Ripot Bilong Wok Bilong Kingdom
‘Ol i Kirapim Biknem Bilong Tok Bilong God’
OL MAN i autim tok i tru bilong Kingdom, ol inap ‘kirapim biknem’ bilong dispela tok ol i autim. Ol inap mekim olsem wanem? Gutpela pasin ol i mekim inap kirapim biknem bilong en. Aposel Pol i tok olsem, em i tok ol wokboi Kristen i mas i stap aninit long ol bosman bilong ol na “long olgeta pasin bilong ol bai ol wokboi i kirapim biknem bilong dispela tok yumi save autim long ol man, em dispela tok bilong God.” (Taitas 2:10) Sampela stori bilong wok bilong ol brata long Ajentina i kamapim long ples klia olsem sapos yumi mekim gutpela pasin, dispela inap kirapim biknem bilong dispela tok yumi autim, em tok bilong God:
◻ Sikispela Witnes Bilong Jehova ol i wok long wanpela supamaket na ol man i save tok, papa bilong dispela supamaket i gat strongpela lo. Taim ol dispela Witnes i tokim em ol i laik malolo inap wanpela de bambai ol i ken i go long Memorial, em i tok: ‘Yupela i mas tingting gut: Yupela i laik holim wok bilong yupela o i go long miting bilong yupela.’ Long hap ol i stap long en i hatwok long kisim wok, tasol ol dispela Witnes i go long Memorial. Long tumora ol i go long wok, tasol ol i ting olsem bos bai pinisim ol long wok. Ol i kirap nogut, long wanem bos i no pinisim ol, na em i tokim 4-pela ol i bin kisim wok bilong liklik taim tasol, ol i ken wok oltaim long em. Na em i apim pe bilong olgeta 6-pela! Bihain tupela i laik kirap mekim wok painia regula, olsem na papa bilong supamaket i senisim aua bilong wok bilong ol bilong helpim ol. Bilong wanem em i tingim gut ol na em i laik helpim ol? Long wanem ol i save mekim stretpela pasin, ol i no save stil samting, na ol i save wok strong—em i no laik bai kain gutpela wokboi olsem i lusim em.
Olsem na gutpela pasin bilong dispela 6-pela Witnes i ‘kirapim biknem’ bilong dispela tok bilong God ol i autim na i litimapim nem bilong Jehova.
◻ Wanpela sista i wok long wanpela haus marasin, tasol aua bilong wok i bikpela na em i no inap i go long ol miting o mekim wok painia olsem em i laik mekim. Papa bilong dispela haus marasin i no laik senisim aua bilong wok, olsem na sista i lusim dispela wok. Em i kisim wok long haus bilong wanpela meri na em i kirap mekim wok painia helpim. Sampela mun bihain papa bilong haus marasin i kam painim em long haus. Em i laik bai sista i wok gen long em long wanem wanem aua sista i laikim. Bilong wanem em i laik bai sista i wok gen long em? Long wanem sista “i gutpela pasin tru.”
◻ Gutpela pasin bilong narapela sista i ‘kirapim biknem’ bilong tok bilong God long narapela rot. Ripot i kam long Ajentina i tok tupela sista i go long wanpela gutpela haus i gat bikpela nupela ka i stap ausait. Tupela i pret liklik, long wanem ol i save dispela em haus bilong wanpela maniman. Tasol meri bilong haus i amamas long lukim tupela. Ol i toktok wantaim em inap tupela aua na bekim ol askim bilong em. Tupela sista i tok, ‘Mitupela pasim tok long i go lukim em long wik antap. Mitupela i amamas, tasol i gat wanem as tru na em i laik harim tok bilong mipela, em mipela i no save. Tasol long wik antap em i tokim mipela long dispela samting.’
Meri bilong haus i tok: “Bipo mi stap long Mar del Plata na mi save long wanpela yangpela meri em i save mekim nabaut na em i no save sindaun gut. Bihain em i kirap long stadi wantaim ol Witnes na lainim ol tok bilong Baibel. Wantu pasin bilong em i senis. Mi wantaim ol narapela meri i stap klostu long em, mipela kirap nogut; em i senisim tru pasin bilong em. Nau em i gat gutpela nem na em i maritim wanpela man yupela i kolim olsem elda na em i gat ol gutpela pikinini.”
Dispela meri i lukim dispela yangpela meri i senisim tru pasin bilong em taim em i kamap wanpela Witnes Bilong Jehova na dispela samting i kirapim dispela meri long putim gut yau long tok bilong ol Witnes. Em wantaim man bilong em tupela i kirap long stadi na long i go long ol miting long Haus Kingdom. Tupela sista i stori long ol dispela samting i bin kamap na bihain tupela i tok: “ Em nau, sapos yumi bihainim gutpela pasin, dispela inap helpim gutpela tok yumi autim na litimapim nem bilong Jehova.”