Ogas

Yumi beten olsem planti manmeri moa bai putim yau long dispela tok lukaut na joinim yumi long mekim lotu i tru long nau. Tasol olsem wanem long ol manmeri em ol i no laik putim yau long dispela tok lukaut long nau? Ating em laik bilong Jehova long seivim ol manmeri em ol i kirap long bilip long em taim ol i lukim Bikpela Babilon i bagarap. Sapos olsem, orait em i bikpela samting long yumi mas wok yet long mekim dispela tok lukaut long nau. Long dispela taim bai kamap, ol inap tingim bek ol samting em yumi tokim ol long en long nau. (Skelim Esekiel 33:33.) Ating ol bai tingim bek tok lukaut yumi bin tokim ol long en na dispela bai kirapim ol long joinim yumi long mekim lotu i tru paslain long pinis i kamap. Olsem dispela woda long Filipai i bilip long God bihain long “wanpela bikpela guria i kamap,” ating sampela em nau ol i no putim yau long tok yumi autim, ol bai kirap bilip long God bihain long bagarap i painim Bikpela Babilon.—Apo. 16:​25-34. w24.05 17 par. 9-10

Yumi kisim bikpela skul long ol tok aposel Pol i raitim i go long ol Hibru Kristen. Sampela bilong ol “i no . . . kisim strongpela kaikai [bilong bilip], nogat.” Ol i “kirap gen long dring susu.” (Hib. 5:12) Ol i no kisim save na bihainim ol nupela save bilong tok i tru em Jehova i skulim ol long en long rot bilong kongrigesen. (Prov. 4:18) Olsem, planti Juda Kristen i strong yet long bihainim Lo Bilong Moses maski inap 30 yia i go pinis ofa bilong Krais i bin pinisim dispela Lo. (Tai. 1:10) Ol man husat i ritim pas Pol i raitim i go long ol Hibru, ol inap wanbel olsem dispela buk i gat ol strongpela tok i tru long en. Pas bilong em i helpim ol dispela Kristen long strongim bilip bilong ol long lotu Kristen na em i strongim bel bilong ol long wok yet long autim tok.—Hib. 10:​19-23. w24.04 6 par. 15

Kirap long taim Adam na Iv i go long sait bilong Satan na ol i bikhet long God Jehova, planti bilion manmeri i dai. Wanem samting bai painim ol dispela manmeri? Liklik lain bilong ol disaipel bilong Krais, em namba bilong ol inap 144,000, ol bai kirap bek na kisim laip oltaim long heven. (Rev. 14:1) Na bikpela lain manmeri em ol i laikim Jehova, ol bai insait long “kirap bek bilong ol . . . stretpela man,” na ol bai stap laip oltaim long graun sapos ol i bihainim yet stretpela pasin long Taim Bilong Wan Tausen Yia Bilong Krais i Stap King na long taim bilong laspela traim. (Dan. 12:13; Hib. 12:1) Na tu, insait long dispela Wan Tausen Yia, “ol man nogut”—dispela i makim ol man em ol i no bin lotuim Jehova na ol man i bin “mekim ol stingpela pasin”—ol bai gat rot long senisim ol pasin bilong ol na kamap ol wokman bilong Jehova. (Jon 5:29; Luk 23:​42, 43) Tasol sampela man i bin mekim ol pasin i nogut tru, olsem na Jehova i makim olsem bai i no gat kirap bek bilong ol.—Luk 12:​4, 5. w24.05 2 par. 3; 5-6 par. 15; 6-7 par. 17

Sapos yumi laik bai Jehova i orait long yumi, ‘long bel yumi mas mekim tok tru oltaim.’ (Sng. 15:2) Dispela i makim olsem yumi no ken sakim tasol pasin bilong mekim tok giaman, yumi mas mekim sampela samting moa. Jehova i laik yumi mekim tok tru oltaim long olgeta tok na pasin bilong yumi. (Hib. 13:18) Dispela em i bikpela samting tru, “long wanem, Jehova i save heitim man bilong mekim pasin giaman, tasol em i save pas gut wantaim man bilong mekim stretpela pasin.” (Prov. 3:32) Ol manmeri em ‘long bel ol i save mekim tok tru oltaim,’ ol i no save giaman long bihainim ol lo bilong God long ai bilong ol man na long pasin hait ol i wok long brukim ol lo bilong God. Ol i save sakim pasin bilong hait na mekim rong. Man i save hait na mekim rong, em inap holim tupela tingting long savetingting i stap long sampela lo bilong Jehova. (Jems 1:​5-8) Em inap sakim tok bilong Jehova long ol samting we em i no tingim olsem bikpela samting tumas. Na bihain, taim i no gat hevi i kamap long pasin bilong em long sakim tok, dispela inap kirapim em long brukim sampela moa lo bilong God, na dispela inap nogutim pasin bilong em long lotuim Jehova. (Ekl. 8:11) Tasol yumi laik mekim onest pasin long olgeta samting. w24.06 10 par. 7-8

Lain bilong Jehova i laikim tok i tru i stap long Baibel. Tok i tru em i as bilong ol samting yumi bilip long en. (Rom 10:17) Yumi bilip olsem Jehova i kamapim kongrigesen Kristen olsem “strongpela pos na helpim bilong tok i tru.” (1 Tim. 3:15) Satan i laik tru long mekim ol samting bilong daunim pasin bilong yumi long bilip long tok bilong Baibel o long daireksen yumi kisim long oganaisesen bilong God. (Efe. 4:14) Klostu nau Satan bai yusim ol bikpela tok giaman bilong paulim ol lain manmeri bilong olgeta kantri na bai ol i birua long Jehova. (Rev. 16:​13, 14) Na yumi save tu olsem Satan bai wok strong tru long giamanim ol manmeri bilong Jehova. (Rev. 12:9) Olsem na em i bikpela samting long yumi mas skulim yumi yet long luksave long hau tok i tru i no wankain long ol tok giaman, na tu, yumi mas bihainim tok i tru. (Rom 6:17; 1 Pita 1:22) Em i bikpela samting long yumi mas mekim olsem bilong yumi ken abrusim bagarap long taim bilong traipela hevi tru! w24.07 8 par. 1-3

Taim Jehova i oganaisim lain Israel i kamap olsem wanpela lain stret, em i mekim kontrak wantaim ol. Sapos ol i wok yet long bihainim ol lo bilong em, em bai lukautim na blesim ol. Tasol sapos ol i no bihainim ol dispela lo bilong em, olsem, ol i go lotuim ol narapela god, orait em bai tekewe blesing bilong em na ol bai karim planti hevi. Maski i olsem, ol inap mekim samting bilong God i ken orait gen long ol. Ol inap “kam bek long Jehova, God bilong [ol], na harim tok bilong em.” (Lo 30:​1-3, 17-20) Dispela i makim olsem ol i ken tanim bel. Sapos ol i mekim olsem, orait Jehova bai go klostu long ol na em bai blesim ol gen. Lain manmeri em Jehova yet i bin makim, planti taim ol i sakim tok bilong em. Dispela i mekim na ol i karim bikpela hevi. Tasol Jehova i no givap long ol manmeri bilong em, maski ol i sakim tok bilong em. Planti taim em i salim ol profet bilong em i go bilong helpim ol manmeri bilong em long tanim bel na kam bek long em.—2 Kin. 17:​13, 14. w24.08 9 par. 4-5

Ol Kristen Hibru i stap long Jerusalem na Judia, ol i bin karim ol bikpela hevi long ol yia bihain long Jisas i dai. Bihain tasol long kongrigesen Kristen i kamap, ol man i mekim nogut tru long ol Kristen. Na inap 20 yia samting bihain, ol Kristen i bin karim ol bikpela hevi long sait bilong mani bikos taim bilong bikpela hangre tru i bin kamap long hap bilong ol paslain long dispela. (Apo. 11:​27-30) Tasol long yia 61 C.E. samting, ol Kristen i stap bel isi, maski i olsem, bihain ol bai karim bikpela hevi tru. Long dispela taim, ol i kisim wanpela pas em holi spirit i bin kirapim aposel Pol long raitim—em wanpela pas ol i kisim long taim stret bilong en. Dispela pas em Pol i raitim i go long ol Hibru i kamap long taim stret bilong en, long wanem, bel isi em ol Kristen i pilim i no inap stap longpela taim. Pol i givim edvais long ol Kristen long ol samting ol i ken mekim bilong sanap strong long taim traipela hevi i laik painim ol klostu nau. w24.09 8 par. 1-2

Taim yumi karim pen na hevi, wanpela rot Jehova i soim pasin laikim bilong em long yumi em long rot bilong ol wanbilip bilong yumi. Ol wanbilip i ken mekim gut bel bilong yumi long rot bilong lusim haptaim long stap wantaim yumi na putim gut yau taim yumi autim ol wari bilong yumi long ol. Ol inap kamapim wanpela Baibel ves bilong mekim gut bel bilong yumi o beten wantaim yumi. (Rom 15:4) Sampela taim, wanpela brata o sista inap kirapim yumi long holim wankain tingting olsem bilong Jehova na bai yumi inap holim yet stretpela tingting long ol hevi i painim yumi. Na ol inap helpim yumi long ol narapela rot tu, olsem redim kaikai bilong yumi taim yumi bel hevi tru na yumi no gat strong. Sampela taim yumi yet i mas askim ol narapela long helpim yumi. (Prov. 17:17) Ating ol i no save long hau yumi pilim o wanem samting yumi nidim. (Prov. 14:10) Olsem na i gutpela yu autim tingting na filings bilong yu long ol gutpela pren bilong yu. Tokim ol long samting ol i ken mekim bilong helpim yu. O ating yu inap toktok wantaim wanpela o tupela elda em yu pilim isi long toktok wantaim ol. Sampela sista i kisim gutpela helpim taim ol i toktok wantaim narapela sista i gat bikpela krismas. w24.10 10-11 par. 15-16

Planti manmeri i save was gut long kaikai ol i kisim na ol i save eksasais olgeta taim bilong ol i ken stap helti. Tasol ol i no gat tingting olsem ol bai stap laip oltaim. Sapos ol i gat laik long stap laip oltaim, dispela bai i olsem wanpela driman nating bikos bihain ol bai kamap lapun na ol hevi bilong lapun bai painim ol. Maski i olsem, Jisas i tok olsem yumi ol man inap stap “laip oltaim” olsem tok bilong em long Jon 3:16 na 5:24 i kamapim. Wanpela taim Jisas i wokim mirakel na em i givim bret na pis long planti tausen manmeri. Em narakain samting em i mekim, tasol tok em i mekim long de bihain i mekim planti manmeri i kirap nogut tru. Dispela bikpela lain manmeri i bihainim em i go long Kaperneam klostu long nambis bilong Galili, na long dispela hap em i tokim ol olsem ol manmeri bai kirap bek na ol bai stap laip oltaim. (Jon 6:​39, 40) Tok bilong Jisas i makim olsem planti manmeri em ol i dai pinis, ol bai kirap bek na yu na ol wanfamili na ol pren bilong yu bai amamas long stap laip oltaim. w24.12 8 par. 1-2

Wanpela ripot em Wol Helt Oganaisesen i kamapim i no longtaim i go pinis, em i tok planti man i save paitim meri bilong ol, mekim ol tok i daunim ol, o mekim ol pasin i no stret long ol. Maritman husat i save mekim olsem, em inap rispektim meri bilong em long ai bilong ol narapela, tasol long haus em i save mekim pasin i no stret long em. Wanem samting inap kirapim sampela maritman long abiusim meri bilong ol? Ating papa bilong ol i gat pasin bilong kros pait, olsem na ol i ting olsem em nomol long kros pait long narapela. Ol narapela i larim tingting na pasin bilong ples bilong ol i stiaim ol, ating ol i gat dispela tingting olsem bilong stap olsem man tru yu mas yusim strong bilong yu long soim meri bilong yu olsem yu bos. Ol narapela man i no lain long bosim gut bel na tingting bilong ol, na pasin bilong ol long belhat. Sampela man i save lukim ponografi planti taim, olsem na ol inap kisim tingting nogut olsem ol meri i stap tasol bilong inapim ol laik bilong ol long maritpasin. Na tu, ol ripot i kamapim olsem COVID-19 pendemik i mekim na ol dispela hevi i go bikpela moa. Maski i olsem, maritman i no ken tru larim wanpela samting i kirapim em long mekim nogut long meri bilong em na kros pait long em. w25.01 8 par. 2-3

“Yu mas laikim Jehova, God bilong yu. Yu mas laikim em long bel olgeta bilong yu, long laip olgeta bilong yu, long strong olgeta bilong yu, na long tingting olgeta bilong yu.” (Luk 10:27) Jisas i kamapim klia olsem dispela em i nambawan bikpela lo long Lo Bilong Moses. Yumi ken lukim olsem pasin bilong laikim Jehova i mas kirap insait long bel bilong yumi, dispela i makim ol laik bilong yumi, ol filings bilong yumi, na ol tingting bilong yumi. Na dispela i makim tu olsem yumi mas givim bel olgeta na strong olgeta bilong yumi long lotuim Jehova. Tasol pasin bilong laikim Jehova i makim tu olsem yumi mas laikim em long tingting olgeta bilong yumi, dispela i makim tu tingting yumi gat long ol samting. Tru, yumi no inap kliagut long olgeta tingting bilong Jehova. Tasol yumi ken kliagut moa long tingting bilong God taim yumi save gut moa long “tingting bilong Krais,” long wanem, tingting bilong Jisas i wankain long tingting bilong Papa bilong em.—1 Kor. 2:16. w25.03 8 par. 1

Jisas em man i gutpela olgeta, olsem na em i wankain long fes man Adam paslain long em i bin mekim sin. (1 Kor. 15:45) So taim Jisas i dai, em inap long givim pe i stret bilong baim bek yumi long sin bilong Adam; em i givim pe i stret long baim bek samting Adam i bin lusim. (Rom 5:19) Long dispela rot, Jisas i kamap “laspela Adam.” I no gat wok long narapela man i gutpela olgeta i mas kam na baim bek samting em Adam i bin lusim. Jisas i dai “wanpela taim tasol . . . bilong helpim ol manmeri inap oltaim oltaim.” (Hib. 7:27; 10:12) Jehova i mekim wanem bilong opim rot long yumi ken kamap pren bilong em? God i stretim rot bilong tekewe sin bilong yumi na bai yumi ken pas gut wantaim Em. Tasol bilong em i ken mekim olsem, em i mas givim pe bilong baim bek man. Taim Jisas i kapsaitim blut bilong em i dia tumas, em i givim dispela pe bilong baim bek yumi.—Hib. 9:14. w25.02 5 par. 12-13

Taim yumi tingim Jehova olsem Man i stap tru, dispela bai helpim yumi long holim stretpela tingting long ol hevi i painim yumi. Hau yumi ken mekim olsem? Yumi ken tingim olsem ol hevi i painim yumi, ol i insait long bikpela tok i kamap namel long Jehova na Satan. Satan i sutim tok long yumi ol man olsem taim yumi karim pen na hevi, yumi bai givim baksait long Jehova. (Jop 1:​10, 11; Prov. 27:11) Tasol taim yumi sanap strong na karim ol hevi i painim yumi, yumi soim olsem yumi laikim Jehova na yumi pruvim olsem Satan em i man bilong giaman. Olsem wanem? Yu wok long karim hevi long gavman i birua long yu, yu bungim hevi bilong mani, ol man i les long putim yau taim yu autim tok, o yu bungim ol narapela hevi? Sapos olsem, orait tingim olsem ol hevi i painim yu i givim rot long yu inap mekim bel bilong Jehova i amamas. Na tingim tu olsem Em bai no inap larim wanpela traim i kamap long yu winim strong bilong yu, nogat. Em bai givim yu strong yu nidim bilong karim ol hevi. w24.06 22 par. 9

Yu save long wanem ol samting inap mekim na em isi long yu pundaun long traim? Hevi inap painim yumi sapos yumi no luksave long ol samting em yumi no strong long en, o yumi bilip long strong bilong yumi yet na ting olsem yumi no inap tru long pundaun long mekim sin. (1 Jon 1:8) Tingim, Pol i tok ol lain “husat i stap strongpela Kristen,” ol tu inap pundaun long traim sapos ol i no was i stap. (Gal. 6:1) Yumi yet i mas bihainim onest pasin na luksave long ol samting em yumi no gat strong long sakim. (2 Kor. 13:5) Taim yumi luksave long ol samting we inap mekim na em isi long yumi pundaun long traim, yumi mas mekim wanem? Yumi mas strongim pasin bilong yumi long sakim ol dispela samting! Tingim dispela, long taim bilong ol man i raitim Baibel, ol geit em wanpela hap bilong banis bilong taun we em isi long ol man inap kam insait long en. Olsem na planti soldia i save was long ol geit bilong taun. Wankain olsem, yumi mas was gut tru long ol samting em yumi save olsem yumi yet i save pilim hatwok long sakim.—1 Kor. 9:27. w24.07 15 par. 5-7

Olsem teks bilong tude i kampaim, gutpela wok i makim tu wok bilong autim gutnius. So taim yumi ritim Tok Bilong God na tingim tingim long bel, dispela i save strongim bilip bilong yumi long Jehova na helpim yumi long tingim wok bilong autim gutnius bilong Kingdom olsem bikpela samting tru. Sapos yumi laik bai Tok Bilong God i ken helpim yumi, orait yumi mas sakim pasin bilong hariap tumas long ritim, stadi, na tingim tingim long bel ol tok yumi ritim. Yumi mas lusim sampela haptaim long mekim olsem. Na sapos yu ritim Baibel na yu painim wanpela skripsa we yu hatwok long kliagut long en, orait no ken abrusim tasol. I gutpela yu yusim Watch Tower Publications Index o Research Guide for Jehovah’s Witnesses long painim sampela tok moa we i eksplenim gut dispela ves. Taim yu lusim bikpela haptaim long mekim stadi bilong yu yet, yu bai strongim bilip bilong yu olsem ol tok bilong Baibel i tru. (1 Tes. 5:21) Taim yu strongim bilip bilong yu, yu bai amamas moa long tokim ol narapela long ol samting yu lainim. w24.04 15 par. 4-5

Devit i tok long Jehova olsem: “Yu gutpela tru na yu save redi long fogivim ol sin bilong mipela.” (Sng. 86:5) Maika i tok: “Wanem God i olsem yu husat i save lusim rong na sin”? (Mai. 7:18) Na Aisaia i tok: “Man nogut i mas lusim pasin nogut bilong em na man i gat tingting nogut i mas rausim tingting nogut bilong em; em i mas kam bek long Jehova, em man husat bai marimari long em, em i mas kam bek long God bilong yumi, bikos em bai fogivim em olgeta.” (Ais. 55:7) Bilong kongrigesen long Korin i ken bihainim pasin bilong Jehova, aposel Pol i tokim ol long welkamim wanpela man i tanim bel na i kam bek insait long kongrigesen na soim em olsem ol i laikim em. Taim kongrigesen i bihainim dispela daireksen, ol i soim olsem ol i “bihainim tok long olgeta samting.” Em tru olsem ol i rausim dispela man long kongrigesen sampela mun i go pinis, tasol em i kisim tok bilong stretim em na em i tanim bel pinis. Olsem na i no gat wok bilong surikim taim bilong kisim em i kam bek insait long kongrigesen. w24.08 17-18 par. 12-13

Yumi stap long haptaim we ol bikpela senis bai kamap! Klostu nau, Jisas bai skelim olgeta wan wan man. Jisas i stori long haptaim paslain long de bilong kot taim em i mekim tok profet long wanpela “sain” bai kamap bilong soim olsem em i kam i stap na “pinis bilong dispela taim i kamap pinis.” (Mat. 24:3) Dispela tok profet i stap long Matyu sapta 24 na 25, na tu, long Mak sapta 13 na Luk sapta 21. Jisas i kolim 3-pela tok piksa bilong givim ol tok lukaut long yumi. Em ol tok piksa bilong ol sipsip na ol meme, ol savemeri na ol krankimeri, na ol talen. Ol dispela tok piksa i helpim yumi long kliagut olsem Jisas bai skelim ol man long pasin ol i bin mekim. w24.09 20 par. 1-2

Jisas Krais em i stap nambawan gutpela eksampel long yumi, em i laikim Papa bilong em na em i laikim ol manmeri, na dispela i kirapim em long helpim ol narapela. Pasin laikim i kirapim em long givim bel tru na em i daunim em yet na mekim ol samting bilong helpim ol narapela. (Mat. 20:28; Jon 13:​5, 14, 15) Ol brata, sapos pasin laikim i kirapim yu long helpim ol narapela, Jehova bai blesim yu na helpim yu long winim ol mak bilong bilip yu putim, olsem long kamap wanpela kongrigesen sevan. (1 Pita 5:5) Long dispela graun, planti taim ol narapela i save givim biknem long ol man husat i save apim nem bilong ol yet. Dispela kain pasin i no stap insait long oganaisesen bilong Jehova. Wanpela brata husat i laikim ol narapela olsem Jisas i bin mekim, em i no save bosim ol narapela o apim nem bilong em yet. Sapos wanpela brata husat i laik kisim biknem i mekim wok olsem kongrigesen sevan, ating em i no inap mekim sampela wok i no gat nem bilong lukautim ol sipsip bilong Jehova em ol i dia tumas long Em. Em inap tingim ol dispela wok olsem samting nating na i no stret long em i mekim.—Jon 10:12. w24.11 15-16 par. 6-7

Long olgeta hap bilong graun, yumi nidim planti moa brata long mekim wok olsem “ol man olsem ol presen.” (Efe. 4:8) Sapos yu wanpela baptais brata, “yu gat pawa [o strong] long helpim” wok insait long kongrigesen? (Prov. 3:27) Yu redi long winim mak bilong kamap kongrigesen sevan? Sapos yu wanpela kongrigesen sevan, orait yu redi long winim mak bilong kamap wanpela elda? Yu inap senisim ol samting long sindaun bilong yu na bai yu ken i go long Skul Bilong Ol Kingdom Evanselis? Dispela skul bai trenim yu na helpim yu long mekim gut wok olsem wanpela disaipel bilong Jisas. Sapos yu pilim olsem yu no inap mekim ol dispela wok, orait beten long Jehova long dispela samting. Askim em long givim holi spirit bilong em long yu na bai yu ken mekim gut wanem ol wok em ol brata i makim yu long mekim. (Luk 11:13) Ol brata em Jisas i makim ol olsem “ol man olsem ol presen,” ol i kamapim klia olsem Jisas i wok long stiaim yumi long dispela taim bilong las de. (Mat. 28:20) Olsem wanem? Yu amamas olsem yumi gat wanpela King husat i gat pasin laikim, gutpela pasin, na em i save long ol samting yumi nidim na em i makim ol brata i winim ol mak long helpim yumi? w24.10 23 par. 16-17

Olsem wanem long olgeta samting i givim pen na hevi long lain bilong God long nau? Bihain yumi “bai lusim tingting” long ol dispela samting na “ai bilong [God] i no inap lukim gen ol dispela samting.” (Ais. 65:16) Jehova bai pinisim olgeta pen na hevi bilong yumi na isi isi bai yumi lusim tingting long olgeta samting nogut bilong bipo, yumi no inap tingim gen. Long nau, bel bilong yumi i save stap isi taim yumi go long ol miting Kristen bilong yumi, em ples we yumi stap isi na yumi no tingim ol samting i mekim yumi wari na tingting planti. Yumi helpim ol wanbilip Kristen long stap isi tu taim yumi kamapim pasin laikim, amamas, bel isi, gutpela pasin, na pasin isi—em ol pasin holi spirit bilong God i kamapim. (Gal. 5:​22, 23) Em i gutpela blesing tru long yumi stap insait long oganaisesen bilong God! Ol lain i stap yet insait long paradais bilong bilip bai lukim olgeta truim bilong tok promis bilong God long wokim “nupela skai na nupela graun.” w24.04 22 par. 9-10

Taim tupela man na meri i pren, dispela em taim bilong amamas, tasol dispela em wanpela bikpela disisen ol i mekim we inap makim olsem tupela bai marit o nogat. Long weding de bilong tupela, man na meri i laik marit i save mekim tok promis long ai bilong Jehova olsem ol bai laikim na rispektim narapela narapela long laip olgeta bilong ol. Tasol paslain long yumi mekim wanpela tok promis, yumi mas skelim gut olgeta samting. Na em i bikpela samting long mekim olsem tu taim yu laik mekim tok promis bilong marit. Taim man na meri i pren, dispela em gutpela rot bilong tupela i ken save gut long narapela narapela na bai ol i ken mekim gutpela disisen. Sampela bai mekim disisen long marit, na sampela bai mekim disisen olsem ol i no ken pren moa. Tasol taim man na meri i mekim disisen long ol i no ken pren moa, dispela i no makim olsem tupela i mekim rong, nogat. Risen na tupela i pren em bilong save gut long narapela narapela, na dispela i helpim ol long mekim disisen olsem ol bai marit o nogat. Wai na em i bikpela samting long yumi mas holim stretpela tingting long pasin bilong prenim wanpela? Taim ol singel i holim stretpela tingting, ol bai i no inap prenim wanpela em ol i no tingting long maritim em. w24.05 26-27 par. 3-4

Sampela taim, ol yangpela Kristen inap surik long sambai long ol bilip bilong ol. Ol inap pret o pilim sem long stori long tingting ol i gat long bilip bilong evolusen taim tisa i skulim ol long dispela topik. Bilong wanem? Ating tisa bilong ol inap tok olsem bilip bilong evolusen em i tru, na i no wanpela stori nating. Sapos yu wanpela papa o mama, hau yu ken helpim pikinini bilong yu long sanap strong na sambai long ol bilip bilong em? Strongim em olsem em i no ken sem long bilip bilong em olsem i gat Krieta i stap. Wai na yumi tok olsem? Bikos planti saientis tu ol i bilip olsem ol samting i gat laip i no kamap nating, nogat. Ol i lukim ol evidens i soim olsem wanpela Man i gat bikpela save tru i bin wokim olgeta samting i gat laip em ol i narakain tru. Olsem na ol dispela saientis i no wanbel long bilip bilong evolusen. Pikinini bilong yu i ken strongim ol bilip bilong em long rot bilong tingim wanem samting i bin kirapim planti bratasista long bilip tru olsem God i bin wokim olgeta samting i gat laip. w24.12 18 par. 14-15

Jisas i bilip olsem gutpela samting bai kamap long wok autim tok bilong em. Dispela i helpim em long amamas yet long mekim dispela wok. Olsem, klostu long pinis bilong yia 30 C.E., Jisas i lukim olsem planti man i redi long putim yau long tok em i autim, na em i tok ol i olsem kaikai i redi pinis long gaden. (Jon 4:35) Inap 1-pela yia bihain, em i tokim ol disaipel bilong em olsem: “Planti kaikai i mau pinis long gaden.” (Mat. 9:​37, 38) Na bihain em i kamapim klia gen dispela tok olsem: “Planti kaikai i mau pinis . . . Askim Bosman bilong bungim kaikai long salim ol wokman i go bilong bungim kaikai bilong em.” (Luk 10:2) Jisas i bilip tru olsem ol manmeri bai putim yau long gutnius em i autim, na em i amamas taim ol i mekim olsem. Jisas i skulim ol disaipel bilong em long bilip olsem gutpela samting bai kamap long wok autim tok bilong ol, na dispela bai strongim ol long givim bel yet long autim tok. w25.03 18-19 par. 15-16

Jehova em i Ples Hait bilong yumi. Wankain olsem wanpela bikpela ston inap stap olsem ples hait bilong wanpela man long taim bilong bikpela win na ren, Jehova i save lukautim yumi taim yumi bungim ol bikpela hevi tru. Em i save lukautim yumi na em i helpim yumi long save tru olsem maski yumi karim ol pen na hevi long nau, ol i bilong sotpela taim tasol. Na em i tok promis olsem: Long bihain, em bai pinisim olgeta samting i save bagarapim bel isi bilong yumi na mekim yumi tingting planti. (Ese. 34:​25, 26) Wanpela rot yumi larim Jehova i stap olsem Ples Hait bilong yumi em long rot bilong beten long em. Taim yumi beten long Jehova, em i save givim yumi “dispela bel isi bilong God” we i save lukautim bel na tingting bilong yumi. (Fili. 4:​6, 7) Oltaim Jehova i stap redi long helpim yumi. Yumi ken trastim em bikos em i “dispela Bikpela Ston i save stap oltaim.” (Ais. 26:​3, 4) Oltaim em bai stap laip bilong inapim ol tok promis bilong em, harim ol beten bilong yumi, na givim helpim yumi nidim. Na tu, yumi ken save olsem Jehova bai helpim yumi bikos em i save stap gut long ol man i mekim wok bilong em. (2 Sml. 22:26) Em i no inap lusim tingting long ol wok yumi mekim, na oltaim em bai blesim yumi.—Hib. 6:10; 11:6. w24.06 27 par. 4-6

Yumi mas was gut long ol amamas nogut we inap mekim na tingting bilong yumi i bruk na yumi no givim bel olgeta long lotuim Jehova. Na tu, yumi mas was gut long ol poroman nogut na pasin bilong tingting tumas long bungim mani kago. Sapos yumi luksave olsem wanpela samting i wok long daunim pasin bilong yumi long laikim Jehova, orait kwiktaim yumi mas mekim samting bilong rausim. (Mat. 5:​29, 30) Yumi no ken larim tingting bilong yumi i bruk. Yumi inap giamanim yumi yet na ting olsem yumi mekim bikpela wok moa bilong Jehova so i no gat wok long yumi sakim ol samting nogut i laik pulim yumi. Yumi ken tok piksa olsem, yu sanap ausait na san i strong na ples i hot nogut tru. Na yu go insait long haus na yu onim fen o eakon long kolim skin. Tasol wanem samting bai kamap sapos yu larim dua i op i stap? Kwiktaim hatpela win bai kam insait long haus bilong yu. Yumi kisim wanem skul? Yumi mas mekim sampela samting moa bilong strongim pasin pren bilong yumi wantaim Jehova, na yumi no ken kisim tasol ol tok bilong strongim bilip. Na tu, yumi mas sakim ol tingting na pasin bilong dispela graun we inap bagarapim tingting bilong yumi, wankain olsem yumi pasim dua long hatpela win long kam insait long haus.—Efe. 2:2. w24.07 21 par. 6-7

Yumi ken piksaim long tingting bikpela pen Jisas i pilim taim ol man i rabisim em na semim em na mekim pasin i no stret long em. Maski em i karim bikpela pen na hevi, em i no larim dispela i daunim em. Em i no mekim tok olsem bagarap i mas painim ol soldia em ol i bin nilim em long diwai pos, nogat. Em i beten olsem: “Papa, fogivim ol, ol i no save long samting ol i mekim.” (Luk 23:34) Taim yumi beten askim God long helpim ol lain i mekim pasin i no stret long yumi, dispela inap helpim yumi long lusim pasin bilong bel kaskas na belhat long ol, na tu, em inap senisim tingting yumi gat long ol. Yumi bai karim yet ol hevi long ol man i mekim pasin i no stret long yumi paslain long haptaim nogut bilong nau i pinis. Maski yumi karim wanem hevi, oltaim yumi mas beten askim Jehova long helpim yumi. Na tu, yumi mas bihainim pasin Jisas i mekim taim ol man i mekim pasin i no stret long em na yumi mas wok yet long bihainim ol stiatok bilong Baibel. Taim yumi mekim olsem, yumi ken bilip tru olsem Jehova bai blesim yumi.—1 Pita 3:​8, 9. w24.11 6 par. 16; 7 par. 17, 19

Jehova i no save orait tasol long olgeta kain pasin, na em i no save orait long pasin bilong mekim sin. (Sng. 5:​4-6) Em i laik bai yumi rispektim ol stretpela lo bilong em na em i putim ol dispela lo long Baibel bilong yumi ken bihainim. Tasol Jehova i save olsem yumi no gutpela olgeta, olsem na em i no ekspektim yumi long bihainim stret olgeta lo bilong em. (Sng. 130:​3, 4) Tasol long wankain taim, em i no orait long ol man nogut em “ol i ting bikpela pasin helpim bilong God i givim rot long ol long mekim pasin bikhet na i no sem.” (Jut 4) Baibel i tok: “Ol man i sakim tok bilong God, ol bai bagarap olgeta” long pait bilong God long Armagedon. (2 Pita 3:7; Rev. 16) Tasol Jehova i no laik bai wanpela man i kisim bagarap. Baibel i tokaut klia olsem “em i laik bai olgeta i tanim bel.” (2 Pita 3:9) Ol elda Kristen i bihainim pasin bilong Jehova long i no les kwik taim ol i traim long helpim ol man i mekim sin long senisim ol pasin bilong ol na pas gut gen wantaim Jehova. w24.08 26 par. 1-2

Wankain olsem Jehova, yumi tu i ken larim pasin laikim i kirapim yumi long givim ol samting bilong skin long ol narapela. Olsem, yu save long wanpela wanbilip husat i nidim kaikai o klos samting? Jehova i ken yusim yu long givim ol samting em i nidim. Lain bilong Jehova i gat nem long pasin bilong givim samting long ol narapela taim disasta i kamap. Olsem, long taim bilong COVID-19 pendemik, ol bratasista i redi long serim kaikai, klos, na ol narapela samting wantaim ol narapela wanbilip em ol i sot long ol samting. Na tu, planti i amamas long givim ol kontribiusen bilong helpim wok long olgeta hap bilong graun. Dispela mani ol i givim i helpim rilif wok i kamap long olgeta hap. Ol i bihainim tok bilong Hibru 13:16 olsem: “No ken lusim tingting long mekim gutpela pasin na serim ol samting wantaim ol arapela. Long wanem, God i save amamas long ol kain sakrifais olsem.” w24.09 27 par. 6-7

Piksaim long tingting dispela samting. Yu wok long painim wok mani bilong sapotim famili bilong yu. Na yu painim pinis tupela wok mani. Nau yu bai skelim gut olgeta samting long dispela tupela wok, olsem em wanem kain wok, sediul bilong wok, na hamas haptaim yu bai lusim bilong go na kam, na ol narapela samting. Tupela wok mani wantaim i stret long ol Kristen i ken mekim. Ating yu laikim moa wanpela bilong dispela tupela wok mani bikos em wok yu save laikim o bikos pe i antap moa. Tasol i gat ol narapela samting tu em yu mas tingim gut paslain long yu mekim disisen. Olsem wanem? Dispela tupela wok mani inap pasim yu long go long miting bilong kongrigesen? O ating ol inap kisim bikpela haptaim bilong yu na nau yu no gat taim long lukautim gut famili na helpim ol long stap gut na pas gut wantaim Jehova? Ol kain askim olsem bai helpim yu long skelim gut “wanem ol samting i bikpela samting moa”—em lotu bilong yu na ol samting famili i nidim—winim mani kago samting. Taim yu mekim olsem, yu bai mekim gutpela disisen em Jehova bai blesim. w25.01 17-18 par. 11-13

Maski sapos ol narapela i mekim pasin i no stret long yu, yu ken bilip tru olsem Jehova i laikim yu na em i tingim yu tru. Sapos yu pilim olsem ‘bel bilong yu i bagarap,’ orait tingim olsem Jehova i lukim olsem yu gat gutpela bel, olsem na em i kirapim yu long i go klostu long em. (Jon 6:44) Oltaim em i redi long helpim yu bikos yu dia tumas long em. Yumi ken kisim save long hau Jehova i pilim taim yumi skelim eksampel bilong Jisas. Taim Jisas i stap long graun, em i tingim tru ol lain em ol narapela i luk daun long ol, na em i mekim pasin sori long ol. (Mat. 9:​9-12) Taim wanpela meri i gat bikpela sik i tatsim klos bilong Jisas bikos em i laik kamap orait, Jisas i mekim gut bel bilong em na tok amamas long bilip bilong em. (Mak 5:​25-34) Jisas i save bihainim gut tru pasin bilong Papa bilong em. (Jon 14:9) So yu ken bilip tru olsem Jehova i tingim yu tru na em i lukim ol gutpela pasin bilong yu, olsem pasin bilong yu long bilip na laikim em tru. w24.10 7 par. 4-5

Long laip bilong Devit, em i karim sampela bikpela hevi we i mekim na em i krai. Ol narapela i heitim em na ol man em i trastim ol i no stap gut long em. (1 Sml. 19:​10, 11; 2 Sml. 15:​10-14, 30) Wanpela taim, em i tok: “Mi wari tumas na dispela i pinisim strong bilong mi; long nait olgeta mi krai na aiwara bilong mi i wasim bet bilong mi; mi krai moa yet na ples bilong mi long slip i pulap long aiwara.” (Sng. 6:6) Maski Devit i karim planti hevi, em i bilip tru olsem Jehova i laikim em. Em i tok: “Jehova bai harim krai bilong mi.” (Sng. 6:8) Ol tok i stap long teks bilong yumi i kamapim klia olsem Jehova i laikim yumi na em i tingim yumi tru. Devit i pilim olsem Jehova i bungim ol aiwara bilong em na putim insait long wanpela beg wara o raitim ol long wanpela buk. Em i save tru olsem Jehova i lukim em na tingim pen na hevi em i karim. Devit i bilip tru olsem gutpela Papa bilong em long heven i save long ol hevi em i karim, na i no dispela tasol, em i save tu long hau Devit i pilim taim em i karim ol dispela hevi. w24.12 22-23 par. 11-12