Taim Bebi Bilong Yu i No Laik Pinis Long Krai
WANPELA MAN LONG KANADA I RAITIM DISPELA STORI BILONG KIRAP!
DOKTA i tokaut long samting mama i bin tingim pinis. Bebi bilong em i gat sik kolik, olsem wantu bel bilong bebi i pen nogut tru. Nius Globe and Mail bilong Kanada i tok, dispela sik i save painim “wanpela bilong olgeta 4-pela 4-pela pikinini.” Sampela mak bilong dispela sik i olsem pikinini bai krai inap sampela aua inap 3-pela o moa de long wanpela wik. Wanpela papa o mama i save wari tru em inap mekim wanem samting? Ol dokta bilong ol pikinini i tok planti taim ol papamama—na pikinini—ol i ken wet tasol. Tasol ol i mas wet inap wanem taim?
Wanpela nupela wok painimaut long Kanada long ol mama em bebi bilong ol i gat sik kolik i kamapim olsem 85 pesen bilong ol pikinini i gat dispela sik, sik bilong ol i save pinis taim pikinini i gat 3-pela mun. Dispela wok painimaut em Dokta Tammy Clifford i as bilong en, em wanpela dairekta long Children’s Hospital of Eastern Ontario Research Institute, i kamapim tu olsem sapos mama i gat bebi i gat sik kolik, dispela i no save bagarapim tingting bilong mama inap oltaim. Dokta Clifford i tok: “Inap 6-pela mun bihain long mama i karim bebi, ol dispela mama i wankain olsem ol Mama em bebi bilong ol i no gat sik kolik. I olsem taim bebi i no krai moa ol mama i save lusim tingting long dispela.”
Nius Globe i tok, dispela nupela wok painimaut em Dokta Clifford na ol wanwok bilong em i raitim “i kamapim sampela bikpela samting long save bilong saiens long ol samting bilong sik kolik, long wanem, em i kamapim olsem i gat 3-pela narapela narapela kain sik kolik bilong ol bebi: sampela bebi i save kisim dispela sik na insait long 3-pela mun samting sik i save pinis; sampela bebi i gat dispela sik planti taim inap planti mun; na i gat liklik lain bebi em ol i save kisim sik kolik sampela mun bihain long mama i karim ol.” Nau ol i mekim narapela wok painimaut bilong save long sik kolik bilong ol pikinini taim ol i wok long i go bikpela, na em i dispela namba 3 grup i hatwok moa long save long en.
Ol i ting olsem pasin bilong krai oltaim i wanpela as na ol i save seksekim strong bebi. Olsem nius Globe i stori long en, “pasin bilong krai i no save mekim nogut long pikinini, tasol sapos wanpela i seksekim strong bebi, maski em inap sotpela taim tasol, dispela i ken mekim nogut tru long em, na em inap i dai.”
Tasol ating i gat wanpela gutpela samting inap kamap sapos bebi i krai, maski em i krai planti. Nius Globe i tok: “Wok painimaut i kamapim olsem taim ol bebi i save krai planti, husat i lukautim ol i save tingim ol moa, olsem tatsim ol moa, smail moa long ol, toktok moa wantaim ol na holim ol moa.”