Julai

Sampela wokman bilong Jehova i karim hevi bilong i go lapun, no gat gutpela helt, o ol i gat wanpela bagarap long bodi. Dispela inap mekim na ol i pilim olsem ol i no gutpela inap long ai bilong Jehova. Ol inap askim olsem, ‘Jehova inap yusim mi long mekim yet wok bilong em?’ Man bilong raitim Buk Song 71 i kamapim wankain tingting olsem. Em i beten olsem: “Taim strong bilong mi i pinis, yu no ken givim baksait long mi.” (Sng. 71:​9, 18) Maski em i gat dispela tingting, em i bilip yet olsem sapos em i stap gut long God na mekim wok bilong em, Jehova bai stiaim em na lukautim em. Em i lainim olsem Jehova i save amamas long ol man em ol i givim bes bilong ol long mekim wok bilong Em, maski ol i bungim sampela hatwok. (Sng. 37:​23-25) Ol lapun bratasista, holim wankain tingting olsem Jehova i gat long yupela. Em inap helpim yupela long kamap strong long bilip, maski yupela i gat sik o yupela i no gat strong long mekim planti samting. (Sng. 92:​12-15) Putim tingting long ol samting yupela inap long mekim, na no ken tingting tumas long ol samting yupela i no inap long mekim. w24.10 28-29 par. 14-16

Ol Kristen i no strong long bilip, ol i save hatwok long mekim gutpela disisen taim i no gat wanpela lo long Baibel i kolim stret samting ol i mas mekim. Sapos i no gat lo long Baibel i kolim stret samting ol i mas mekim, sampela inap pilim olsem ol i ken mekim wanem samting ol i laik mekim. Ol narapela inap askim long wanpela lo taim i no gat wok long ol i bihainim wanpela lo. Olsem, ol Kristen long Korin i askim aposel Pol long kolim stret wanpela lo we i stori olsem ol bai kisim ol kaikai ol i ofaim long ol imis o nogat. Pol i no tokim ol long samting ol i mas mekim, nogat, em i tokim ol olsem olgeta wan wan i gat “rait long mekim” samting i stret wantaim maus bilong bel bilong ol. Em i kolim sampela stiatok we inap helpim olgeta wan wan long mekim samting i stret wantaim maus bilong bel bilong ol, tasol long wankain taim ol i no ken pundaunim ol narapela. (1 Kor. 8:​7-9) Long dispela rot, Pol i helpim ol Korin long kamap strong long bilip na bai ol i ken yusim save bilong ol long skelim ol samting na ol i no larim ol narapela i stiaim ol o painim ol lo i stori long dispela samting. w24.04 5-6 par. 14

Long taim bilong Jona, lain Ninive i bin gat rot long tanim bel. Na tu, tingim tok Jisas i mekim long “kirap bek bilong ol [man] em bilong kisim kot.” “Ol man i bin mekim ol stingpela pasin,” ol tu bai insait long dispela kot. (Jon 5:29) So yumi ken ting olsem, ating ol manmeri bilong taun Sodom na Gomora bai i gat rot long kirap bek. Sampela bilong ol dispela manmeri bai kirap bek, na rot bai op long yumi inap skulim ol long Jehova na Jisas Krais. Oltaim Jehova i save “skelim bel bilong ol man, na [em i] save skelim tingting i stap insait tru long ol.” Taim em i kirapim bek ol man i dai, em bai “bekim pe i stret long pasin olgeta wan wan i bin mekim” olsem em i save mekim long olgeta taim. Jehova i no inap surik long mekim kot bilong em, tasol em bai mekim pasin marimari taim i stret long mekim olsem. Olsem na i no stret long yumi skelim ol man na tok olsem ol i no inap kirap bek sapos Baibel yet i no mekim wanpela tok long dispela samting! w24.05 5-6 par. 15-16

Long bipo tu, tok i kam long God i strongim ol wokman bilong em taim ol i kisim wanpela wok i hatwok long mekim. Olsem, tingim profet Jeremaia. Em i surik long autim tok taim Jehova i givim dispela wok long em long mekim. Jeremaia i tok: “Mi mangi tasol na mi no save long pasin bilong autim tok.” (Jer. 1:6) Em i mekim wanem samting bilong daunim pasin bilong em long pret? Em i kisim strong long tok bilong God. Em i tok: “Tok bilong em i olsem paia i lait. Em i olsem paia i lait insait long ol bun bilong mi. Na mi trai hat long pasim tok bilong em; tasol mi no inap.” (Jer. 20:​8, 9) Maski Jeremaia i mas autim tok long ol man i gat strongpela het, tok em Jehova i givim long em long autim i strongim em long mekim dispela wok. Ol Kristen i save kisim strong long Tok Bilong God. Aposel Pol i tok olsem pasin bilong kisim stretpela save bai kirapim ol bratasista long “wokabaut olsem ol manmeri tru bilong Jehova” na bai ol i ken “karim kaikai yet long rot bilong olgeta gutpela wok.”—Kol. 1:​9, 10. w24.04 14-15 par. 2-4

Sadok i stap gut yet long Jehova, maski Hetpris Abiatar i sapotim pikinini man bilong Devit, em Adoniya, em i laik kisim wok king long Devit. Devit i no gat tupela tingting long pasin bilong Sadok long stap gut long em. Taim Devit i kisim save long samting Adoniya i plen long mekim, em i makim Sadok, Natan, na Benaia long anointim Solomon i kamap king. (1 Kin. 1:​32-34) Sadok i bin stap wantaim ol man em ol i stap gut long lotuim Jehova, olsem Natan na ol narapela man em ol i bin sapotim King Devit, na dispela i bin strongim tru Sadok. Taim Solomon i kamap king, em i “makim pris Sadok long kisim ples bilong Abiatar.” (1 Kin. 2:35) Olsem wanem yu ken bihainim pasin bilong Sadok? Sapos wanpela yu laikim tumas i mekim disisen long lusim Jehova, orait soim Jehova olsem yu laik stap gut long em. (Jos. 24:15) Jehova bai strongim yu long bihainim stretpela pasin. Bilip na wetim em i helpim yu long rot bilong beten na poroman gut wantaim ol wanbilip em ol i stap gut long God. Jehova i tingim tru pasin bilong yu long stap gut long em na em bai givim yu gutpela pe long yu mekim olsem.—2 Sml. 22:26. w24.07 6-7 par. 16-17

Buk Song 15:2 i tok olsem man i stap olsem pren bilong God “em man i no gat asua long wanpela samting, na em i save mekim stretpela pasin.” Dispela em samting yumi mas mekim long olgeta taim na i no long wanpela taim tasol. Tasol yu ting yumi ol man inap wokabaut stret na “i no gat asua long wanpela samting”? Yes, yumi inap mekim olsem. Maski yumi ol man i no gutpela olgeta, Jehova bai tingim yumi olgeta wan wan olsem “man i no gat asua long wanpela samting” sapos yumi traim bes bilong yumi long bihainim tok bilong em. Taim yumi dediketim yumi yet long God na kisim baptais, dispela em kirap tasol bilong wokabaut bilong yumi wantaim God. Tingim olsem, long taim bilong ol man i bin raitim Baibel, i no olgeta manmeri bilong lain Israel i winim mak bilong stap olsem gest bilong Jehova. Sampela i lotuim em, tasol ol i no mekim long “pasin i tru na stretpela pasin.” (Ais. 48:1) Ol manmeri bilong lain Israel em ol i gat gutpela bel, ol i mas kisim save long ol lo bilong Jehova na bihainim ol dispela lo. Olsem tasol, bilong God i ken orait long yumi long nau, yumi mas kisim baptais na bung wantaim kongrigesen Kristen na mekim sampela samting moa. Yumi mas wok yet long “mekim stretpela pasin.” w24.06 8-9 par. 4; 9-10 par. 6

Wanem sampela rot we Jehova i amamas long givim ol samting long yumi? Skelim sampela eksampel. Jehova i save givim yumi ol samting bilong skin em yumi nidim. Maski yumi no gat planti samting bilong skin, yumi olgeta i ken tenkyu long Jehova olsem yumi gat ol samting yumi nidim. Olsem, em i opim rot bambai yumi ken i gat ol kaikai, klos samting, na ples slip. (Sng. 4:8; Mat. 6:​31-33; 1 Tim. 6:​6-8) Yu ting Jehova i givim yumi ol samting bilong skin yumi nidim bikos em i gat wok long mekim olsem? Nogat tru! Skelim ol tok Jisas i mekim long Matyu 6:​25, 26. Jisas i stori long ol pisin na em i tok: “Ol i no save planim sid o kisim kaikai na bungim long ol bakstua.” Tasol lukim tok em i mekim bihain long dispela, olsem: “Papa bilong yupela long heven i save givim kaikai long ol.” Na bihain em i tok: “Tasol yupela i winim tru ol pisin.” Wanem poin bilong tok em i mekim? Sapos Jehova i tingim gut ol animal na em i lukautim ol gut, orait yumi ken save tru olsem em bai givim yumi ol samting yumi nidim! Wankain olsem wanpela papa long graun i gat pasin laikim, Jehova i save givim ol samting famili bilong em i nidim bikos em i laikim ol.—Sng. 145:16; Mat. 6:32. w24.09 26-27 par. 4-6

Kongrigesen sevan em wanpela brata i baptais pinis na holi spirit i makim em long helpim ol elda long lukautim planti bikpela wok insait long kongrigesen. Ol kongrigesen sevan i save tingim tru ol samting bilong bilip, ol i laikim tru Jehova, na ol i bihainim ol stretpela lo bilong em. Na ol i laikim tru ol bratasista Kristen bilong ol. (Mat. 22:​37-39) Wanpela baptais brata i ken mekim wanem bilong winim mak bilong kamap kongrigesen sevan? Baibel i kolim ol mak em ol brata i mas winim bilong kamap ol kongrigesen sevan. (1 Tim. 3:​8-10, 12) Yu ken winim mak bilong mekim dispela wok long rot bilong stadi gut long ol dispela mak em Baibel i kolim na wok strong long winim ol. Tasol pastaim, yu mas tingim gut risen na yu laik winim mak bilong mekim wok olsem kongrigesen sevan. w24.11 14-15 par. 4-5

Sampela man i tok ol i bin ritim Baibel planti taim tru. Tasol olsem wanem? Tru tru ol i bilipim ol tok bilong Baibel? Ol i bihainim ol dispela tok o larim ol dispela tok i senisim ol samting ol i mekim long laip bilong ol? Sori tru, planti bilong ol i no mekim olsem. Tasol lain bilong Jehova i no wankain olsem ol! Yumi wok strong long bihainim ol dispela tok long laip bilong yumi. Sampela taim i hatwok long ritim Tok Bilong God na bihainim. Yumi inap pilim hatwok long painim haptaim long ritim Baibel. O yumi inap ritim Baibel hariap hariap na yumi no tingim gut ol tok yumi ritim. O yumi inap pilim olsem i gat planti samting tumas em yumi mas kamap gutpela moa long en. Maski yu pilim hatwok long mekim ol dispela samting, yu inap winim ol dispela hevi. Jehova i ken helpim yu long mekim olsem. Yumi ken tingting strong long kamap ol man bilong bihainim Tok na i no ol man bilong harim nating tasol. Tru tumas, taim yumi ritim Tok Bilong God long olgeta taim na bihainim long laip bilong yumi, yumi bai stap amamas tru.—Jems 1:25. w24.09 7 par. 15-16

Long rot bilong holi spirit bilong em, Jehova i save mekim gut bel bilong yumi taim hevi i kamap o taim wanpela yumi laikim tru i dai. Sapos bikpela hevi i painim yu na yu bel hevi tru, orait yu ken beten long Jehova na autim olgeta tingting na filings bilong yu long em. Yu ken beten planti taim na i no gat mak long hamas haptaim yu ken beten. (Sng. 86:3; 88:1) Beten planti taim na askim Jehova long givim holi spirit bilong em long yu. Oltaim em bai putim yau long yu na helpim yu. Olsem wanem? Wanpela bikpela hevi i painim yu na i pinisim tru stron g bilong yu? Holi spirit i ken strongim yu long stap gut yet long Jehova na lotuim em. (Efe. 3:16) Sapos yu beten askim God long givim yu holi spirit, yu ken mekim wanem bilong bihainim dispela beten? Mekim ol wok we bai opim rot long holi spirit bilong God i ken stiaim yu. Olsem go long ol miting na autim tok long ol narapela. Pulimapim tingting bilong yu wantaim ol tingting bilong Jehova long rot bilong ritim Tok bilong em long olgeta de. (Fili. 4:​8, 9) Taim yu ritim Baibel, tingim gut stori bilong ol manmeri long Baibel em ol i karim ol hevi, na tingim tingim long bel ol samting Jehova i mekim bilong helpim ol long sanap strong. w24.10 9 par. 12-14

Yumi laikim ol manmeri wankain olsem Jehova na Pikinini bilong em i mekim. (Prov. 8:31) Yumi sori tru long ol manmeri em ol “i no save long God” na ol “i no wetim wanpela gutpela samting.” (Efe. 2:12) Ol i karim planti hevi tru, na dispela inap mekim ol i pilim olsem ol i stap insait long wanpela bikpela hul i go daun tru. Tasol gutnius bilong Kingdom Bilong God em i olsem wanpela rop em yumi inap tromoi i go daun long ol na pulim ol i kam ausait long dispela hul. Pasin laikim na pasin sori yumi gat long ol manmeri i kirapim yumi long givim bel olgeta long autim gutnius long ol. Dispela tok i dia tumas inap helpim ol long bilip na wetim gutpela samting i kamap bihain, stap amamas long nau, na opim rot long ol inap kisim “dispela laip em i laip tru,” em laip oltaim long nupela taim God bai kamapim. (1 Tim. 6:19) Pasin laikim i kirapim yumi tu long tokim ol manmeri long pinis bilong dispela haptaim nogut we i wok long i kam klostu. (Ese. 33:​7, 8) Yumi laik bai ol i save long samting bai kamap long dispela taim bilong traipela hevi tru—ol lotu giaman bai bagarap na pinis olgeta na bihain long en olgeta man nogut bai pinis long pait bilong Armagedon.—Rev. 16:​14, 16; 17:​16, 17; 19:​11, 19, 20. w24.05 16-17 par. 8-9

Aposel Pol i kirapim ol Kristen long “larim God i kamapim belhat bilong em long ol man i mekim rong.” Hau yumi inap mekim olsem? Yumi inap mekim olsem taim yumi larim God i makim wanem taim na wanem rot em bai kamapim stretpela pasin bilong em. Wanpela brata nem bilong em John, bihain long em i karim hevi bilong pasin i no stret, em i tok: “Mi laik tru long mekim sampela samting bilong stretim dispela hevi, tasol mi wok strong tru long daunim dispela tingting. Tok bilong Rom 12:19 i helpim mi long wet long Jehova.” Gutpela samting i save kamap taim yumi wet long Jehova long stretim ol hevi. Taim yumi mekim olsem, yumi bai daunim presa na bel hevi em yumi inap pilim taim yumi yet i stretim ol dispela hevi. Jehova i laik helpim yumi. I olsem em i tok, ‘Lusim ol samting long han bilong mi; bai mi stretim dispela hevi.’ Sapos yumi bilip long tok promis bilong Jehova olsem “bai mi bekim,” yumi inap larim dispela hevi i go na bilip tru olsem em bai stretim dispela hevi long rot i gutpela moa winim rot yumi laik bihainim. w24.11 6 par. 14-15

Yumi mas putim ol samting bilong skin long ples stret bilong ol. Aposel Pol i kamapim klia dispela taim em i raitim pas i go long ol Kristen em ol i stap klostu long pinis bilong haptaim bilong ol Juda. Em i stori gen long ol samting i bin kamap long ol Israel long bipo, na ol samting i kamap tu klostu long Maunten Sainai. Em i tok lukaut long ol Kristen olsem ol i “no ken laikim ol samting nogut, olsem [ol Israel] i bin laikim ol samting nogut.” (1 Kor. 10:​6, 7, 11) Ol Israel i laikim tumas kaikai, olsem na ol samting Jehova i wokim mirakel na givim long ol i kamap olsem “ol samting nogut.” (Nam. 11:​4-6, 31-34) Na ol i lotuim imis bilong dispela pikinini bulmakau ol i wokim long gol, na ol i kaikai, dring, na ol i amamas. (Kis. 32:​4-6) Pol i kamapim stori bilong ol olsem tok lukaut long ol Kristen em ol i stap paslain long pinis bilong haptaim bilong ol Juda long 70 C.E. Long nau, yumi tu i stap long wanpela haptaim em klostu nau bai pinis, olsem na yumi laik tingim gut tok lukaut bilong Pol. w24.12 6 par. 13

Jehova em i “God bilong amamas,” na em i laik bai yumi tu i amamas. (1 Tim. 1:11) Em i givim yumi planti presen bilong helpim yumi long enjoim laip. (Jems 1:17) Wanpela bilong ol dispela presen em marit. Taim wanpela man na meri i marit, ol i tok promis long laikim, rispektim, na tingim tru narapela narapela. Taim tupela i pas gut wantaim, dispela inap mekim ol i stap amamas tru. Sori tru, planti marit long nau i lusim tingting long tok promis ol i bin mekim long taim ol i marit. Olsem na ol i no stap amamas. Jehova i laik bai maritman i mekim wanem kain pasin long meri bilong em? Jehova i tokim ol maritman long givim ona long meri bilong ol. Dispela tok ona i makim pasin yumi mekim long wanpela em yumi rispektim em. Maritman husat i save onarim meri bilong em, em i save mekim gutpela pasin na pasin laikim long em.—1 Pita 3:7. w25.01 8 par. 1-2; 9 par. 4-5

Tru tumas, pas em aposel Pol i raitim long ol Kristen Hibru i helpim olgeta Kristen long taim bilong ol aposel long redi long traipela hevi bai painim ol long bihain. Pol i kirapim ol wanbilip bilong em long kisim sampela save moa na kliagut moa long ol tok bilong Ol Rait Holi. Taim ol i mekim olsem, ol bai luksave na sakim ol bilip we inap pundaunim ol long bilip. Em i kirapim ol long strongim bilip bilong ol na bai ol i ken bihainim gut ol daireksen ol i kisim long Jisas na ol man i go pas long ol insait long kongrigesen. Na em i helpim ol Kristen long strongim pasin bilong ol long sanap strong, long rot bilong holim stretpela tingting long ol hevi i painim ol na tingim ol dispela hevi olsem rot em gutpela Papa bilong ol long heven i yusim bilong trenim ol. Yumi tu i ken bihainim dispela tok Pol i mekim. Na long dispela rot, yumi tu i ken sanap strong i go inap long pinis.—Hib. 3:14. w24.09 13 par. 17, 19

Long Baibel, pe bilong baim bek man i makim pe God i givim bilong opim rot long yumi ken kamap wanbel gen wantaim em. Long tingting bilong Jehova, dispela pe i opim rot long yumi inap kisim bek samting i bin lus. Bilong wanem yumi tok olsem? Tingim, Adam na Iv i lusim laip i gutpela olgeta na presen bilong i stap laip oltaim. So pe bilong baim bek man i mas stret o i mas wankain long pe bilong samting i bin lus. (1 Tim. 2:6) Bilong givim dispela pe, wanpela man i bikpela pinis i mas (1) gutpela olgeta; (2) em inap i stap laip oltaim long graun; na (3) em i mas redi long givim laip bilong em olsem ofa bilong helpim yumi. Tingim tripela risen na Jisas inap givim pe bilong baim bek man. (1) Em i gutpela olgeta—“em i no bin mekim sin.” (1 Pita 2:22) (2) Em i no gat sin, olsem na em inap stap laip oltaim long graun. (3) Em i redi long dai na givim laip bilong em bilong baim bek yumi.—Hib. 10:9. w25.02 4-5 par. 11-12

Jehova i laikim yu na em i laik bai yu stap insait long famili bilong em. Dispela tok em i tru maski yu bungim wanem ol hatwok we i pasim yu long kisim baptais. Jisas i mekim dispela tok long sampela disaipel bilong em olsem: “Sapos bilip bilong yupela i kain olsem sais bilong sid mastet, orait bai yupela i tokim dispela maunten, ‘Kirap na go long hap,’ na bai em i kirap na i go. Na bai yupela inap mekim olgeta samting.” (Mat. 17:20) Ol manmeri i stap long dispela taim na harim dispela tok, ol i bin stap wantaim Jisas inap sampela yia, so bilip bilong ol i wok yet long kamap strong. Tasol Jisas i strongim ol na em i tok sapos bilip bilong ol i kamap strong, Jehova bai helpim ol long daunim ol hatwok i olsem ol maunten. Na Jehova bai helpim yu tu long mekim olsem! Sapos yu luksave long sampela samting we i pasim yu long kisim baptais, orait mekim samting hariap long rausim ol dispela samting. Dediketim yu yet long Jehova na kisim baptais. Em nambawan gutpela disisen tru yu inap mekim! w25.03 7 par. 18-20

Yumi ken sanap strong na karim ol hevi sapos yumi tingim olsem God i stap laip i redi long helpim yumi. Yumi ken strongim pasin bilong yumi long trastim Jehova olsem em bai helpim yumi taim yumi skelim ol samting em i bin mekim long bipo. (Ais. 37:​17, 33-37) Na skelim tu ol ripot i stap long websait bilong yumi long jw.org, ol i soim klia hau Jehova i sambai long ol bratasista bilong yumi long nau. Na tu, tingim bek ol taim Jehova i bin helpim yu. Sapos yu no inap tingim wanpela bikpela hevi i bin painim yu, orait no ken wari. Bilong wanem yumi tok olsem? Samting tru em olsem, Jehova i bin mekim planti samting bilong helpim yu! Em i kirapim yu long kamap pren bilong em. (Jon 6:44) Yu ken traim mekim olsem: Askim em long helpim yu long tingim ol taim we em i bin bekim ol beten bilong yu, givim helpim yu nidim long taim stret, o sambai long yu taim yu karim wanpela bikpela hevi. Taim yu tingim tingim ol samting em i bin mekim bilong helpim yu, dispela bai strongim pasin bilong yu long trastim Jehova olsem em bai wok yet long helpim yu. w24.06 21-22 par. 8

Ating yumi tingting strong long no ken larim wanpela samting i mekim na yumi lusim Jehova. Tasol yumi no gutpela olgeta na em isi long yumi pundaun long traim. (Rom 7:​21-23) Sampela samting inap kamap wantu tasol na dispela inap mekim na yumi pilim olsem i no gat rong long mekim wanpela pasin i no stret. Bilong stap gut yet long Jehova na Pikinini bilong em, yumi mas bihainim tok lukaut bilong Jisas long was i stap na bai yumi no pundaun long traim na mekim sin. Traim i save painim yumi olgeta long mekim sin. Tasol i gat sampela samting em yumi wan wan i save pilim hatwok long sakim, ating em traim bilong mekim wanpela bikpela sin, o insait long wanpela pasin i no klin, o long bihainim tingting bilong dispela graun. Olsem, ating wanpela i wok strong long daunim traim bilong mekim pasin pamuk. Na narapela inap wok strong tru long daunim laik bilong insait long ol pasin i no klin olsem pilai long sem bilong em yet o lukim ponografi. Tasol narapela inap wok strong long daunim pasin bilong pret long man, pasin antap, pasin bilong belhat hariap, o narapela samting. w24.07 14 par. 3; 15 par. 5

Tingim samting inap kamap sapos ol elda i no orait long kisim bek wanpela man i tanim bel i kam bek insait long kongrigesen, o bihain long em i kam bek, kongrigesen i no laik mekim pasin laikim long em. Nogut em i “bel hevi tru na dispela i daunim em olgeta.” Em inap pilim olsem em i no inap mekim gen wok bilong Jehova. Na tu, em inap givap long mekim ol samting bilong stretim bek pasin pren bilong em wantaim Jehova. Samting i nogut moa em sapos ol bratasista long kongrigesen i no laik fogivim dispela sinman i tanim bel, orait ol inap bagarapim pasin pren bilong ol yet wantaim Jehova. Bilong wanem yumi tok olsem? Long wanem, ol i no bihainim pasin bilong Jehova long fogivim ol man em ol i tanim bel pinis long ol rong ol i mekim, nogat, ol i kamapim hatpela pasin bilong Satan na pasin bilong em long i no marimari. I olsem ol i kamap tul long han bilong Devil we em inap yusim bilong bagarapim dispela man long sait bilong bilip.—2 Kor. 2:​10, 11; Efe. 4:27. w24.08 17 par. 7, 10-11

Krais Jisas i givim “ol man olsem ol presen” long ol kongrigesen em ol i helpim ol kongrigesen long narapela rot. Jisas i stiaim ol elda long Jerusalem long makim Pol, Barnabas, na ol narapela brata long mekim wok olsem ol wasman raun. (Apo. 11:22) Bilong wanem ol i mekim olsem? Long wankain risen ol i bin makim ol kongrigesen sevan na ol elda, em long strongim ol kongrigesen. (Apo. 15:​40, 41) Oltaim ol wasman sekit i mas raun i go long planti narapela narapela hap. Sampela i save raun i go lukim ol kongrigesen i stap planti handret kilomita longwe long narapela narapela. Long olgeta wik, wasman sekit i save mekim sampela tok, mekim ol sepeding visit, lukautim painia miting, miting bilong ol elda, na ol bung bilong autim tok. Em i save redim ol tok na oganaisim ol kibung sekit na ol kibung rijinel. Em i mekim wok tisa long ol painia skul, mekim spesel miting wantaim ol painia long sekit, na mekim ol narapela bikpela wok em brens ofis i makim em long mekim. w24.10 21-22 par. 12-13

Jehova i mekim ol dispela tok i stap long teks bilong nau long profet Jeremaia. Pol i kolim ol dispela wankain tok taim em i tok olsem: “Bai mi no tingim moa ol sin bilong ol.” (Hib. 8:12) Tasol dispela tok i makim wanem samting stret? Long Baibel, i no olgeta taim dispela tok “tingim” i makim olsem wanpela i tingim wanpela samting o em i wok long tingting long dispela samting, nogat. Dispela tok inap makim olsem wanpela i mekim samting. Man nogut i hangamap long diwai pos klostu long Jisas i tok: “Jisas, tingim mi taim yu kamap King.” (Luk 23:​42, 43) Em i askim Jisas long mekim samting bilong helpim em long bihain. Bekim bilong Jisas i soim olsem em bai kirapim bek dispela man nogut. So taim Jehova i tok olsem em i no inap tingim moa ol sin bilong yumi, tok bilong em i makim olsem em i no inap panisim yumi long bihain long ol dispela sin yumi bin mekim. w25.02 11 par. 14-15

Bilong yumi ken kisim pasin bilong kliagut long ol samting, yumi mas save long ol pasin bilong Jehova, samting em i tingting pinis long mekim, na ol samting em i laikim na heitim. Yu ken askim yu yet olsem, ‘Mi save gut long tingting na pasin bilong Jehova, so mi ken mekim wanem disisen we bai amamasim em?’ (Efe. 5:17) Bilong yumi ken amamasim Jehova, sampela taim yumi mas mekim ol disisen em ol wanfamili na ol pren i no inap amamas long en. Olsem, sampela papamama inap strong long pikinini meri bilong ol i mas maritim man i gat planti mani kago—o wanpela man husat inap baim bikpela braid-prais—maski dispela man i no stap strong long sait bilong bilip. Em tru olsem ol i laik bai pikinini meri bilong ol i stap gut na em i gat ol samting bilong skin em i nidim, tasol husat bai helpim em long kamap strong long sait bilong bilip? Jehova i gat wanem tingting long dispela? Yumi lukim bekim i stap long Matyu 6:33. Dispela ves i tok ol Kristen i mas wok yet long “painim Kingdom pastaim.” Tru, yumi laik onarim papamama bilong yumi na soim rispek long ol manmeri long komiuniti, tasol nambawan bikpela samting yumi mas mekim em long amamasim Jehova. w25.01 17 par. 9-10

Yumi nidim helpim bilong Jehova long wok yet long givim bel tru long autim tok taim ol man i birua long yumi long nau. (Rev. 12:17) Wai na yu ken save tru olsem Jehova bai helpim yu? Tingim beten bilong Jisas i stap long Jon sapta 17. Jisas i askim Jehova long lukautim ol aposel, na Jehova i bekim dispela beten. Buk Aposel i stori long hau Jehova i helpim ol aposel long givim bel tru long autim tok maski ol man i birua long ol. Long beten Jisas i mekim, em i askim Jehova long lukautim tu ol man i bilip long ol tok ol aposel i autim. Dispela i makim yu tu. Jehova i wok yet long bekim beten bilong Jisas; Em bai helpim yu wankain olsem em i bin helpim ol aposel. (Jon 17:​11, 15, 20) Pinis i wok long i kam klostu tru, olsem na yumi inap pilim hatwok moa long givim bel olgeta long autim tok. Tasol Jisas i strongim yumi olsem yumi bai kisim helpim yumi nidim long givim bel yet long mekim dispela wok.—Luk 21:​12-15. w25.03 18 par. 13-14

Lain bilong God i ken “amamas na singaut” bikos ol i pilim tru long bel olgeta samting Jehova i givim long ol. Ol tok i tru bilong strongim bilip, ol gutpela tok promis bilong Baibel, na ol samting yumi bilip na wet long en em yumi inap kisim long rot bilong ofa bilong Krais, dispela i mekim “bel bilong [yumi] i stap gut.” Taim yumi stori long ol dispela samting, dispela i save mekim yumi amamas tru! (Sng. 34:8; 133:​1-3) Lain bilong Jehova i stap insait long paradais bilong bilip, ol i gat tupela bikpela pasin em pasin laikim na pasin wanbel. Ol i stap “wanbel” na laikim narapela narapela, na dispela i helpim ol long piksaim long tingting laip bai olsem wanem long nupela taim. Long dispela taim, ol man i lotuim Jehova bai strongim moa yet pasin laikim na pasin wanbel winim long nau. (Kol. 3:14) Sapos wanpela i laik stap amamas tru, orait em i mas stap insait long paradais bilong bilip. Maski ol man i gat wanem tingting long lain bilong Jehova, ol i gat gutnem wantaim em na wantaim lain famili bilong em long olgeta hap bilong graun.—Ais. 65:15. w24.04 21-22 par. 7-8

Olsem wanem yumi olgeta i ken sapotim ol singel Kristen em ol i laik marit? Wanpela rot em long was gut long ol tok yumi mekim. (Efe. 4:29) Yumi ken askim yumi yet olsem: ‘Mi save tok pilai long ol lain em ol i laik marit? Taim mi lukim wanpela singel brata na wanpela singel sista i toktok, mi save kisim tingting olsem ol i gat laik long narapela narapela?’ (1 Tim. 5:13) Na tu, yumi no ken mekim ol singel Kristen i pilim olsem sampela samting i no stret long ol bikos ol i no marit. Em i bikpela samting long yumi mas painim rot long mekim ol gutpela tok bilong strongim ol singel Kristen! Olsem wanem sapos yumi ting olsem wanpela brata na wanpela sista inap stap olsem gutpela poroman marit? Baibel i tokim yumi long tingim filings bilong ol narapela. (Rom 15:2) Planti singel i no laik bai ol narapela i introdusim ol long wanpela brata o sista bilong poromanim ol, na yumi mas rispektim tingting bilong ol. (2 Tes. 3:11) Ol narapela inap amamas long yumi helpim ol, tasol yumi no ken mekim olsem inap long ol yet i askim yumi long helpim ol.—Prov. 3:27. w24.05 24-25 par. 14-15

Yumi stap long wanpela haptaim we ol samting yumi no ting long en inap kamap, na dispela inap senisim tru laip bilong yumi. Yumi tenkyu tru olsem yumi ken trastim God Jehova long helpim yumi! Taim yumi kisim helpim i kam long Jehova, dispela i save strongim bilip bilong yumi olsem “Jehova i stap laip!” (Sng. 18:46) Bihain tasol long Devit i mekim dispela tok, em i tok long God olsem: “Bikpela Ston bilong mi.” Wai na Devit i tok Jehova em i olsem wanpela Bikpela Ston, em samting i no gat laip? Baibel i save yusim dispela tok “bikpela ston” bilong helpim yumi long kliagut moa long ol pasin bilong Jehova. Long Baibel, planti taim ol wokman bilong God i save preisim em long ol gutpela pasin bilong Em na ol i save tok em i olsem wanpela Bikpela Ston. Long Lo 32:​4, em fes taim Baibel i kolim Jehova olsem “Bikpela Ston.” Hana i beten na em i tok: “I no gat wanpela ston i strong olsem God bilong mipela.” (1 Sml. 2:2) Habakuk i tok long Jehova olsem: “Bikpela Ston bilong mi.” (Hab. 1:12) Man bilong raitim Buk Song 73 i tok long God olsem, Em “i save strongim bel bilong mi. Em i olsem bikpela ston bilong mi.” (Sng. 73:26) Na tu, Jehova i tok long em yet olsem em i olsem wanpela Bikpela Ston.—Ais. 44:8. w24.06 26-27 par. 1, 3

Ol king em ol i amamasim Jehova, ol i bin givim bel olgeta long lotuim em. Baibel i stori long Josaia olsem: “I no gat wanpela king i stap paslain long em i olsem em, husat i givim bel olgeta . . . long kam bek long Jehova.” (2 Kin. 23:25) Olsem wanem long Solomon husat i bin mekim ol pasin nogut long ai bilong Jehova taim em i kamap lapun? Baibel i tok: “Em i no givim bel olgeta long Jehova.” (1 Kin. 11:4) Na Baibel i stori long Abijam, em narapela king husat i no bin stap gut long God olsem: “Em i no givim bel olgeta long Jehova.” (1 Kin. 15:3) Planti taim Baibel i yusim dispela tok “bel” bilong makim yumi wanem kain man tru long insait, na i makim tu ol laik, ol tingting, ol pasin, ol samting yumi inap mekim, ol samting i kirapim yumi long mekim samting, na ol mak yumi laik winim. Wanem insait bilong dispela tok givim bel olgeta long lotuim Jehova? Wanpela husat i givim bel olgeta long lotuim Jehova, em i no mekim nating dispela pasin bilong lotuim God, nogat. Em i lotuim God bikos em i laikim em na em i rispektim Em long laip olgeta bilong em. w24.07 21 par. 4-5

Jehova i yusim wankain tok piksa bilong soim olsem wanem em i tekewe o rausim ol sin bilong yumi. Em i tok: “Mi bai rausim ol rong bilong yu na i olsem klaut i haitim ol na rausim ol sin bilong yu na i olsem bikpela klaut i haitim ol.” (Ais. 44:22) Taim Jehova i fogivim yumi, i olsem em i yusim bikpela klaut long haitim ol sin bilong yumi na bai yumi no lukim moa na Em tu i no lukim moa. Yumi kisim wanem skul long ol dispela tok piksa? Taim Jehova i lusim ol rong bilong yumi, i no gat wok moa long bel i kotim yumi long laip olgeta bilong yumi. Long rot bilong blut bilong Jisas Krais, Jehova i lusim olgeta ol sin o ol dinau bilong yumi. Em i pinisim olgeta ol rekod bilong dispela dinau yumi gat na i olsem yumi no bin gat dinau long pastaim. Dispela i kamapim klia pasin bilong Jehova long fogivim yumi taim yumi tanim bel long ol sin yumi bin mekim. Na tu, pasin marimari bilong Jehova i opim rot long yumi inap kamap pren bilong em gen na em i helpim yumi long abrusim pasin bilong larim bel i kotim yumi oltaim. w25.02 10-11 par. 11-14

Ol elda i stap long ol komiti, ol i gat wok em Jehova i givim long ol bilong helpim kongrigesen long stap klin. (1 Kor. 5:7) Tasol long wankain taim, ol bai mekim olgeta samting ol inap mekim bilong helpim man i mekim sin long tanim bel. Bilong mekim olsem, ol elda i mas holim stretpela tingting na bilip olsem dispela man inap tanim bel. Bilong wanem? Long wanem, ol i laik bihainim pasin bilong Jehova, em Man “i gat pasin bilong sori tru na marimari.” (Jems 5:11) Luksave long hau lapun aposel Jon i holim wankain tingting olsem. Em i tok: “Ol pikinini bilong mi, mi rait na stori long ol dispela samting bai yupela i no ken mekim sin. Tasol sapos man i mekim sin, yumi gat wanpela helpim i stap wantaim Papa, em Jisas Krais, wanpela stretpela man.” (1 Jon 2:1) Sori tru, sampela taim wanpela Kristen i no laik tanim bel. Sapos olsem, em i mas seperet long kongrigesen. w24.08 25 par. 19-20

Ating yu inap traim long skelim wok yu mekim wantaim wok ol narapela inap long mekim. Sakim dispela pasin! Bilong wanem? Bikos Jehova i no save skelim yumi wantaim ol narapela. (Gal. 6:4) Olsem, Maria i givim wanpela presen long Jisas, em sanda i gat bikpela pe. (Jon 12:​3-5) Tasol wido meri husat i sot long ol samting, em i putim tupela liklik koin i gat liklik pe tru long boks mani long tempel. (Luk 21:​1-4) Maski i olsem, Jisas i lukim olsem presen dispela tupela meri wantaim i givim i kamapim klia olsem ol i gat bilip. Papa bilong em Jehova, em i tingim tru ol samting yu mekim bikos yu bilip long em na yu laikim em, maski yu pilim olsem em liklik samting tasol. Sampela taim yumi olgeta i save holim tupela tingting. Tasol tok i tru bilong God long Baibel inap helpim yumi long daunim ol kain tingting olsem. No ken holim tupela tingting na wari long wanpela samting. Jehova i tingim yu tru. Em i amamas olsem yu daunim ol laik bilong yu long mekim wok bilong em na em bai inapim promis bilong em long givim gutpela pe long yu. Jehova i tingim olgeta gutpela wokman bilong em na em i laikim ol tru. w24.10 25 par. 3; 29 par. 17-18