Lotu i Tru—Man i Kamapim o God i Kamapim?
KLOSTU olgeta save ol man i kisim, ol yet i bin kisim.
Ol i lain long kamapim kaikai na long kukim kaikai na long wokim haus. Ol i mekim traim na ol i lain. Tasol nau long taim bilong yumi ol i kisim bikpela save na ol i lain long mekim planti samting, i no ol samting bilong lukautim skin bilong ol tasol. Nau ol inap brukim atom, na ol inap wokim ol balus i wokabaut spid tru long antap, na ol inap salim ol man i go long ples antap, olsem long mun samting. Orait, yu ting ol inap kisim save tu long rot bilong lotu tru long God?
Baibel i tok ol man yet i no inap kisim dispela save. Sam 143:10 i tok: “Yu God bilong mi, mi laik yu skulim mi gut bai mi bihainim laik bilong yu. Mi laik bai Spirit bilong yu i mekim gut long mi na stiaim mi long gutpela rot.” Man bilong raitim Sam i save, maski ol man i gat bikpela save na ol i lain pinis long wokim kain kain samting, tasol God i mas helpim ol bambai ol inap save long laik bilong em (Lukim Jeremaia 10:23.) God i mas givim dispela save long ol man.
Tasol em i mekim long wanem rot? Planti milion man i bilip olsem long rot bilong Baibel God i bin kamapim laik bilong em long ol man. Tasol sampela man ol i no bilip olsem. Bikpela save ol man i kisim pinis i paulim tingting bilong ol dispela man na ol i ting i no gat wok long God i givim dispela save long yumi. Ating bai ol i tok, ‘Taim mama i karim yumi, dispela save i stap long bel bilong yumi,’o ‘Yumi ken wokim tingting bilong yumi yet na kisim dispela save,’ o ‘Ol misin inap lainim yumi long rot bilong lotu tru long God.’
Tasol sapos dispela tok bilong ol i stret, orait ol man yet i mas kamapim lotu bilong ol, na tingim wanem wanem samting bai ol i bilip long en, na wanem wanem pasin i stret ol i mas bihainim. Tasol yu ting dispela i stret? Kain lotu olsem, em ol man yet i kamapim, yu ting dispela kain lotu inap helpim yumi olsem wanem? Yu ting em inap helpim yumi na bai yumi pilim olsem yumi inap long ai bilong God? (Matyu 5:3) Yu ting kain lotu olsem inap bekim askim bilong ol man i laik save long tok i tru? Yu ting em inap helpim ol long save tru long God?
Orait, bilong bekim ol dispela askim yumi ken skelim wanpela lotu em lain bilong en ol i bihainim tingting bilong ol man na ol i wok long painim God, em lotu Hindu.