Ol Yangpela i Mas i Gat ‘Man Bilong Toktok Gut Wantaim Ol’

OLGETA papamama i save olsem ol liklik pikinini i save kamap bikpela na strong taim papamama i soim olsem ol i tingim ol, na ol pikinini i save go long papamama bilong ol i ken holim ol. Tasol Dokta Barbara Staggers, em dairekta bilong haus sik bilong ol pikinini (Children’s Hospital and Research Centre) long Oakland, California, Amerika, em i tok, taim pikinini i go bikpela na skin bilong ol i wok long senis, ol pikinini i no laik pas gut moa wantaim papamama bilong ol. Tasol dispela haptaim em taim we ol papamama i mas tingim gut ol pikinini. Bilong wanem papamama i mas mekim olsem?

Staggers i tok, taim pikinini i go bikpela, ol i gat bikpela haptaim we ol inap bihainim laik bilong ol yet long ol samting, na dispela inap kamapim hevi. Long niuspepa Toronto Star, Staggers i stori olsem long dispela taim “pikinini i wok long kisim save long pasin bilong em yet na olsem wanem em i mas wokabaut. Na tu, long dispela taim ol wanlain inap pulim ol na ol i no wari tumas long wanem samting inap painim ol, olsem na bikpela hevi inap painim ol.” Krismas yet i no makim olsem yangpela i wok long go bikpela, nogat. Staggers i tok, “samting yangpela i mekim, tingim, na traim i soim olsem senis i wok long kamap.” Pastaim ol yangpela bai tingim tumas ol yet tasol, na tingting planti long ol senis i wok long kamap long skin bilong ol, na kirap kwik long mekim ol samting. Bihain ol bai traim ol nupela samting na bai ol i ken kisim save long wanem samting bai kamap. Na laspela hap, yangpela bai bihainim laik bilong em yet.

Taim pikinini i wok long kamap bikpela, em samting bilong amamas, tasol em inap mekim na papamama na pikinini i tingting planti. Staggers em i bin helpim ol yangpela winim 20 yia, em i tok planti yangpela i “mas i gat wanpela man i bikpela pinis i toktok gut wantaim ol, em wanpela husat i save tingim ol.” Olsem wanem ol man i bikpela pinis inap mekim olsem?

Yupela papamama, toktok gut wantaim ol pikinini bilong yupela! Helpim ol long pilim olsem yupela i tingim ol long rot bilong putim gut yau long tok bilong ol. Soim olsem yu tingim ol long rot bilong givim ol askim i helpim ol long wokim gut tingting na luksave long ol hevi inap painim ol taim ol i no tingting gut na makim ol samting long mekim. Stori long ol gutpela samting i save kamap taim ol i tingting gut na makim ol samting long mekim. Helpim ol long save wanem kain ol pasin i gutpela long bihainim.

Ol papamama i no ken bihainim kain tingting olsem pikinini yet i mas lain long stretim ol hevi, dispela inap opim rot bilong ol man nogut i pulim ol long mekim ol pasin i no stret. (Sindaun 13:20) Ol papamama husat i save bihainim tok bilong Baibel ol bai mekim ol samting bilong helpim ol pikinini bilong ol, na ol pikinini bilong ol bai kamap man o meri i gat gutpela tingting. Olsem na ol papamama i mas lain long ‘skulim pikinini bilong ol long bihainim gutpela pasin.’​—⁠Sindaun 22:⁠6.

Buk Rot Bilong Famili i Ken Stap Amamasa i gat ol gutpela tok long pasin bilong toktok gut wantaim ol pikinini na skulim ol. Na tu, buk i kamapim gutpela tok bilong Baibel bilong helpim olgeta wan wan insait long famili.

[Futnot]