Evolusen i No Wanpela Samting i Bin Kamap Tru
Sampela lain i bin skelim tingting bilong ol man na ol i kisim save olsem, planti man bilong Amerika i bilip olsem God i bin wokim namba wan man na meri, na ol i no kamap nating long rot bilong evolusen olsem bipo ol liklik samting i gat laip i senis isi isi na kamap man. Tasol bilong wanem planti tisa bilong saiens long Amerika i tok evolusen em i wanpela samting i bin kamap tru? Wanpela profesa bilong lo long Yunivesiti Bilong Kalifonia long Bekeli, em Phillip E. Johnson, em i tok, wanpela as i olsem: ‘Ol man i bihainim tingting bilong Dawin ol i bosim ol dipatmen bilong saiens long planti yunivesiti.’
Johnson i tokaut olsem: ‘Ol i bin tambuim sampela profesa long tokim ol sumatin olsem i gat as na yumi no ken bilip tumas long dispela tok olsem ol liklik samting i no gat laip o tingting ol inap kamapim ol gutpela gutpela samting bilong graun i gat laip na ol i bin mekim tru dispela samting.’
Wanpela saveman bilong saiens, em Murphy O’Dean, em i tok: ‘Ol i no lusim dispela bilip nating i no gat as bilong en, nogat; em i kamap olsem wanpela tok ol man i bilip long en, olsem tok bilong “evolusen i stret.” ’ Ol samting ol i kisim save long en i pait wantaim tok bilong ol, ol i haitim dispela samting bambai ol man i ken ting tok bilong ol i stret.
Bilong wanem ol i mekim olsem? Long wanpela buk (Darwin’s Black Box) saveman Michael Behe, em i tok olsem: ‘Planti man, na ol bikman bilong saiens tu, ol i no laik bilip olsem i gat wanpela samting i stap antap. Ol i no laik bai i gat wanpela bikpela man antap i stiaim ol samting bilong graun na ol i mekim wok bilong ol.’ Tasol saiens tru i save skelim ol tok bilong evolusen i pait wantaim na ol i no sakim dispela samting bambai ol i ken kamapim tingting bilong ol yet. Na i no olgeta saientis i bilip long evolusen.
Wanpela nius (Veja) bilong Brasil i askim Carlo Rubbia, em man i winim Prais Nobel long ol samting bilong saiens, olsem: ‘Yu save bilip long God?’ Em i no tokaut olsem em i bilip long God, tasol em i tok: ‘Taim mipela skelim moa yet ol samting long graun, mipela i pilim tru wok bilong olgeta samting, ol i save wok stret wantaim. Taim mipela wok long lukim tasol ol samting, dispela i kamapim klia i mas i gat wanpela bikpela saveman, olsem na mi bilip Man bilong wokim olgeta samting em i stap tru.’
Tok bilong dispela saveman i helpim yumi long tingim tok bilong aposel Pol long God olsem: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim.”—Rom 1:20.