Tok i Go Pas

Ol Gutpela Bekim

‘BILONG WANEM papamama i no save pilim tingting bilong mi?’ ‘Gutpela sapos mi kisim drak na dring?’ ‘I stret man na meri i slip wantaim na ol i no marit yet?’ ‘Olsem wanem mi ken save mitupela i givim bel tru?’ ‘Wanem samting bai painim mi long bihain?’

Planti yangpela i gat askim olsem. Tasol ol man i save givim kain kain bekim long ol. Olsem: Sapos yangpela i laik save i gutpela em i dring o nogat, ating papamama bai tok, Nogat, tasol ol yet i save dring. Ol nius na televisen i save kamapim pasin bilong dring olsem em i gutpela samting yu ken mekim. Na ol narapela yangpela i laik kirapim yu long dring. Olsem na planti yangpela i no save, i gutpela ol i dring o nogat.

Ol man bilong wokim nius Kirap!a i laik helpim ol yangpela bai ol i save long stretpela bekim bilong ol dispela askim bilong ol. Olsem na kirap long Septemba 1982 ol i bin putim sampela stori long nius Kirap! bilong helpim ol yangpela, nem bilong ol dispela stori em “Ol Yangpela i Laik Save . . . ” Ol yangpela i kaunim ol dispela tok na ol i amamas tru long en. Wanpela i tok, “Mi save yupela i putim ol dispela stori long wanem yupela i tingim hevi bilong ol yangpela long nau na yupela i laik helpim ol.” Na narapela i tok: “Mi laik tru bai yupela i wok yet long putim ol dispela stori long Kirap! na mi beten bambai yupela inap mekim long olgeta taim.”

Na narapela yangpela i tok: ‘Mi gat 14 krismas pinis na planti samting i laik pulim mipela ol yangpela na i hatwok long mipela i save long ol samting mipela i mas mekim. Olsem na mi amamas long ol dispela stori yupela i save putim bilong helpim ol yangpela. Long olgeta nait mi save tenkyu long God long ol dispela stori.’ Ol dispela stori i no olsem stori bilong ol liklik pikinini. Nogat. Olsem na ol man i bikpela pinis ol tu i amamas long ol dispela stori. Wanpela mama i raitim pas na em i tok: ‘Mi gat 40 krismas, tasol mi amamas tru long ol dispela stori. Ol i helpim tru mipela ol papamama.’ Ol dispela stori i bin helpim tu ol elda Kristen na ol inap save gut long tingting bilong ol yangpela i stap long ol kongrigesen bilong ol Witnes Bilong Jehova, na nau ol elda inap helpim gut ol dispela yangpela.

Olsem wanem na ol yangpela i laikim tru ol dispela stori “Ol Yangpela i Laik Save . . . ”? Long wanem ol dispela stori i helpim tru ol! Ol man bilong raitim ol dispela stori ol i save skelim gut ol tok pastaim. Ol i laik save long tingting tru bilong ol yangpela na ol i bin toktok wantaim planti handet yangpela man na meri long olgeta hap. Ol i kamapim tok bilong ol dispela yangpela long Kirap! Olsem na ol dispela stori long Kirap! i kolim stret hevi bilong ol yangpela na i stori long gutpela rot bilong stretim.

Tasol i gat wanem as tru na ol dispela stori i helpim gut ol yangpela? Em olsem: Ol dispela stori i no kamapim tingting bilong ol man​—ol dispela stori i kamapim tok i tru bilong God long Baibel. Tasol ating yu kirap nogut, long wanem yu ting i no gat sampela tok long Baibel bilong helpim ol yangpela. Tasol Baibel i mekim planti tok bilong helpim ol yangpela. (Lukim Sindaun, sapta 1-7; Efesus 6:​1-3.) God yet i kamapim olgeta tok bilong Baibel na em i save pinis long “olgeta kain laik nogut i save kamap long bel bilong ol yangpela man.” (2 Timoti 2:​20-22; 3:16) Tru, sindaun bilong ol man long nau i senis na i narapela kain long sindaun bilong ol man long taim bilong Baibel, tasol laik nogut bilong ol yangpela i no senis. Olsem na tok bilong Baibel i bilong helpim ol yangpela long nau tu. Taim mipela raitim ol dispela stori na mipela kamapim sampela tok bilong Baibel, mipela mekim olsem mipela i toktok wantaim ol yangpela, na bai ol i no ken ting mipela i sutim tok long ol. Tru mipela i tingim ol yangpela long lain Witnes Bilong Jehova na mipela i raitim ol dispela stori, tasol olgeta man i pilim gutpela tingting i stap long Baibel ol inap amamas long kaunim ol dispela stori.

Planti man i kaunim ol dispela stori “Ol Yangpela i Laik Save . . . ” ol i bin raitim pas na tokim mipela ol i laik bai mipela i bungim sampela bilong ol dispela stori na wokim olsem wanpela buk. Olsem na mipela i kisim sampela tok bilong ol dispela stori na putim insait long dispela buk i gat 39 sapta bilong en. Na mipela putim sampela nupela stori tu. Na mipela i putim planti piksa bilong ol yangpela long dispela buk, em ol i bilong narapela narapela hap na kain kain skin.

Yu ken lukim lista bilong ol stori i stap insait long dispela buk na opim buk stret long stori yu laik save long en. Tasol bihain i gutpela sapos yu kirap long namba wan stori na kaunim buk i go olgeta inap long laspela stori, na opim Baibel na kaunim olgeta tok em buk i makim.

Long sampela famili, papamama na ol pikinini i no save toktok gut wantaim, o ol i no save mekim tumas. Olsem na long dispela buk, long pinis bilong olgeta stori, mipela i putim wanpela hap ol i kolim “Toktok Wantaim long Ol Dispela Askim.” Ol dispela askim i no bilong olgeta wan wan paragraf. Na ol i no bilong papamama i ken sutim long ol pikinini, olsem bilong kotim ol. Nogat. Ol dispela askim i bilong kirapim papamama na ol pikinini long toktok gut wantaim long dispela stori. Planti askim mipela i putim i givim rot long yu long kamapim tingting bilong yu, o sapos yu gat wankain hevi, orait ol dispela askim inap helpim yu long save long rot bilong stretim dispela hevi.

Olsem na ating planti papamama i laik mekim famili-stadi long dispela buk. Ating ol i ken mekim olsem: Olgeta wan wan i ken kaunim ol paragraf, na ol i ken opim Baibel na lukim ol tok bilong Baibel em paragraf i makim. Taim ol i stori pinis long ol paragraf aninit long wanpela het-tok, sapos i gat wanpela askim long pinis bilong sapta em i stret long ol dispela tok, orait ol i ken kamapim long dispela taim, o ol i ken kamapim olgeta askim taim ol i pinisim dispela sapta. Papa i ken kirapim olgeta long kamapim tingting tru i stap long bel bilong ol. Na ating ol yangpela yet bai amamas long toktok wantaim long ol stori bilong dispela buk.

Nau yumi stap long taim bilong “planti hevi nogut tru,” na ol yangpela tu i gat planti hevi. (2 Timoti 3:1) Tasol sapos yu kisim save long tok bilong God long Baibel bai yu inap winim ol dispela hevi. (Buk Song 119:9) Olsem na mipela i amamas long wokim dispela buk bilong yupela. Dispela buk i gat gutpela bekim bilong ol askim yu tingting planti long en, na Baibel i as bilong ol dispela bekim.

Ol Man Bilong Wokim Dispela Buk

[Ol Futnot]