Pas i Litimapim Nem Bilong En

Yes Ol Brata:

Yupela i bin tok dispela buk Yu Inap i Stap Oltaim long Paradais long Graun em i ‘gutpela bilong lainim ol man,’ na yupela i tok stret.

Pastaim mi olsem Tomas—mi no bilip—mi lukim dispela buk i gutpela na i no hatwok long kaunim na kisim save long en, tasol ol man yumi autim tok long ol long ol haus bai ol i laikim, na ol man long ol ofis, na ol man i stap long haus klostu?

Yes ol i laikim! Ol i laikim tru! Mi wok long ofis bilong wanpela dokta na mi tilim planti long ples wok bilong mi, na dispela buk i tilim em yet long wanpela famili i stap long haus klostu long haus bilong mi.

Wanpela yangpela meri i stap long dispela haus, em i gat 13 krismas. Em i meri bilong toktok na taim em i kirap long moningtaim i go inap long taim em i slip long apinun em i go i kam mekim kain kain samting.

Wanpela apinun em i kam lukim pikinini meri bilong mi. Em i kisim dispela “liklik retpela buk” na nau pasin bilong em i senis olgeta. Em i stadi na lainim ol tok bilong Sapta 1 na em i kirap long i go long olgeta miting taim papa i orait long em i go. Em i klinim rum bilong em na maus bilong em. Em i no mekim tok doti moa. Em i no poroman moa wantaim ol poroman nogut. Em i no harim moa ol musik na singsing nogut. Nau em i bihainim pasin daun na pasin isi na em i save harim tok. Bai yu amamas long i stap klostu long em. Em i senisim tru pasin bilong em, olsem na nau mama bilong em tu i laik stadi. Em i laik i stap amamas wankain olsem pikinini bilong em.

Mi no save husat moa bai kirap long stadi, tasol mi beten na mi ting tupela hia bai givim bel long Jehova wantaim Pikinini bilong em na tilim dispela “liklik retpela buk” long ol narapela man.

Mi salim sori tru long yupela,

D.L.F.