Taim Mama i Karim Jisas Inap Long Taim Jisas i Dai

God i salim ensel Gebriel i go long wanpela gutpela yangpela meri, em Maria. Ensel i tokim Maria olsem em bai karim wanpela pikinini em bai stap king oltaim. Maria i karim dispela pikinini, Jisas, long haus bilong ol bulmakau na ol wasman bilong sipsip i go lukim em. Bihain, wanpela sta i stiaim ol man bilong hap sankamap i go lukim dispela pikinini. Bai yumi kisim save long husat i putim dispela sta, na olsem wanem Jisas i abrusim bagarap taim ol man i laik kilim em i dai.

Taim Jisas i gat 12-pela krismas, em i toktok wantaim ol tisa long haus lotu. Inap 18 yia bihain, Jisas i kisim baptais, na em i kirapim wok bilong autim tok na skulim ol man long Kingdom, em dispela wok God i salim em i kam long graun bilong mekim. Bilong helpim em long mekim dispela wok, Jisas i makim 12-pela man na ol i kamap aposel bilong em.

Na tu, Jisas i wokim planti mirakel. Long rot bilong sampela liklik pis na bret, em i givim kaikai long planti tausen manmeri. Em i oraitim ol sikman na kirapim bek sampela daiman. Bai yumi kisim save long ol samting i painim Jisas long ol las de bilong em i stap laip, na olsem wanem ol i kilim em i dai. Jisas i autim tok inap 3-pela yia hap, olsem na HAP 6 i stori long ol samting i kamap insait long 34 yia.