Mas

Baibel i stori tu long ol stretpela man em bihain ol i kamap ol man nogut. Wanpela bilong ol em King Solomon. Ol i bin skulim em gut long ol stretpela pasin na Jehova i blesim em, tasol bihain em i kirap long lotuim ol god giaman. Ol sin bilong em i mekim Jehova i belhat nogut tru na lain Israel i karim ol hevi inap planti handret yia bikos long ol sin bilong em. Baibel i tok taim Solomon i dai em i “slip wantaim ol tumbuna papa bilong em,” em wanpela bilong ol em King Devit. (1 Kin. 11:​5-9, 43, ftn.; 2 Kin. 23:13) Tasol hap ol i planim em long en i makim olsem em bai kirap bek? Baibel i no stori long dispela. Kirap bek em wanpela presen i kam long God i gat pasin laikim. Em bai givim dispela presen long ol man em i laik bai ol i gat rot long lotuim em inap oltaim oltaim. (Jop 14:​13, 14; Jon 6:44) Yu ting Solomon bai kisim dispela presen? Jehova i save long bekim bilong dispela askim, yumi no save. Tasol samting yumi save long en em olsem, Jehova bai mekim stretpela pasin. w24.05 4 par. 9

Taim yumi dediketim laip bilong yumi long Jehova, yumi stap olsem ol gest long haus sel bilong em. Yumi amamas long ol tok bilong strongim bilip yumi save kisim na long stap pren bilong ol narapela em ol tu i stap olsem ol gest bilong Jehova. Haus sel bilong em i no stap long wanpela hap tasol, nogat. Haus sel bilong God i stap long olgeta hap em ol wokman bilong em i stap long en. (Rev. 21:3) Olsem wanem long ol bilip lain em ol i dai pinis? Yu ting i stret long yumi tok olsem ol i stap yet olsem ol gest long haus sel bilong Jehova? Yes! Wai na yumi ken tok olsem? Long tingting bilong Jehova, ol dispela lain i stap laip. Jisas i tok: “Moses yet i kamapim olsem ol man i dai pinis ol bai kirap bek. Long stori bilong liklik nil diwai, em i tok olsem Jehova em i ‘God bilong Abraham na God bilong Aisak na God bilong Jekop.’ Em i no God bilong ol man i dai pinis, nogat, em i God bilong ol man i stap laip, long wanem, long tingting bilong em olgeta i stap laip.”—Luk 20:​37, 38. w24.06 3-4 par. 6-7

Taim Sadok i go long Hebron, em i karim ol samting bilong pait i go wantaim em na em i redi long mekim pait. (1 Sto. 12:38) Em i redi long bihainim Devit i go long pait na em i redi long lukautim lain Israel long ol birua bilong ol. Ating Sadok i no gat bikpela ekspiriens tumas long pait, tasol em i gat pasin bilong strongim bel. Sadok em i wanpela pris, so em i lainim pasin bilong strongim bel long husat? Em i stap namel long ol man em ol i gat strongpela bel na ol i no save pret. I klia tru olsem em i kisim skul long eksampel bilong ol. Olsem, pasin bilong Devit long strongim bel na “lidim ol Israel i go long pait” i kirapim olgeta Israel long givim bel tru long sapotim em. (1 Sto. 11:​1, 2) Oltaim Devit i save wetim Jehova long helpim em taim em i go pait long ol birua. (Sng. 138:3) Sadok i kisim skul tu long ol narapela man i stap wantaim em, olsem Jehoiada na pikinini man bilong em Benaia em man bilong pait, na tu, 22 hetman bilong ol traib em ol i kam helpim Devit.—1 Sto. 11:​22-25; 12:​26-28. w24.07 3 par. 5-6

Sol bilong Tarsus i bin mekim nogut tru long ol disaipel bilong Krais. Planti Kristen i tingim em olsem wanpela man nogut tru na i no gat rot long em bai tanim bel. Tasol Jisas husat i kirap bek pinis, em i no gat wankain tingting olsem bilong ol man. Em na Papa bilong em i lukim ol gutpela pasin bilong Sol. Jisas i tok: “Dispela man i olsem wanpela sospen mi makim.” (Apo. 9:15) Jisas i wokim mirakel bilong helpim Sol long tanim bel. (Apo. 7:58–8:3; 9:​1-9, 17-20) Bihain long Sol em yumi save long em olsem aposel Pol i kamap wanpela Kristen, planti taim em i soim tenkyu bilong em long Jehova na Jisas long tupela i mekim gutpela pasin na pasin marimari long em. (1 Tim. 1:​12-15) Bihain Pol i harim nius nogut olsem kongrigesen long Korin i larim wanpela man i mekim pasin pamuk i stap namel long ol, so hau em i stretim dispela hevi? Pasin em i bihainim long stretim dispela hevi i givim bikpela skul long yumi long pasin laikim Jehova i soim long wanpela taim em i stretim em na as na em i bikpela samting long mekim pasin marimari. w24.08 13 par. 15-16

Inap planti handret yia, isi isi Jehova i wok long kamapim klia hau ol man i gat sin i ken go klostu long em. Abel em namba 2 pikinini man bilong Adam na Iv, em i fes man long bilip long Jehova bihain long pasin bikhet i bin kamap long gaden Iden. Abel i laikim Jehova na em i laik amamasim Em na go klostu long em, olsem na em i givim ofa long em. Abel em i man bilong lukautim ol sipsip, so em i kisim sampela yangpela sipsip na em i kilim ol na givim olsem ofa long Jehova. Jehova i pilim olsem wanem long ofa bilong em? Em i “amamas long Abel na ofa bilong em.” (Stt. 4:4) Jehova i orait long ol wankain ofa em ol narapela bilipman, kain olsem Noa, husat i laikim em na i trastim em i bin givim long em. (Stt. 8:​20, 21) Taim Jehova i orait long ol dispela ofa, em i kamapim klia olsem ol man i gat sin i ken mekim samting bilong amamasim em na go klostu long em. w24.08 3-4 par. 5-6

Yumi inap bel hevi tru taim wanpela i mekim pasin i no stret long yumi. (Ekl. 7:7) Ol gutpela wokman bilong Jehova olsem Jop na Habakuk i bin pilim olsem tu. (Jop 6:​2, 3; Hab. 1:​1-3) Em nomol long yumi bel hevi taim ol narapela i mekim pasin i no stret long yumi, tasol yumi mas was gut long pasin yumi mekim, nogut yumi mekim longlong pasin na mekim hevi i go bikpela moa. Taim yumi lukim olsem ol man i mekim pasin i no stret i abrusim panismen, yumi inap pilim olsem i no gat gutpela samting inap kamap taim yumi mekim stretpela pasin. Tingim wanpela man bilong raitim song, em i lukim olsem laip bilong ol man nogut i wok long kamap gutpela moa, tasol ol stretpela man i karim hevi bilong pasin i no stret em ol dispela man nogut i mekim. Em i tok: “Ol man nogut i olsem, laip bilong ol i no gat hatwok long en.” (Sng. 73:12) Em i bel hevi tru long lukim ol man i mekim pasin i no stret, na dispela i mekim na em i pilim olsem i no gat gutpela samting inap painim em taim em i mekim wok bilong Jehova.—Sng. 73:​14, 16. w24.11 3 par. 5-7

Yumi givim glori long Jehova bikos yumi rispektim em tru. I gat planti risen long yumi rispektim em. Jehova em God i Gat Olgeta Strong na strong bilong em i no gat pinis bilong en. (Sng. 96:​4-7) Bikpela savetingting bilong em i stap ples klia long ol samting em i bin wokim. Em i As bilong laip bilong yumi na em Man Bilong Lukautim laip bilong yumi. (Rev. 4:11) Em i save stap gut long yumi. (Rev. 15:4) Olgeta samting em i mekim i save kamap gutpela tasol, na em i save truim ol tok promis bilong em. (Jos. 23:14) Olsem na i stret profet Jeremaia i mekim dispela tok long Jehova olsem: “Namel long olgeta man i gat savetingting na namel long olgeta gavman bilong ol, i no gat wanpela i olsem yu.” (Jer. 10:​6, 7) Tru tumas, i gat ol gutpela risen long yumi ken rispektim Papa bilong yumi long heven. Yumi rispektim Jehova na bikpela samting moa yumi laikim em tru bikos long ol gutpela pasin bilong em. Na bikpela samting moa, yumi givim glori long Jehova bikos yumi laikim em tru. w25.01 3 par. 5-6

Ol birua bilong God i traim long kirapim yumi long kisim tingting kranki long ol gutpela samting oganaisesen i mekim. Olsem, long rot bilong Baibel yumi kisim save olsem Jehova i laik bai ol man i lotuim em i mas stap klin long bodi, bihainim ol stretpela pasin, na lotuim God long pasin em i orait long en. God i tok sapos wanpela i mekim sin na em i no tanim bel na lusim pasin nogut em i mekim, orait ol i mas rausim em long kongrigesen. (1 Kor. 5:​11, 12; 6:​9, 10) Yumi bihainim dispela tok bilong em i stap long Baibel. Tasol taim yumi mekim olsem, ol birua bilong yumi i sutim tok long yumi olsem yumi no gat pasin laikim, yumi gat hatpela pasin, na yumi no orait long olgeta kain man. Yumi mas luksave long husat em i as bilong ol tok giaman ol man i sutim long oganaisesen. Satan em i as bilong ol stori giaman ol man i mekim long yumi. Em i “papa bilong pasin giaman.” (Jon 8:44; Stt. 3:​1-5) Olsem na yumi save pinis olsem Satan bai yusim ol birua bilong yumi long mekim ol stori giaman long oganaisesen bilong Jehova. w24.04 10-11 par. 13-14

Bihain long traipela hevi tru i kirap, sampela manmeri em ol i lukim “Bikpela Babilon” i bagarap, ol bai tingim olsem inap planti yia pinis ol Witnes Bilong Jehova i bin tokaut long dispela samting bai kamap. Yu ting sampela manmeri husat i lukim ol dispela samting i kamap, ol bai tanim bel na bilip long Jehova? (Rev. 17:5) Sapos ol i mekim olsem, em bai wankain long samting i bin kamap long Isip long taim bilong Moses. Tingim olsem “planti kain kain lain manmeri” i bin joinim lain Israel taim ol i lusim Isip. Ating sampela bilong ol dispela manmeri i kirap long bilip long Jehova taim ol i lukim tok lukaut bilong Moses long Tenpela Bikpela Hevi i kamap tru. (Kis. 12:38) Sapos wankain samting i kamap bihain long Bikpela Babilon i bagarap na pinis olgeta, yu ting yumi bai bel hevi olsem ol manmeri i joinim yumi insait long liklik haptaim tasol paslain long pinis i kamap? Nogat, yumi no inap pilim olsem! Yumi laik bihainim pasin bilong Papa bilong yumi long heven, “em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru.”—Kis. 34:6. w24.05 11 par. 12-13

Wanem samting inap kamap sapos yumi no wok yet long bihainim “astingting bilong ol gutpela tok”? Tingim wanpela eksampel. Long taim bilong ol aposel, wanpela tokwin i raun namel long ol Kristen olsem de bilong Jehova i kamap pinis. Ating i gat wanpela pas em aposel Pol i bin raitim na dispela i mekim na ol Kristen i kisim kain tingting olsem. Sampela Kristen long Tesalonaika i no lusim haptaim long skelim gut dispela tok olsem em i tru o nogat, na ol i bilipim dispela tokwin na ol i karim tu dispela tok i go long ol narapela. Dispela tokwin i no inap paulim tingting bilong ol sapos ol i tingim yet ol tok em Pol i bin skulim ol long en taim em i stap wantaim ol. (2 Tes. 2:​1-5) Pol i givim tok kaunsel long ol Kristen olsem ol i no ken bilipim olgeta tok ol i harim. Na bilong helpim ol long bihain, Pol i pinisim namba 2 pas bilong em long ol Tesalonaika wantaim ol dispela tok olsem: “Mi Pol, mi raitim dispela gude long han bilong mi yet. Em i olsem mak long olgeta pas bilong mi, dispela em i pasin bilong mi long raitim pas.”—2 Tes. 3:17. w24.07 12 par. 13-14

Ol Kristen Hibru i mas i gat pasin bilong sanap strong taim ol samting long Judia i wok long i go nogut na i traim bilip bilong ol. Maski ol man i bin mekim nogut tru long sampela bilong ol Kristen Hibru, planti bilong ol i bin kamap Kristen insait long haptaim we i gat bel isi. Aposel Pol i tok olsem maski ol i sanap strong na karim ol hevi we i traim bilip bilong ol, ol i no karim hevi i go inap long mak bilong dai wankain olsem Jisas bin karim. (Hib. 12:4) Tasol taim lotu Kristen i go bikpela, planti Juda em ol i birua long ol Kristen, ol i belhat nogut tru na ol i mekim nogut moa yet long ol. Sampela yia i go pinis, winim 40 man Juda i bung na ol i tok: “Mipela i mekim wanpela tok tru antap olsem mipela i no ken kisim wanpela liklik kaikai inap long mipela i kilim Pol i dai, na mipela i ken bagarap sapos mipela i no mekim olsem.” (Apo. 22:22; 23:​12-14) Maski ol lotu lain i belhat na ol i heitim tru ol Kristen, ol Kristen i mas wok yet long mekim lotu, autim gutnius, na mekim ol samting bilong stap strong long bilip. w24.09 12 par. 15

Jon em wanpela aposel Jisas Krais i save laikim tru. (Mat. 10:2) Jon i poromanim Jisas long mekim wok autim tok, em i lukim ol mirakel Jisas i wokim, na em i stap wantaim Jisas long taim bilong hevi. Em i lukluk i stap taim ol man i kilim Jisas i dai, na em i lukim em bihain long em i kirap bek. Jon i lukim lotu Kristen i go bikpela long taim bilong em—pastaim ol i stap olsem liklik grup bilong ol man i stap gut long God na bihain ol i go bikpela na “autim dispela gutnius long olgeta hap bilong graun aninit long skai.” (Kol. 1:23) Taim Jon i kamap lapun tru, em i kisim gutpela blesing long raitim sampela tok moa bilong Baibel. “Jisas Krais i kamapim wanpela tok hait” long em na em i raitim ol dispela tok long Buk Revelesen. (Rev. 1:1) Jon i raitim wanpela Gutnius bilong Baibel em Buk Jon. Na tu, holi spirit i kirapim em long raitim 3-pela pas moa. Em i raitim namba 3 pas bilong em i go long wanpela gutpela Kristen, nem bilong em Gaius, em i stap olsem pikinini bilong Jon long sait bilong bilip. (3 Jon 1) Ol tok em dispela bilipman i bin raitim i strongim ol disaipel bilong Jisas i kam inap long taim bilong yumi long nau. w24.11 12 par. 15-16

Maritman husat i save laikim meri bilong em, em i save tingim tru em. Em i tingim meri bilong em olsem wanpela presen i dia tumas i kam long Jehova. (Prov. 18:22; 31:10) Olsem na em i save mekim gutpela pasin na rispektim meri bilong em, na em i mekim olsem tu long taim tupela yet i stap, olsem long taim ol i mekim maritpasin. Em i no inap fosim meri bilong em long mekim olkain maritpasin we i mekim na meri i no pilim gut, i daunim em, o i mekim na maus bilong bel bilong em i gat tok. Maritman tu bai wok strong yet long larim maus bilong bel bilong em i stap klin long ai bilong Jehova. (Apo. 24:16) Ol maritman, yupela i ken save tru olsem Jehova i lukim na em i amamas long olgeta samting yupela i mekim bilong givim ona long meri bilong yupela. Yupela i mas tingting strong long givim ona long meri bilong yupela long rot bilong sakim ol pasin we i no onarim ol na mekim gutpela pasin long ol, rispektim ol, na soim pasin laikim long ol. Taim yupela i mekim olsem, yupela i soim meri bilong yupela olsem yupela i laikim ol na tingim tru ol. Givim ona long meri bilong yupela, na long dispela rot yupela bai lukautim gut nambawan pasin pren yupela i gat—em pasin pren bilong yupela wantaim Jehova.—Sng. 25:14. w25.01 13 par. 17-18

Wanpela samting i mekim na lain bilong Jehova i no wankain long ol lain em ol i tok ol i Kristen, em pasin bilong yumi long givim bel tru long autim tok. Wanem samting inap helpim yumi long wok yet long givim bel tru long autim tok? Yumi inap lainim sampela samting long pasin bilong givim bel tru long wok bilong autim tok taim yumi skelim eksampel bilong Jisas. Taim em i stap long graun, em i no lusim pasin bilong givim bel tru long autim tok. Bihain long sampela haptaim i lus, em i mekim bikpela wok moa bilong autim tok. Jisas i mekim tok piksa long wanpela man bilong lukautim diwai fik i lusim 3-pela yia long lukautim wanpela diwai fik i no karim kaikai. Olsem tasol, Jisas i lusim 3-pela yia samting long autim tok long ol Juda, em planti bilong ol i no putim yau long tok em i autim. Tasol wankain olsem man bilong lukautim diwai fik i no givap long lukautim dispela diwai fik, Jisas i no givap long ol manmeri em i autim tok long ol o lusim dispela wok, nogat. (Luk 13:​6-9) Taim yumi kisim skul long ol tok em i skulim ol man long en na bihainim pasin bilong em, dispela bai helpim yumi long givim bel tru long autim tok long nau. w25.03 14-15 par. 1-4

Olsem wanem sapos yu ting wanpela inap stap olsem gutpela poroman marit bilong yu? Yu ting wantu tasol yu mas tokim em olsem yu laikim em? Baibel i tok man i gat savetingting, em i save kisim save paslain long em i mekim samting. So em i savetingting long yu yet i lusim sampela haptaim long skelim gut wanpela paslain long yu tokim em olsem yu laikim em. Olsem wanem yu yet i ken skelim gut pasin bilong wanpela em yu laik poromanim? Long ol miting bilong kongrigesen o long ol bung bilong amamas, yu inap luksave long pasin bilong dispela man o meri long pas gut wantaim Jehova, ol pasin bilong em yet, na pasin em i mekim long ol narapela. Husat ol pren bilong em, na em i save stori long wanem samting? (Luk 6:45) Ol mak em i laik winim i wankain olsem ol mak em yu laik winim? Yu ken toktok wantaim ol elda long kongrigesen bilong em o ol narapela strongpela Kristen em ol i save gut long em. (Prov. 20:18) Yu ken askim ol olsem dispela man o meri i gat gutnem o nogat, na wanem ol pasin bilong em. (Rut 2:11) Taim yu wok long skelim pasin bilong em, was gut na no ken bihainim bihainim em tumas na mekim em i pilim sem o mekim na em i no pilim gut. Rispektim filings bilong em, na ol samting em yet i laik mekim, na taim em i laik stap em yet. w24.05 22 par. 7-8

Ol elda i bihainim pasin bilong Jisas, na ol i no hariap long kisim tingting olsem man i mekim sin bai no inap tanim bel. Sampela inap tanim bel long fes taim komiti i sindaun wantaim ol, tasol ol narapela bai nidim sampela haptaim moa. So ol elda inap stretim rot bilong bung wantaim sinman sampela taim moa. Bihain long fes taim ol elda i bung wantaim man i mekim sin, ating em bai tingim gen ol tok ol i bin givim long em. Na em inap daunim em yet na askim Jehova long fogivim em. (Sng. 38:18) So taim ol i bung wantaim em gen long narapela taim, pasin bilong em inap senis na i no wankain long pasin em i bin mekim long fes taim ol i bung wantaim em. Bilong helpim sinman long tanim bel, ol elda i soim olsem ol i pilim hevi bilong em na mekim gutpela pasin long em. Ol i bilip na beten olsem Jehova bai blesim hatwok bilong ol, na bai dispela Kristen i mekim sin i ken kisim stretpela tingting na tanim bel.—2 Tim. 2:​25, 26. w24.08 22-23 par. 12-13

Jehova i no laik bai wanpela man i kisim bagarap! Em i laik bai ol sinman i kamap wanbel gen wantaim em. (2 Kor. 5:20) Em risen na long bipo yet na i kam inap long nau, oltaim Jehova i save kirapim ol wokman bilong em, em ol i lusim em long tanim bel na kam bek long em. Ol elda bilong kongrigesen i amamas long stap wanwok bilong Jehova taim ol i wok strong long helpim ol sinman long tanim bel. (Rom 2:4; 1 Kor. 3:9) Tingim amamas i save kamap long heven taim ol sinman i tanim bel! Papa bilong yumi long heven, Jehova, em i save pilim dispela amamas long olgeta taim wanpela sipsip bilong em i bin lus i kam bek long kongrigesen. Pasin bilong yumi long laikim Jehova i kamap strong moa taim yumi tingim tingim long bel pasin sori, pasin marimari, na bikpela pasin helpim bilong em.—Luk 1:78. w24.08 31 par. 16-17

Sapos Jisas i bin larim ol manmeri i mekim em i kamap king, em bai larim em yet i insait long wok politik bilong ol Juda, em ol i aninit long wok bos bilong Gavman Rom. Jisas i ‘lusim dispela hap na em i go long maunten.’ Maski ol narapela i putim presa long em, em i no insait long wok politik. Dispela i stap olsem gutpela skul long yumi! Em tru olsem ol narapela i no inap askim yumi long wokim mirakel na kamapim planti kaikai o oraitim ol sikman, na tu, ol i no inap traim long mekim yumi kamap king o bikman bilong wanpela kantri. Tasol ol inap kirapim yumi long insait long wok politik long rot bilong votim wanpela o mekim ol tok bilong sapotim wanpela we ol i ting olsem em inap mekim ol samting i kamap orait. Tasol eksampel bilong Jisas em i klia. Em i no laik insait long ol wok politik, na bihain em i tok olsem: “Kingdom bilong mi i no bilong dispela graun.” (Jon 17:14; 18:36) Ol Kristen long nau i mas bihainim tingting na pasin bilong Jisas. Yumi save sapotim dispela Kingdom, autim tok long en, na beten long dispela Kingdom i mas i kam.—Mat. 6:10. w24.12 4-5 par. 5-6

Taim yu stadi, painim ol rot bilong bihainim ol tok yu lainim. Olsem, bihainim stretpela pasin bilong Jehova long rot bilong mekim pasin i fea long olgeta manmeri. Bihainim pasin bilong Jisas long laikim Papa bilong em na laikim ol narapela long rot bilong redi long karim hevi na sambai long gutnem bilong Jehova na oltaim redi long helpim ol narapela wanbilip Kristen. Na tu, bihainim pasin bilong Jisas long autim tok long ol narapela na bai ol tu i gat rot bilong soim tenkyu bilong ol long nambawan gutpela presen Jehova i givim. Taim yumi kliagut tru na pilim tru pe bilong baim bek man, pasin bilong yumi long laikim Jehova na Pikinini bilong em bai kamap strong moa. Taim yumi wok long laikim ol, ol bai laikim yumi moa yet. (Jems 4:8) So yumi ken yusim ol samting Jehova i givim long yumi bilong wok yet long kisim save long pe bilong baim bek man. w25.01 25 par. 16-17

Yumi inap tanim teks bilong nau olsem: “Yu rausim olgeta sin bilong mi long ai bilong yu.” Dispela tok piksa i soim klia olsem Jehova i save kisim ol sin bilong ol man i tanim bel na em i tromoi i go na em i no stap moa long ai bilong em. Yumi inap tanim dispela tok tu olsem: “Yu rausim [ol sin bilong mi] i go na i olsem mi no bin mekim.” Baibel i stori moa long dispela poin long narapela tok piksa i stap long Maika 7:​18, 19. Ol dispela ves i tok i olsem Jehova i tromoi olgeta sin bilong yumi i go daun tru long solwara. Long bipo, i no gat wanpela man inap kisim bek wanpela samting ol i tromoi i go daun tru long solwara. Ol dispela tok piksa i skulim yumi olsem Jehova i save lusim olgeta ol rong bilong yumi, so i no gat wok long bel i kotim yumi yet long ol rong yumi bin mekim. Olsem Devit i bin tok: “Ol man em ol i bin brukim ol lo na God i fogivim ol na i karamapim sin bilong ol, ol i ken amamas.” (Rom 4:7) Tru tumas, Jehova i gat pasin bilong lusim rong olgeta! w25.02 9 par. 7-8

I gat wanpela paradais i stap long graun long nau na em i pulap long ol manmeri em ol i givim bel tru long mekim planti gutpela wok. Ol manmeri i stap long dispela paradais i stap bel isi tru. Ol i tingting strong long ol i no ken tru lusim dispela ples. Na ol i laik bai planti manmeri moa i joinim ol na stap long dispela naispela ples. Wanem dispela paradais? Em paradais bilong bilip! Samting i narakain em olsem, Jehova i kamapim wanpela oganaisesen i olsem ples paradais em lain bilong em i insait long en na ol i stap bel isi na stap wanbel wantaim, maski ol i stap namel long ol man em Satan i stiaim ol long heitim ol narapela na mekim ol pasin i nogut tru. (1 Jon 5:19; Rev. 12:12) God bilong yumi i lukim olsem wanem ol pasin nogut bilong nau i bagarapim bel na tingting bilong ol manmeri, tasol em i helpim ol wokman bilong em long pilim olsem ol i stap gut na bai ol i ken amamas long mekim yet wok bilong em. Baibel i stori long paradais bilong bilip olsem wanpela “ples hait” we ol man i ken stap seif long en na wanpela “gaden i gat planti wara.” (Ais. 4:6; 58:11) Jehova i blesim ol lain i stap insait long dispela paradais, olsem na ol i stap amamas na stap gut long dispela taim bilong las de i gat hatwok bilong en.—Ais. 54:14; 2 Tim. 3:1. w24.04 20 par. 1-2

Sapos yu tingting long marit, ating yu bin beten long painim wanpela poroman marit. Em tru olsem, Jehova i no promis long husat bai maritim husat. Tasol em i tingim tru samting yu nidim na filings bilong yu, na em inap helpim yu taim yu wok long painim wanpela poroman marit. So wok yet long tokim em long ol laik na filings bilong yu. (Sng. 62:8) Beten long kisim pasin bilong i no les kwik na savetingting. (Jems 1:5) Sapos nau yet yu no painim wanpela poroman i stret long yu bilong maritim, Jehova i tok promis olsem em bai wok yet long lukautim yu long sait bilong skin na bel na tingting. (Sng. 55:22) Wanpela tok lukaut bilong tingim em olsem: No ken larim pasin bilong painim wanpela poroman i kisim bikpela haptaim na strong bilong yu. (Fili. 1:10) Sapos yu marit, dispela tasol i no inap mekim yu stap amamas, nogat. Pasin pren bilong yu wantaim Jehova bai mekim yu stap amamas tru. (Mat. 5:3) Na taim yu stap singel, yu stap fri long mekim bikpela wok moa bilong autim tok. (1 Kor. 7:​32, 33) Yusim gut dispela haptaim. w24.05 21 par. 4; 22 par. 6

Yutupela i mas pren i go inap long wanem taim? Taim wanpela i hariap long mekim ol disisen, em inap bungim hevi. (Prov. 21:5) Olsem na yutupela i mas pren i go inap long yutupela i save gut long narapela narapela. Tasol yutupela i no ken pren longpela taim tru sapos i no gat gutpela risen long mekim olsem. Baibel i tok: “Samting man i ekspektim na i no kamap, dispela i save mekim man i bel hevi.” (Prov. 13:12) Ol narapela i ken mekim wanem sapos ol i save olsem tupela man na meri i pren? Yumi ken invaitim ol long kaikai wantaim yumi, joinim yumi long taim bilong famili lotu, o bung wantaim yumi bilong kisim amamas. (Rom 12:13) Olsem wanem? Ol i nidim wanpela long raun wantaim ol, helpim ol long sait bilong trenspot, o wanpela ples we tupela i ken toktok gut wantaim? Sapos olsem, yu ting yu inap helpim ol? (Gal. 6:10) Sapos tupela man na meri i pren i askim yu long raun wantaim ol, orait dispela em gutpela rot yu inap helpim ol. Tasol was gut olsem yu no ken lusim tupela yet i stap, na tu, luksave long wanem taim i stret long yu ken lusim tupela inap liklik haptaim bambai ol i ken toktok long sampela pesenel samting. w24.05 30-31 par. 13-14

Ol elda i save traim long kisim save long wanem ol pasin o disisen i kirapim man long mekim sin. Olsem wanem? Isi isi dispela Kristen i kamap slek long bilip bikos em i lusim pasin bilong mekim pesenel stadi o em i lusim wok autim tok? Em i lusim pasin bilong beten oltaim long Jehova o em i wok long kolim nating ol tok long beten? Em i wok long larim ol laik nogut i stiaim bel na tingting bilong em? Em i bin raun wantaim ol poroman nogut o makim ol amamas i no stret? Ol dispela disisen bilong em i mekim wanem long bel na tingting bilong em? Em i luksave olsem ol disisen na ol pasin bilong em i mekim Papa bilong em Jehova i bel hevi? Taim ol i givim ol gutpela askim olsem na ol i no givim ol pesenel askim long em long ol samting ol i no gat wok long save long en, ol bai helpim man i mekim sin long kamapim tingting i stap long bel bilong em na long tingim ol samting we i bagarapim pasin pren bilong em wantaim Jehova. (Prov. 20:5) Na tu, ol inap yusim ol tok piksa bilong helpim em long wokim gut tingting na helpim em long luksave long rong em i mekim. Long fes taim ol i bung wantaim em, ating sinman bai bel hevi tru long rong em i bin mekim. Na ating em inap tanim bel. w24.08 22 par. 9-11

Jisas i givim bel tru long autim “gutnius bilong Kingdom” bikos em i save olsem dispela em wok God i laik em i mas mekim. Jisas i putim wok autim tok i stap nambawan samting long laip bilong em. Long ol laspela mun bilong em long mekim wok autim tok, em i go “long ol bikpela taun na ol liklik taun” na em i wok long skulim ol narapela. (Luk 13:22) Na tu, em i trenim sampela moa disaipel long mekim wok autim tok wantaim em. (Luk 10:1) Long nau tu, wok bilong autim gutnius em i nambawan bikpela wok Jehova na Jisas i laik yumi mas mekim. (Mat. 24:14; 28:​19, 20) Yumi ken strongim pasin bilong givim bel tru long autim tok taim yumi tingim ol manmeri olsem Jehova i tingim ol. Em i laik bai planti manmeri moa i harim gutnius na bihainim dispela tok. (1 Tim. 2:​3, 4) Dispela gutnius inap seivim laip bilong ol manmeri, olsem na Jehova i trenim yumi long kamap gutpela moa long pasin bilong yumi long toktok wantaim ol man. Maski sapos ol man i no laik putim yau long nau, bihain rot inap op long ol i kisim tok i tru paslain long traipela hevi tru i pinis. w25.03 15-16 par. 5-7

Wan wan Kristen yet i ken yusim maus bilong bel bilong ol em Baibel i skulim pinis long makim pasin em bai mekim long wanpela em i seperet long kongrigesen. Sampela inap pilim olsem em orait long gritim em o welkamim em long taim em i kam long miting. Tasol yumi no inap stori planti wantaim em o lusim sampela haptaim long mekim ol narapela samting wantaim em. Sampela inap ting olsem, ‘Baibel i tok olsem sapos wanpela Kristen i tok gude long wanpela sinman, em i poromanim em long ol wok nogut bilong em.’ (2 Jon 9-11) Ol tok i stap paslain na bihain long dispela skripsa i soim olsem dispela tok i makim ol apostet na ol man em ol i wok yet long kirapim ol narapela long mekim ol pasin nogut. (Rev. 2:20) Olsem na sapos wanpela i kirapim ol narapela long bihainim ol tok bilong ol apostet o sapotim ol narapela pasin nogut, ol elda i no inap stretim rot long i go visitim em. Em tru olsem, i gat hop olsem dispela man inap tanim bel. Tasol sapos em i no mekim olsem yet, orait yumi no inap tok gude long kain man olsem o invaitim em long miting bilong kongrigesen. w24.08 30-31 par. 14-15

Bihain long Jisas i givim kaikai long bikpela lain manmeri, em i tokim ol aposel bilong em long kalap long bot na lusim dispela hap na go bek long Kaperneam na em i go antap long maunten, em i mekim olsem bai ol manmeri i no ken mekim em i kamap king. (Jon 6:​16-20) Taim ol aposel i seil i go, strongpela win i kamap na i mekim wara i no stap isi. Bihain, Jisas i wokabaut antap long wara na em i kam long ol. Na em i tokim aposel Pita long wokabaut antap long wara tu. (Mat. 14:​22-31) Taim Jisas i go insait long bot, win i stop. Ol disaipel i kirap nogut na ol i tok: “Tru tumas, yu Pikinini Bilong God.” (Mat. 14:33) Em narapela kain olsem ol disaipel i mekim dispela tok bihain long Jisas i wokabaut antap long wara, na i no bihain long em i wokim mirakel long bret. Mak i mekim dispela tok olsem: “[Ol aposel] i kirap nogut tru long dispela samting, long wanem, ol i no kisimgut mining bilong bret em i bin tilim.” (Mak 6:​50-52) Ol i no luksave olsem Jehova i givim bikpela strong long Jisas long wokim ol mirakel. w24.12 5 par. 7

Yumi ken soim olsem yumi pilim tru pasin laikim bilong Jehova taim yumi yusim haptaim bilong Memorial long soim olsem yumi tenkyu long pe bilong baim bek man. Yumi ken stretim ol samting na bai yumi go long Memorial, na tu, yumi ken invaitim ol narapela long kam long dispela spesel bung. Eksplenim long ol lain em yu invaitim ol long wanem samting bai kamap long Memorial. Yu ken soim long ol dispela tupela vidio, Bilong Wanem Jisas i Dai? na Tingim Dai Bilong Jisas long jw.org. Ol elda i mas invaitim ol pablisa i lusim wok autim tok na miting inap longpela taim. Tingim bikpela amamas i kamap long heven na long graun taim sampela sipsip bilong Jehova em ol i lus, ol i kam bung gen wantaim bikpela lain sipsip bilong em! (Luk 15:​4-7) Long taim bilong Memorial, yumi mas gritim narapela narapela, na tu, gritim ol nupela lain o ol lain em ol i no kam long Memorial inap longpela taim. Yumi laik bai ol i pilim olsem ol i welkam long dispela bung!—Rom 12:13. w25.01 29, 31 par. 15

Pe bilong baim bek man i helpim yumi long kliagut olsem pasin bilong Jehova i stret olgeta, tasol bikpela samting moa, em i helpim yumi long pilim tru pasin laikim bilong em. (Jon 3:16; 1 Jon 4:​9, 10) Jehova i givim pe bilong baim bek man, na bai yumi ken kisim laip oltaim na bai yumi ken insait long famili bilong em. Tingim: Taim Adam i mekim sin, Jehova i rausim em long famili bilong Em. Dispela em as na yumi olgeta i bin bon ausait long famili bilong God. Tasol long rot bilong pe bilong baim bek man, Jehova i fogivim ol sin bilong yumi na bihain em bai bringim olgeta manmeri bilong graun i go insait long famili bilong em, em ol manmeri husat i bilip long em na bihainim tok bilong em. Long nau yet, yumi ken pas gut wantaim Jehova na ol wanbilip bilong yumi. Tru tumas, yumi ken save tru olsem Jehova i laikim yumi olgeta!—Rom 5:​10, 11. w25.01 21-22 par. 6

Tru tumas, yu bai wanbel long tok olsem pe bilong baim bek man em nambawan gutpela presen tru! (2 Kor. 9:15) Taim Jisas i stap long graun, em i givim laip bilong em olsem ofa na dispela i opim rot long yu inap kamap pren bilong God Jehova. Na tu, yu ken wet long kisim laip oltaim long bihain. So i stret long yumi tenkyu long pe bilong baim bek man na tenkyu long Jehova olsem pasin laikim i kirapim em long givim dispela ofa! (Rom 5:8) Jisas i kamapim bung bilong Memorial bilong tingim dai bilong em long olgeta yia bilong helpim yumi long soim yet tenkyu bilong yumi na yumi no tingim dispela ofa olsem wanpela samting nating. (Luk 22:19) Long dispela yia, yumi bai mekim Memorial long Fonde, Epril 2, 2026. Yumi olgeta i luk fowed long go long dispela bung. Yumi bai kisim gutpela helpim sapos yumi yusim dispela haptaim bilong Memorial long tingim tingim long bel samting Jehova na Pikinini bilong em i mekim bilong helpim yumi. w25.01 20 par. 1-2

Yu ken wok yet long lain long pasin bilong God Jehova na Krais Jisas long laikim yumi sapos yu wok yet long tingim tingim long bel ol samting ol i mekim bilong helpim yu. Ating long haptaim bilong Memorial bilong dispela yia, yu ken lusim haptaim long ritim gut wanpela o sampela bilong Ol Gutnius. No ken traim long ritim planti tok tumas insait long sotpela haptaim. I gutpela long yu ritim isi isi na tingim ol risen we i ken kirapim yu long laikim moa yet Jehova na Jisas. Sapos yu bin stap long tok i tru inap planti yia, ating bai yu ting olsem i no gat wok moa long yu kisim sampela save moa long ol bilip yu save pinis long en olsem stretpela pasin bilong God, pasin laikim bilong em, na pe bilong baim bek man. Tasol tru tru, yumi olgeta inap kisim sampela save moa long ol dispela topik na ol narapela topik tu. So mekim gutpela wok long planti gutpela tok i stap long ol pablikesen bilong yumi em Baibel i as bilong en. w25.01 24-25 par. 13-15