Taim Bilong Amamas Bilong Ol Misineri Long Japan
LONG Fraide 17 Me, 1985 ol 76 misineri i stap long Japan ol i kisim gutpela amamas bilong spirit. Ol misineri long Japan i bikpela lain, winim ol narapela kantri, na inap 40 yia pinis ol i bin autim ol tok i tru bilong Baibel. Wanpela taim long olgeta yia ol i save bung wantaim. Ol i amamas long i kam bung wantaim. Ol i lusim ol 10-pela haus misineri bilong ol na ol i go bung long brens-ofis long Ebina. Sampela i kam longwe, long wanem ol i save raun mekim wok sekit o wok distrik samting.
Ol i bung wantaim na narapela i gude long narapela na ol i amamas long toktok wantaim. Long 1 klok apinun wasman bilong son i kirapim miting bilong ol. Pastaim em i kolim nem bilong ol na olgeta wan wan misineri i bekim na kolim wanem kantri em i bin lusim bilong i kam long Japan, na wanem klas bilong Giliat em i go long en, na hamas yia em i bin mekim wok misineri. Sampela ol i bilong namba 7 klas bilong Giliat na ol i bin i stap gut long wok misineri bilong ol winim 37 yia! Wasman bilong son i stori liklik long Skul Giliat i bin kirap long yia 1943 na bihain em i tok, ol misineri i bin mekim gutpela wok, long wanem ol i bin lainim tok Japan na em hatwok. Bihain em i kamapim sampela askim long olsem wanem ol i ken helpim ol manmeri bilong Japan moa yet long kisim save long ol tok i tru bilong Baibel na ol misineri i bekim tok.
Sampela ol i gat gutpela save long autim tok ol i stori olsem ol i save mekim wok long wanpela liklik buk nem bilong en long tok Inglis “Look! I Am Making All Things New.” Ol i tok dispela liklik buk i gutpela bilong helpim ol man bambai ol i ken save long stori bilong Baibel na sampela bikpela as tok bilong en. Ol i toktok wantaim na bihain wanpela misineri i kamapim tingting bilong olgeta misineri long dispela pasin bilong toktok wantaim olsem, em i tok: “Mipela i amamas, long wanem nau mipela i save ol brata long nambawan ofis ol i tingting long helpim wok hia long Japan—mipela save long dispela samting na dispela i strongim mipela long wok i go yet.” Olgeta misineri i amamas, long wanem ol inap insait long dispela miting na mekim sampela tok bilong kamapim tingting bilong ol long rot bilong mekim gutpela moa yet wok bilong autim tok. Wanpela misineri i tok em i pilim tru dispela pasin bilong oganaisesen bilong Jehova—olsem ol i laik save long hevi bilong ol misineri na ol i laik helpim ol long mekim gut wok bilong ol. Na wanpela i tok, ‘Mipela i amamas long ol gutpela tok ol i givim long mipela bilong helpim mipela long autim tok long ol hap mipela i save autim tok planti taim long en.’
Ol i toktok wantaim pinis na bihain ol i harim bekim bilong sampela askim long tok bilong Baibel. Sampela i tok: ‘I olsem mipela i stap gen long Skul Giliat.’ Na wanpela i tok: ‘Dispela hap program bilong miting i kirapim mi long tingting strong long “digim i go daun” na kisim save long as bilong ol tok bilong Baibel.’ Bihain ol i go kisim liklik kaikai na ol inap toktok wantaim ol misineri i kam longwe longwe long ol narapela narapela hap bilong Japan. Long apinun ol misineri i stori long sampela ekspiriens bilong ol. Wanpela misineri i stori long wanpela yangpela meri em i kamap Witnes, long wanem, taim em i pikinini yet em i bin lukim bikpela wok ol misineri bilong lain Witnes i mekim long hap bilong em long Nagasaki. Nau dispela yangpela meri wantaim man bilong em i mekim wok bilong Jehova! Narapela misineri i stori long gutpela Baibel-stadi em i kirapim long wanem em i no les; em i wok strong i go inap long “laspela haus” na em i painim pinis dispela man i laik harim tok.
Dispela bung bilong ol misineri i strongim ol na ol i go bek long ples wok bilong ol redi long wok strong i go. Ol i pilim tru gutpela pasin Jehova i mekim long rot bilong oganaisesen bilong em bilong strongim ol. Long Sande, wasman bilong son, em A. D. Schroeder, em i mekim tok na inap 174,959 i bung long ol narapela narapela hap bilong Japan na harim dispela tok long rot bilong telefon. Long pinis bilong dispela tok, Brata Schroeder i tokaut olsem nau ol inap kisim nupela Baibel long tok Japan, em New World Translation of the Holy Scriptures—With References. Em narapela nupela samting ol 102,206 Witnes long Japan inap mekim wok long en!