Kisim Save Long Koati
DISPELA STORI I KAM LONG BRASIL
PIKSAIM long tingting olsem yu wok long wokabaut aninit long ol diwai na wantu yu lukim wanpela lain koati ol i kam stret long yu. Yu poret na tingting, ol bai kaikai yu o nogat? Tasol no ken pret! Tru ol inap kaikai man, tasol ol i no laik kaikai yu, ol i lukluk tasol long beg yu karim. Olgeta taim ol i save raun painim kaikai. Ol bai kaikai olgeta kain samting em ol i painim, olsem ol liklik snek bilong graun, ol palai, spaida, rat, ol prut, na kiau bilong ol pisin tu.
Koati i gat longpela bodi na longpela tel, na nus bilong em tu i longpela. Longpela bilong bodi em 66 sentimita, na longpela bilong tel em 66 sentimita tu. Dispela animal i save stap long ples hat, long hap bilong saut-wes bilong Yunaitet Stets i go long hap not bilong Ajentina.
Ol meri koati ol i save raun long grup, olsem 20, tasol ol man i save raun wanpis. Long olgeta yia long taim bilong kamapim pikinini, wanpela man tasol bai joinim wanpela grup bilong ol meri. Insait long seven o etpela wik, ol meri koati em ol i gat bel ol bai lusim grup na ol i go wokim ol haus bilong ol long ol diwai. Meri bai karim 3-pela o fopela pikinini. Inap olsem 6-pela wik bihain long ol i karim pinis, ol nupela mama wantaim ol pikinini bilong ol bai go joinim gen grup. Ol pikinini koati ol i luk olsem ol liklik raunpela bal.
Olgeta taim ol koati i save smelim smelim ol samting long win na taim ol i raun aninit long ol diwai ol kapa bilong pinga i save digim digim graun. Ol fama i no save laikim tru ol, long wanem, ol inap bagarapim tru ol gaden kon na ol haus kakaruk. Taim ol man i painim ol koati, ol koati i save long lukautim ol yet na bai ol man i no kisim ol. Ol dispela liklik animal ol i smat na ol i save hait gut long ol ples hait bilong ol antap long ol diwai. Na tu, ol i gat narapela rot bilong ranawe. Taim ol i harim gan i pairap o ol man i paitim han, ol i save pundaun long graun na giaman long dai! Taim man i kam klostu bilong kisim ol, ol i go pinis!
Taim yu kam raun long Brasil, ating bai yu bungim wanpela lain koati. Sapos olsem, no ken pret. Ol i no laik kaikai yu. Tasol ol bai amamas long yu tromoi sampela hap kaikai long ol!