Ol Marit i Gat Hevi

“Mi no inap karim moa dispela hevi!” Yu bin harim sampela i tok olsem long marit bilong ol? Sapos yu marit, sampela taim yu bin pilim wankain?

PLANTI tausen marit, taim ol i marit nupela narapela i laikim tru narapela​—⁠o bel bilong ol i kirap na long dispela as ol i marit⁠​—⁠na ol i ting bai ol i stap amamas long olgeta taim. Tasol wanpela meri bilong helpim ol marit em i tok: “Taim ol i kam lukim mi, planti i ting ol i no gat rot moa long i stap amamas. Ol i bel hevi stret long poroman bilong ol, marit bilong ol, pasin laikim, na long laip bilong ol tu.” Planti i no stap wanbel liklik. Wanpela samting tasol i soim olsem tupela i marit​—⁠em pepa bilong marit, na tupela i sindaun long wanpela haus.

Long sampela marit i gat ol hevi olsem, wok skin i gat hatwok long en, ol i mas wok nait, ol i mas wok planti aua, na dispela i mekim na ol i no gat strong long mekim gut long poroman marit bilong ol, maski narapela i laikim tru narapela. Na hevi bilong mani, mekim bikpela long ol pikinini, go sindaun long nupela hap, kisim nupela wok mani, na sik tu, ol inap daunim pasin laikim na rispek. Yumi ken tok ol senis i kamap insait long sampela yia, ol inap kamapim kain hevi i save mekim na tupela marit i no stap wanbel moa.

Planti mama i save mekim tupela wok fultaim​—⁠wok mani na wok bilong haus. Dispela inap mekim na ol i tingim tasol wok mani na wok bilong lukautim ol pikinini, ol i no mekim narapela samting. Ol marit i tingting planti na ol i taiet stret, olsem na ol i no gat taim bilong mekim gut long poroman. Planti marit i pilim olsem ol dispela hevi i wok long daunim ol na ol i no pas gut moa wantaim. I gat wanem as na planti marit i gat ol bikpela hevi olsem? Yu inap mekim wanem na bai marit bilong yu i kamap gutpela na i stap amamas?