Epril

Bilong yumi ken kisim helpim long bodi na blut bilong Jisas, yumi mas bilip long dispela pe bilong baim bek ol man. (Efe. 1:7) Ol manmeri em Jisas i kolim ol olsem “ol arapela sipsip” ol i no save kisim bret na wain long Kaikai Bilong Bikpela em yumi save mekim long olgeta yia. (Jon 10:16) Maski i olsem, bodi na blut bilong Jisas Krais i helpim ol tu. Ol bai kisim dispela helpim taim ol i bilip long pe bilong ofa bilong em long baim bek ol manmeri. (Jon 6:53) Tasol ol manmeri em ol i kisim bret na wain, ol i kamapim klia olsem ol i insait long nupela kontrak na ol bai mekim wok king wantaim Jisas long Kingdom bilong heven. So maski yumi bilong lain God i bin makim o lain arapela sipsip, em i bikpela samting long yumi mas bilip na bai yumi kisim laip oltaim. w24.12 13 par. 14, 16

Long Kaikai Bilong Bikpela, Jisas i tilim bret i no gat yis long ol aposel bilong em na em i tokim ol olsem dispela i makim bodi bilong em. Na bihain em i givim wain long ol na em i tok dispela i makim “blut bilong mi i strongim kontrak.” (Mak 14:​22-25; Luk 22:20; 1 Kor. 11:24) Dispela nupela kontrak em i mekim em “kontrak wantaim lain Israel” husat bai stap wantaim em long “Kingdom Bilong God.” (Hib. 8:​6, 10; 9:15) Tok Jisas i mekim long Kaikai Bilong Bikpela i go tasol long dispela “liklik lain sipsip.” Ol dispela aposel i stap wantaim em long rum, ol i fes lain long insait long dispela liklik grup. Em ol dispela lain tasol bai stap wantaim Jisas long heven. w24.12 11 par. 9-10

Wanpela disaipel bilong Jisas i putim em long han bilong ol birua na ol i arestim em, toknogutim em, bagarapim gutnem bilong em, kotim em, na ol i givim bikpela pen long em. Ol soldia i kisim em i go long hap we ol bai kilim em i dai long en na ol i nilim em antap long diwai pos. Taim em i wok long karim olgeta dispela pen na hevi, i gat wanpela Man i pilim bikpela bel pen tru. Em God Jehova. Maski em i gat bikpela strong tru, em i holim bek strong bilong em na em i no mekim wanpela samting bilong helpim Pikinini bilong em. Wai em i mekim olsem? Em pasin laikim tasol. Ofa bilong Jisas em i nambawan evidens i kamapim klia olsem Jehova i laikim yu tru. Em i givim Pikinini bilong em olsem ofa na em i redi long pilim bikpela bel pen tru bambai em i ken seivim yu long sin na dai. (1 Jon 4:​9, 10) Tru tumas, em i laik helpim yumi olgeta wan wan long pait long daunim sin, na winim dispela pait! w24.08 6 par. 13-14

Yumi ken kliagut olsem Jehova i laikim yumi tru taim yumi tingim bikpela bel pen em i pilim long lukim Pikinini bilong em i karim pen na hevi bilong givim ofa bilong baim bek yumi. Satan i tok wokman bilong God bai i no stap gut long God taim em i karim wanpela hevi. Bilong pruvim olsem tok bilong Satan i giaman, Jehova i larim Pikinini bilong em i karim bikpela pen na hevi paslain long em i dai. (Jop 2:​1-5) Jehova i lukluk i stap taim ol bikman bilong lotu em ol i birua long Jisas ol i tok bilas long em, na ol soldia i wipim em, na ol i nilim em long diwai pos. Na Jehova i lukluk yet i stap taim Pikinini bilong em i karim bikpela pen tru na dai. (Mat. 27:​28-31, 39) Jehova i gat strong bilong stopim dispela samting long kamap long dispela taim stret. (Mat. 27:​42, 43) Tasol sapos God i bin mekim samting bilong kisim bek Pikinini bilong em long dispela taim stret, em bai i no givim pe bilong baim bek man na yumi bai no gat gutpela samting bilong wetim i kamap bihain. So Jehova i larim Pikinini bilong em i karim bikpela pen na hevi inap long em i pulim laspela win bilong em. w25.01 22 par. 7

Em Nisan 16, 33 C.E. Ol disaipel bilong Jisas i pilim bikpela bel sori tru na ol i pret tu. Tupela disaipel i lusim Jerusalem na ol i wokabaut i go long Emeus. Wanpela man i kam bungim ol na wokabaut wantaim ol. Tupela disaipel i stori long dispela man long bel hevi ol i pilim long samting i kamap long Jisas. Dispela man i stori wantaim ol long sampela tok we tupela bai i no inap lusim tingting long en. “Em i stat long ol rait bilong Moses na ol Profet” na em i stori long risen na Mesaia i mas karim pen na hevi na dai. Taim dispela 3-pela man i go kamap long Emeus, man i kam wokabaut wantaim ol i tokaut long em yet i husat—em Jisas husat i kirap bek pinis! (Luk 24:​13-35) Jisas i kamap long ol disaipel bilong em planti taim insait long dispela laspela 40 de bilong em long graun. Long dispela haptaim, ol disaipel bilong Jisas em pastaim ol i bel sori na pret nogut tru, nau ol i kisim bikpela amamas tru, ol i gat strongpela bel, na ol i redi long autim gutnius bilong Kingdom na skulim ol man. w24.10 12 par. 1-3

Taim yumi liklik, em nomol long yumi gro na kamap bikpela insait long sampela yia na em samting i save kamap nating. Tasol bilong kamap bikpela long sait bilong bilip, yumi mas mekim sampela samting na yumi no stap nating tasol. Olsem, ol bratasista long Korin i harim na bihainim gutnius, ol i kisim baptais, kisim holi spirit, na kisim helpim long ol tok aposel Pol i skulim ol long en. (Apo. 18:​8-11) Maski i olsem, sampela yia bihain long ol i kisim baptais, planti bilong ol i no strong yet long bilip. (1 Kor. 3:2) Bilong kamap strong long bilip, pastaim yumi mas kisim dispela laik bilong mekim olsem. Ol lain husat i “laikim pasin bilong sot long save” na ol i laik stap olsem pikinini yet long sait bilong bilip, ol bai no inap mekim ol samting bilong kamap strong long bilip. (Prov. 1:22) Yumi no laik kamap olsem ol man na meri em ol i bikpela pinis, tasol ol i wok yet long larim papamama bilong ol i mekim ol disisen bilong ol, nogat. Yumi yet i laik mekim ol samting bilong kamap strong long bilip. Sapos yu wok yet long mekim ol samting bilong kamap strong long bilip, orait beten askim Jehova long givim yu “dispela laik na strong long mekim ol samting em yet i laikim.”—Fili. 2:13. w24.04 4 par. 9-10

Jehova i save tokaut long em i pilim olsem wanem long pasin bilong em long kotim ol manmeri. (Ese. 33:11) Jehova i no save hariap long bagarapim ol man inap oltaim. Em i gat bikpela pasin marimari, na em i save mekim pasin marimari long ol man taim i stret long mekim olsem. Yumi save long wanem samting long ol man em God bai no inap kirapim bek ol? Baibel i stori long sampela eksampel tasol. Ol tok Jisas i mekim i soim olsem Judas Iskariot i no inap kirap bek. (Mak 14:21; lukim tu Jon 17:12 na stadi nout long Inglis Baibel.) Judas i save olsem pasin em i mekim long God Jehova na Pikinini bilong Em i no stret, tasol long laik bilong em yet em i go het na mekim olsem. (Lukim Mak 3:29 na ol stadi nout long Inglis Baibel.) Olsem tasol, Jisas i tok sampela hetman bilong lotu em ol i birua long em, bai i no gat kirap bek bilong ol. (Mat. 23:33; lukim Jon 19:11 na stadi nout “the man” long Inglis Baibel.) Na Aposel Pol i givim tok lukaut olsem ol apostet em ol i no tanim bel, ol tu bai i no inap kirap bek.—Hib. 6:​4-8; 10:29. w24.05 4 par. 10-11

Taim yumi pas gut yet wantaim Jehova, Satan i no inap mekim wanpela samting we inap bagarapim yumi inap oltaim oltaim. (1 Jon 3:8) Long nupela taim, Jehova bai wok yet long lukautim ol gutpela pren bilong em long ol samting inap bagarapim bilip bilong ol, na tu, long dai. (Rev. 21:4) Tru tumas, em gutpela blesing tru long stap olsem gest long haus sel bilong Jehova, yumi ken pas gut wantaim em inap oltaim oltaim. (Ese. 37:27) Yumi mas mekim wanem sapos yumi laik stap yet olsem ol gest bilong em? Sapos wanpela i invaitim yu long i go long haus bilong em, ating yu bai laik save long wanem ol samting em i laik bai yu mekim. Olsem tasol, yumi laik save long ol samting em Jehova i laik bai ol gest bilong em i ken mekim bilong stap yet olsem ol gest bilong em. Yumi laikim Jehova, na dispela i kirapim yumi long mekim olgeta samting yumi inap mekim bilong “amamasim em.” (Kol. 1:10) Oltaim yumi mas tingim dispela na soim bikpela rispek tru long em. Taim yumi rispek tru long em, dispela bai helpim yumi long sakim ol pasin em i no orait long en. Tru tumas, yumi laik “mekim pasin daun taim [yumi] wokabaut” wantaim God bilong yumi.—Mai. 6:8. w24.06 4 par. 8-9

Jehova i askim Abraham long givim pikinini man bilong em Aisak olsem ofa. Abraham i pilim hatwok tru long mekim dispela samting Jehova i tokim em long mekim. Maski i olsem, em i redi long bihainim tok bilong Jehova na mekim olsem. Tasol klostu stret long taim Abraham i laik kilim Aisak i dai, God i stopim em long mekim olsem. Dispela eksampel i skulim olgeta bilipman na bilipmeri long wanpela bikpela tok i tru olsem, Jehova bai redi long givim Pikinini em i laikim tumas olsem ofa. Dispela i soim klia pasin bilong Jehova long laikim tru ol manmeri. (Stt. 22:​1-18) Planti handret yia bihain, Lo em God i givim long lain Israel i tokaut olsem ol i mas mekim planti sakrifais bilong karamapim sin bilong ol manmeri bilong God. (Wkp. 4:​27-29; 17:11) Ol kain sakrifais i olsem piksa na i makim wanpela sakrifais i gutpela moa we bai seivim olgeta manmeri long sin. God i kirapim ol profet bilong em long tokaut olsem ol man bai mekim nogut long dispela promis pikinini, em Pikinini Bilong God, na ol bai kilim em i dai bilong em i ken seivim olgeta manmeri, na yu tu, long sin na dai!—Ais. 53:​1-12. w24.08 4 par. 7-8

Taim yu ritim Baibel, i gutpela yu luksave long ol rot yu ken bihainim ol tok yu ritim. Taim yu ritim wanpela tok long Baibel, askim yu yet, ‘Hau mi ken bihainim dispela tok long nau o long bihain?’ Olsem, piksaim long tingting olsem yu ritim 1 Tesalonaika 5:​17, 18. Bihain long yu ritim dispela tupela ves, yu ken stop na tingim olsem, yu save beten planti taim o nogat, na taim yu beten yu save kolim stret ol samting yu pilim long bel o nogat. Na tu, yu ken tingim ol samting yu amamas long en. Ating yu laik tok tenkyu long Jehova long 3-pela samting. Maski yu lusim sampela minit tasol long putim tingting olgeta long ol tok yu ritim, dispela bai helpim yu long kamap olsem man bilong harim na bihainim Tok Bilong God. Tingim helpim yu inap kisim taim yu bihainim wankain pasin long olgeta taim yu ritim wanpela hap bilong Baibel! Taim yu mekim olsem, yu bai kamap olsem man bilong bihainim Tok Bilong God. w24.09 4-5 par. 9-10

Taim Jehova i wokim yumi, em i putim wanpela gutpela pasin long yumi. Maski yumi save amamas taim yumi kisim samting, yumi save kisim bikpela amamas moa taim yumi givim samting long ol narapela. Yumi save pilim gut taim yumi helpim ol wanbilip bilong yumi. Na yumi save amamas taim ol i soim tenkyu bilong ol. Tasol maski man i kisim samting em i tok tenkyu o nogat, yumi ken amamas olsem yumi mekim rait samting. No ken lusim tingting olsem taim yu givim samting long ol narapela, “Jehova inap givim yu planti [samting] moa.” (2 Sto. 25:9) Yumi no inap winim pasin bilong Jehova long givim ol samting long yumi! Na yumi save kisim bikpela amamas moa taim Jehova yet i bekim ol samting yumi givim. Olsem na yumi ken tingting strong long wok yet long bihainim pasin bilong Papa bilong yumi long heven long amamas long givim ol samting long ol narapela. w24.09 31 par. 20-21

Jehova i gat pasin marimari na pasin sori. (Sng. 103:13; Ais. 49:15) Em i save pilim tru ol hevi bilong yumi na taim yumi bel hevi, em i save pilim tu bel hevi bilong yumi. (Sek. 2:8) Em i mekim na yumi pilim isi moa long go klostu long em olsem wanpela Pren. (Sng. 25:14; Apo. 17:27) Na em i gat pasin daun, na “em i save lindaun na lukluk long heven na graun, na em i save litimapim man i no gat nem i stap long das.” (Sng. 113:​6, 7) Tru tumas, olgeta dispela risen i mekim na yumi laik givim glori long gutpela God bilong yumi! Yumi givim glori long Jehova bikos yumi laik bai ol narapela i save long em. Planti man i no gat stretpela save long Jehova. Bilong wanem? Long wanem, Satan i bin pasim tingting bilong ol manmeri long rot bilong mekim ol tok giaman long Em. (2 Kor. 4:4) Satan i kirapim ol man long bilip olsem Jehova em man bilong bekim rong, em i no save tingim ol narapela, na em i as bilong planti pen na hevi yumi karim. Tasol yumi gat stretpela save long God bilong yumi! Yumi gat rot long helpim ol manmeri long kisim stretpela save long em na long dispela rot yumi givim glori long em.—Ais. 43:10. w25.01 3-4 par. 6-7

Long taim bilong Jisas na long taim bilong ol aposel, ol man i stap long sait bilong Satan i mekim planti tok giaman long Pikinini Bilong God, em man i gutpela olgeta na em i bin wokim planti mirakel. Olsem, ol hetman bilong lotu i tokim ol manmeri olsem Jisas i rausim ol spirit nogut long strong bilong “hetman bilong ol spirit nogut.” (Mak 3:22) Taim Jisas i sanap long kot, ol bikman bilong lotu i sutim tok long em olsem em i tok bilas long God na ol i kirapim bikpela lain manmeri long singaut olsem kilim Jisas i dai. (Mat. 27:20) Bihain, taim ol disaipel bilong Krais i autim gutnius, ol birua bilong ol i “kirapim ol manmeri . . . long kisim tingting nogut” long ol dispela Kristen na mekim nogut long ol. (Apo. 14:​2, 19) Wastaua bilong Disemba 1, 1998 i stori long tok bilong Aposel 14:2 olsem: “Ol Juda i no bilip ol i sakim tok [Pol na Barnabas] i autim, tasol i no dispela samting tasol ol i mekim—ol i kirap na sutim ol tok giaman long ol Kristen na bai ol man bilong ol narapela lain i bel nogut long ol.” Long nau, Satan i wok yet long “giamanim olgeta manmeri bilong graun.” w24.04 11 par. 15-16

Wanem taim man i dai, dispela i no inap makim olsem em bai stap laip oltaim long bihain o nogat. Jehova em Jas i gutpela olgeta, so em i save mekim ol disisen we i stret na i fea. (Sng. 33:​4, 5) Yumi ken bilip tru olsem “Jas bilong graun olgeta” bai mekim stretpela pasin. Na tu, i stret long tok olsem wanem ples man i stap long en, dispela bai i no makim olsem em bai stap laip oltaim, o nogat. Planti milion manmeri i stap long ol kantri we i no gat rot long ol i harim gutnius bilong Kingdom, olsem na Jehova bai i no inap kolim ol nating olsem “ol meme.” (Mat. 25:46) Stretpela Jas bilong graun olgeta i tingim tru olgeta wan wan bilong ol dispela manmeri, winim tingting yumi gat long ol. Yumi no save long hau Jehova bai stiaim ol samting i kamap long taim bilong traipela hevi tru. Ating sampela bilong ol dispela manmeri bai i gat rot bilong kisim save long Jehova, bilip long em, na ol bai sanap long sait bilong em taim em i mekim holi nem bilong em long ai bilong olgeta manmeri long graun.—Ese. 38:16. w24.05 12 par. 14-15

Lain bilong Jehova i save amamas long helpim narapela narapela. (2 Kor. 8:4) Tasol sampela taim ol i mas strongim bel bilong mekim olsem. Olsem, taim woa i kirap long wanpela hap, ol elda long dispela hap i luksave olsem ol bratasista i nidim ol tok bilong strongim ol, ol i nidim sapot, na tu, ol i mas kisim helpim long ol samting bilong strongim bilip olsem Baibel na ol pablikesen o kaikai na klos samting. Ol elda i laikim tru ol bratasista bilong ol, olsem na sampela taim ol i wok strong tru long helpim ol long ol samting ol i nidim, maski ol yet inap kisim bagarap long dispela rot. Long ol kain taim olsem, em i bikpela samting long yumi mas stap wanbel. Bihainim daireksen i kam long brens ofis long kantri bilong yu. (Hib. 13:17) Planti taim ol elda i mas skelim gen arensmen em kongrigesen i mekim bilong redim ol pablisa long taim bilong disasta, na tu, ol i mas skelim daireksen i kam long oganaisesen long wanem samting ol i mas mekim taim wanpela disasta i laik kamap. (1 Kor. 14:​33, 40) Strongim bel, tasol was gut. (Prov. 22:3) Bihainim savetingting. No ken mekim ol samting we hevi inap painim yu. Bilip na wetim Jehova i helpim yu. Em i ken helpim yu long givim gutpela helpim long ol bratasista bilong yu. w24.07 4 par. 8; 5-6 par. 11

King Devit i save long Jehova na em i trastim Em. Taim ol birua bilong em i bin ranim em, wanpela bilong ol em King Sol, Devit i beten askim Jehova long helpim em. Bihain long God i bekim beten bilong em na kisim bek em long han bilong ol birua, Devit i tokaut olsem: “Jehova i stap laip!” (Sng. 18:46) Wanem insait bilong tok Devit i mekim? Wanpela referens i stori olsem tok bilong Devit i makim olsem em i bilip tru long Jehova “olsem em i god i stap laip na oltaim em i save helpim ol wokman bilong em.” Tru tumas, ol samting i kamap long laip bilong Devit i helpim em long bilip tru olsem God bilong em i stap laip, na dispela bilip i strongim tru tingting bilong em long lotuim na preisim Jehova. (Sng. 18:​28, 29, 49) Yumi bilip tru olsem Jehova em i God i stap laip na dispela i ken helpim yumi long givim bel olgeta long mekim wok bilong em. Dispela bai strongim yumi long sanap strong na karim ol hevi na kirapim yumi long givim bel yet long mekim wok bilong God. Na tu, yumi bai tingting strong long pas gut yet wantaim Jehova. w24.06 20-21 par. 3-4

Yumi inap kisim wanem skul long tok aposel Pol i mekim long ol Tesalonaika? Taim yumi harim wanpela stori we i no stret wantaim ol tok em yumi bin lainim long Baibel o yumi harim wanpela stori i narakain tru, yumi mas bihainim pasin bilong skelim gut tingting. Long Soviet Yunion bilong pastaim, ol birua bilong yumi i bin givim wanpela pas long ol brata na i luk olsem dispela pas i kam long wol hetkota bilong yumi. Dispela pas i kirapim sampela brata long kamapim wanpela narapela oganaisesen bilong ol yet. I luk olsem ol tok bilong dispela pas ol i tok tru. Tasol ol brata i gat strongpela bilip, ol i no larim ol tok bilong dispela pas i paulim tingting bilong ol. Ol i luksave olsem ol tok bilong dispela pas i no stret wantaim ol tok em ol i bin kisim save pinis long en. Long nau, sampela taim ol birua bilong tok i tru i save yusim ol samting olsem Intenet na sosel midia bilong paulim tok i tru na brukim lain namel long yumi. Tasol yumi “no ken larim gutpela tingting bilong [yumi] i paul hariap,” nogat, yumi ken lukautim yumi yet long rot bilong skelim gut ol tok yumi harim o ritim olsem ol i stret wantaim ol tok i tru yumi bin kisim save pinis long en, o nogat.—2 Tes. 2:2; 1 Jon 4:1. w24.07 12-13 par. 14-15

Nambawan bikpela disisen wanpela i ken mekim em long dediketim em yet long Jehova na insait long bikpela lain famili i lotuim em, em ol i stap long olgeta hap bilong graun. Jehova i laik bai olgeta man i mekim olsem. Bilong wanem? Em i laik bai ol i stap pren bilong em na stap laip oltaim. (Lo 30:​19, 20; Gal. 6:​7, 8) Tasol Jehova i no save subim ol man long lotuim em. Em i larim wan wan man long makim wanem samting ol bai mekim. Olsem wanem sapos wanpela baptais Kristen i brukim lo bilong God na mekim wanpela bikpela sin? Sapos em i no tanim bel, ol i mas rausim em long kongrigesen. (1 Kor. 5:13) Maski em i raus, Jehova i laik tru long em i mas tanim bel na pas gut gen wantaim Em. Dispela em nambawan bikpela risen na Jehova i givim pe bilong baim bek man na bai rot i op long Em i ken fogivim ol sinman i tanim bel. Jehova em God i gat pasin laikim, na em i laik helpim ol man i mekim sin long tanim bel.—Sek. 1:3; Rom 2:4; Jems 4:8. w24.08 14 par. 1-2

Long taim aposel Jon i raitim namba 3 pas bilong em, sampela manmeri i bin skulim ol narapela long ol tok giaman na ol i wok long brukim lain. Tasol planti i “wokabaut yet long tok i tru.” Ol i bihainim tok bilong Jehova na “wok yet long bihainim ol lo bilong em.” (2 Jon 4, 6) Pasin bilong ol dispela Kristen long stap gut long God i bringim bikpela amamas long Jon na long Jehova tu. (Prov. 27:11) Yumi inap kisim wanem skul? Pasin bilong stap gut long God i save kamapim amamas. (1 Jon 5:3) Olsem, yumi save amamas taim yumi save olsem yumi mekim Jehova i amamas. Em i save amamas long lukim yumi sakim ol traim bilong dispela graun na bihainim yet tok i tru. Ol ensel long heven tu i save amamas taim ol i lukim yumi mekim olsem. (Luk 15:10) Yumi tu i ken amamas taim yumi lukim ol narapela i stap gut long God. (2 Tes. 1:4) Na taim God i pinisim dispela haptaim bilong nau, yumi bai amamas tru long save olsem yumi bin stap gut long Jehova long dispela graun em Satan i bin bosim. w24.11 12-13 par. 17-18

Paslain long yu tokim wanpela olsem yu laikim em, yu mas skelim pasin bilong em inap hamas haptaim? Sapos yu tokim em hariap olsem yu laikim em, em inap ting olsem yu hariap tumas na yu no skelim gut tingting paslain long yu mekim dispela disisen. (Prov. 29:20) Tasol sapos dispela man o meri em yu laik poromanim, em i luksave olsem yu laikim em na yu lusim longpela haptaim long tokim em, em inap ting olsem yu save isi isi tumas na yu no save mekim ol disisen hariap. (Ekl. 11:4) Tingim olsem, paslain long yu tokim wanpela olsem yu laikim em, no ken holim dispela tingting olsem yu bai maritim dispela man o meri. Tasol yu mas save olsem yu yet i redi long marit na dispela man o meri em yu laik poromanim, em bai stap olsem gutpela poroman marit bilong yu. Yu mas mekim wanem sapos yu luksave olsem wanpela i gat laik long yu? Sapos yu no gat laik long em, orait pasin bilong yu i mas kamapim klia dispela tingting bilong yu. Em i no gutpela pasin long mekim em i kisim tingting olsem yu bai prenim em, tasol tru tru yu no gat laik long em.—Efe. 4:25. w24.05 22-23 par. 9-10

God bai kisim i go ol Kristen em i bin makim em ol i holimpas bilip na ol bai mekim wok king wantaim Jisas long Kingdom long heven. Ol Kristen God i bin makim em ol i no was i stap long sait bilong bilip, Jisas bai i no inap bungim ol wantaim “lain God i bin makim.” (Mat. 24:31) Olgeta manmeri bilong God, maski ol i bilip long kisim laip long heven o long graun, ol i mas tingim tok bilong Jisas olsem tok lukaut na ol i mas was i stap na holimpas yet bilip. Yumi save gut tru long Jehova, olsem na yumi bilip tru olsem oltaim em bai mekim stretpela disisen. Yumi no inap kwestenim disisen bilong Jehova long makim sampela Kristen long taim bilong yumi em ol i holimpas bilip long go long heven. Yumi tingim tok piksa Jisas i mekim long ol wokman i kam wok long gaden wain long namba 11 aua. (Mat. 20:​1-16) Ol wokman em papagraun i singautim ol long kam wok long gaden wain long apinun, ol i kisim wankain pe em ol wokman i kam wok long kirap bilong de i kisim. Long wankain pasin, maski God i makim ol Kristen long go long heven long wanem taim, olgeta bai kisim gutpela pe bilong go long heven sapos ol i holimpas yet bilip na stap gut long em. w24.09 24 par. 15-17

Jisas i stap gutpela piksa tru em yumi ken bihainim taim yumi karim hevi long pasin i no stret. Em i karim hevi bilong pasin i no stret em famili bilong em yet na ol narapela i bin mekim long em. Ol wanfamili bilong em husat i no wanbilip, ol i sutim tok long em olsem tingting bilong em i paul pinis, na ol bikman bilong lotu i sutim tok long em olsem em i wok bung wantaim ol spirit nogut, na ol soldia bilong Rom i tok bilas long em, paitim em, na bihain ol i kilim em i dai. (Mak 3:​21, 22; 14:55; 15:​16-20, 35-37) Maski i olsem, Jisas i karim hevi bilong olgeta dispela pasin i no stret ol i mekim long em, na em i no bekim rong bilong ol. Yumi inap kisim wanem skul long eksampel bilong em? (1 Pita 2:​21-23) Jisas i stap gutpela piksa tru em yumi ken bihainim taim wanpela i mekim pasin i no stret long yumi. Em i save long wanem taim i stret long pasim maus na wanem taim i stret long toktok. (Mat. 26:​62-64) Em i no mekim wanpela tok long sambai long em yet taim ol man i sutim ol tok giaman long em. (Mat. 11:19) Tasol long ol taim em i bekim tok bilong ol man i mekim nogut long em, em i no tok nogut long ol o mekim tok bilong bagarapim ol, nogat. w24.11 4-5 par. 9-10

Piksaim long tingting olsem yu givim presen long wanpela yu laikim tru, na dispela presen i luk nais tru na em inap yusim long mekim gutpela wok. Ating yu bai bel hevi tru sapos em i putim dispela presen insait long wanpela boks na em i no tingim moa dispela presen! Tasol yu bai amamas tru sapos em i yusim gut dispela presen na em i tok tenkyu long yu givim dispela presen long em. Wanem poin bilong dispela tok piksa? Jehova i givim Pikinini bilong em bilong helpim yumi. Olsem na Jehova i save amamas tru taim yumi soim tenkyu bilong yumi long dispela naispela presen na long pasin laikim bilong em we i bin kirapim em long givim pe bilong baim bek man! (Jon 3:16; Rom 5:​7, 8) Bihain long ol yia i lus, ating yumi no moa pilim tru ofa bilong baim bek man em Jehova i givim long yumi olsem presen. I olsem yumi putim dispela presen insait long wanpela boks. Yumi amamas long kisim, tasol yumi lusim tingting long en. Bilong helpim yumi long no ken mekim olsem, oltaim yumi mas tingting long samting God na Krais i mekim bilong helpim yumi. w25.01 26 par. 1-2

Baibel i tok nupela disaipel i no ken kisim wok, dispela i makim olsem ol brata i no ken makim wanpela nupela brata long kamap elda. Maski yu baptais inap sotpela taim o inap planti yia i go pinis, sampela haptaim i mas lus bilong yu ken kamap strongpela Kristen paslain long yu kamap elda. Paslain long ol i makim yu i kamap wanpela elda, yu mas kamapim ol pasin wankain olsem bilong Jisas, olsem yu mas daunim yu yet na amamas long wetim Jehova i givim yu wanem wanem ol wok em yu mas mekim. (Mat. 20:23; Fili. 2:​5-8) Yu ken soim olsem yu stap gut long God long rot bilong pas gut wantaim em na bihainim ol stretpela lo bilong em na ol daireksen em i givim long rot bilong oganaisesen bilong em. Baibel i tokaut klia olsem ol ovasia i mas i gat save long skulim ol man. Yu ting dispela i makim olsem yu mas i gat gutpela pasin bilong mekim tok? Nogat. Planti gutpela elda i no gutpela tumas long pasin bilong mekim tok, tasol ol i save mekim gut wok autim tok na toktok gut wantaim ol bratasista long taim ol i mekim ol sepeding visit. w24.11 23-24 par. 14-15

Taim yu painim wanpela tok long Baibel we yu no kliagut tumas long en, orait mekim wok painimaut long dispela tok. Na long de olgeta, tingim tingim long bel ol samting yu lainim na ol skul yu kisim long Jehova, Pikinini bilong em, na pasin bilong ol long laikim yu. (Sng. 119:​97, ftn.) Long olgeta taim yu sindaun long ritim Baibel o mekim wok painimaut, no ken bel hevi sapos yu no painim sampela nupela save o sampela tok yu amamas long en. Yu olsem man bilong painim gol. Dispela man bilong painim gol i no save les kwik. Em i save lusim planti aua na planti de bilong painim gol i go inap long em i painim wanpela liklik gol. Maski em i hatwok tru, em i save wok strong tru bikos ol dispela liklik gol em i painim i dia tumas long em. Olsem tasol, ol gutpela tok i tru bilong Baibel yumi kisim save long en ol i dia tumas, maski yumi lusim bikpela haptaim long painim! (Prov. 8:10) So no ken les kwik, givim bel yet long bihainim sediul bilong yu long mekim Baibel ritim.—Sng. 1:2. w25.01 25 par. 14-15

Jehova i laik bai yumi redi long fogivim ol manmeri husat i bagarapim bel bilong yumi. (Sng. 86:5; Luk 17:4; Efe. 4:32) Yumi inap pilim bikpela bel hevi tru taim wanpela i mekim ol tok o pasin i bagarapim bel bilong yumi, moa yet taim dispela man o meri em i gutpela pren o wanfamili bilong yumi. (Sng. 55:​12-14) Sampela taim, bikpela bel pen yumi pilim inap wankain olsem wanpela i sutim yumi long naip. (Prov. 12:18) Yumi inap traim long daunim o lusim tasol dispela bel hevi yumi pilim. Tasol taim yumi mekim olsem, dispela i olsem wanpela i sutim yumi long naip na dispela naip i stap yet insait long bodi bilong yumi. Olsem tasol, yumi no ken ting olsem bikpela bel hevi yumi pilim bai pinis nating sapos yumi lusim tasol i stap na yumi no mekim wanpela samting long en. Taim wanpela i bagarapim bel bilong yumi, ating fes samting yumi inap mekim em yumi inap bel hevi. Baibel i tokaut olsem yumi inap belhat. Tasol em i mekim tok lukaut olsem yumi no ken larim belhat i bosim yumi. (Sng. 4:4; Efe. 4:26) Wai na Baibel i mekim dispela tok lukaut? Bikos gutpela samting i save kamap taim yumi no belhat hariap. (Jems 1:20) Tingim, em isi long yumi belhat, tasol pasin bilong holim yet belhat i stap, em disisen yumi wan wan yet i mas mekim. w25.02 15 par. 4-6

Tok piksa bilong Jisas i soim olsem em longlong pasin long wanpela man i seivim planti mani, tasol em i stap “rabis long ai bilong God.” (Luk 12:​16-21) Yumi no save long wanem samting bai kamap long tumora. (Prov. 23:​4, 5; Jems 4:​13-15) Olsem ol disaipel bilong Krais, i gat wanpela samting em yumi inap pilim hatwok long mekim. Jisas i tok yumi mas redi long “lusim ol samting” yumi gat long kamap ol disaipel bilong em. (Luk 14:33) Long taim bilong ol aposel, ol Kristen long Judia i redi long lusim ol samting ol i gat bilong mekim olsem. (Hib. 10:34) Long nau, planti bratasista i redi long lusim mani kago o wok mani bilong ol bikos ol i no laik sapotim wanpela lain politik. (Rev. 13:​16, 17) Wanem samting i helpim ol long mekim olsem? Ol i bilip tru long tok promis bilong Jehova olsem: “Mi no inap tru long lusim yu, na mi no inap givim baksait long yu.” (Hib. 13:5) Yumi mekim ol samting bilong plenim hau yumi bai lukautim yumi yet long bihain, tasol sapos sampela samting i kamap em yumi no ting bai kamap, yumi bilip tru olsem Jehova bai lukautim yumi. w25.03 29-30 par. 13-14

Jehova i givim ol samting bilong helpim yumi long kamap strong long bilip. Ol man i mekim wok olsem ol wasman na ol tisa insait long kongrigesen Kristen, ol i redi long helpim yumi long kamap olsem ol “man i bikpela pinis” long sait bilong bilip, na winim wankain “mak em Krais i bin winim, em dispela mak i inap olgeta.” (Efe. 4:​11-13) Na tu, Jehova i givim yumi holi spirit bilong helpim yumi long kisim “tingting bilong Krais.” (1 Kor. 2:​14-16) Na moa yet, God i kirapim ol man long raitim fopela Gutnius bilong skulim yumi long ol tingting, toktok, na ol pasin Jisas i bin mekim taim em i stap long graun. Taim yu bihainim tingting na ol pasin bilong Jisas, yu ken winim mak yu putim long kamap strong long bilip. Tasol bilong kamap strong long bilip, yumi mas kisim save long “ol as bilip bilong Krais,” em ol as bilip olgeta Kristen i mas save long en, na tu, yumi mas kisim save long sampela samting moa. w24.04 4-5 par. 11-12

Long olgeta de yumi mas mekim ol disisen. Sampela disisen em isi long mekim, olsem bai yumi kaikai wanem samting long moning o wanem taim bai yumi slip long nait. Tasol sampela narapela disisen em hatwok long mekim. Ol dispela disisen inap mekim sampela samting long helt bilong yumi, pasin bilong yumi long stap amamas, famili bilong yumi, na lotu bilong yumi tu. Yumi laik mekim ol disisen we inap helpim yumi yet na famili bilong yumi tu. Na bikpela samting moa, yumi laik bai ol disisen yumi mekim i amamasim Jehova. (Rom 12:​1, 2) Fes samting yu ken mekim na bai yu mekim gutpela disisen em yu mas kisim gut stori. Wai na dispela em i bikpela samting? Tingim olsem wanpela sikman i go lukim wanpela dokta bikos em i gat bikpela sik. Yu ting dispela dokta bai hariap long mekim disisen long wanem marasin em bai givim long em na em i no sekim gut sikman na givim em sampela askim? Nogat, em i no inap mekim olsem. Yu tu inap mekim ol gutpela disisen sapos yu kisim gut stori na yu kliagut long ol samting i insait long disisen yu bai mekim. w25.01 14 par. 1-3

Yumi save long wanem samting long pasin marimari bilong Jehova? Olsem wanem em i soim olsem “em i no laik bai wanpela i kisim bagarap”? (2 Pita 3:9) Tingim pasin marimari em i mekim long sampela man em ol i bin mekim ol bikpela sin. King Devit i mekim ol bikpela sin, olsem pasin adaltri na kilim man i dai. Maski i olsem, em i tanim bel, olsem na Jehova i mekim pasin marimari na fogivim em. (2 Sml. 12:​1-12) Klostu long laip olgeta bilong King Manase, em i bin mekim ol bikpela sin. Tasol taim dispela man nogut i tanim bel, Jehova i mekim pasin marimari na fogivim em. (2 Sto. 33:​9-16) Ol dispela eksampel i soim olsem Jehova i save mekim pasin marimari taim em i lukim olsem i stret long mekim olsem. Em bai kirapim bek ol kain man olsem bikos ol i luksave olsem ol i bin mekim ol bikpela sin na ol i tanim bel long ol dispela sin. w24.05 4-5 par. 12