Ol i Go Pas Long Wok Dokta

JOSÉ, wanpela man bilong liklik taun Upeye, long Beljam, em i gat 61 krismas taim ol dokta i tokim em ol i mas rausim lewa bilong em na putim narapela lewa insait long skin bilong em. Em i tok: “Man! Bel bilong mi i bagarap stret.” Inap 40 yia i go pinis, ol dokta i no bin tingting liklik long kisim lewa bilong wanpela man na putim i go insait long skin bilong narapela man, nogat tru. Na long 1970 i go inap 1979, inap 30 pesen tasol bilong ol man i kisim lewa bilong narapela man, ol i bin abrusim bagarap. Tasol long nau, ol dokta i save mekim dispela samting planti taim, na planti man moa ol i abrusim bagarap.

Tasol i gat wanpela bikpela hevi yet long dispela samting. Taim dokta i rausim lewa bilong sikman na putim lewa bilong narapela man i go insait long skin bilong em, planti taim bikpela hap blut i save lus na ol dokta i givim blut long sikman. Bilip bilong José long lotu i mekim na em i no laik kisim blut. Tasol em i laik ol dokta i putim narapela lewa insait long skin bilong em. Yu ting ol dokta i no inap? Ating sampela bai ting olsem. Tasol nambawan dokta bilong katim man em i ting em na ol wanwok bilong em inap katim José na ol i no ken mekim wok long blut. Na tru tumas, ol i mekim olsem! Inap 25 de bihain long ol dokta i katim em, José i stap gen long haus wantaim meri na pikinini bilong em.a

Ol dokta i gat save long katim man na i no mekim wok long blut, nius Time i kolim ol olsem “ol hapman stret bilong wok dokta.” Wok bilong ol dispela dokta i mekim na nau planti dokta moa i no save mekim wok long blut. Tasol bilong wanem planti man i no laik kisim blut taim dokta i katim ol? Bilong bekim dispela askim, yumi ken skelim ol hevi i bin kamap long pasin bilong kisim blut, kirap long bipo i kam inap nau.

[Futnot]

[Piksa long pes 3]

Long nau, long olgeta hap bilong graun i gat olsem 90,000 dokta i tokaut pinis olsem ol i orait long helpim ol Witnes Bilong Jehova na i no ken mekim wok long blut