Bikpela Bel Hevi Tru

Nicolle em wanpela helti liklik gel. Tasol long wanpela nait, em i tok het bilong em i pen, na papamama i kisim em i go long haus sik. Long neks nait taim ol nes i was long Nicolle i stap, em i kisim hat atek. Ol i glasim sik bilong em na ol i painimaut olsem em i gat wanpela kain binatang jem we i go pinis long waitlewa, kidni, na lewa bilong em. Insait long 48 aua, Nicolle i dai. Em i gat 3-pela krismas tasol.

TAIM wanpela yumi laikim tumas, em i dai, dispela em i wanpela bikpela bel hevi tru. Sampela taim, yumi ting dispela bel hevi i hatwok tumas long karim. Isabelle, em mama bilong Nicolle, em i tok: “Mi misim tru Nicolle. Mi misim ol hag bilong em, naispela smel bilong em, isipela pasin bilong em, na pasin bilong em long givim mi plaua long olgeta de. Oltaim mi save tingim Nicolle.”

Olsem wanem? Wanpela yu laikim tumas, em i bin dai​—⁠olsem pikinini, poroman marit, brata o susa, papa o mama, o wanpela gutpela pren? Sapos olsem, orait olsem wanem yu inap karim dispela bel hevi?