long atres i stap long pes 5 i stret long yu.