Wok Bilong God i Go Bikpela Moa Long Korea

WOK bilong autim tok bilong Kingdom long Korea em i go bikpela moa, wankain olsem long ol narapela hap bilong graun. Ol i bin wokim nupela brens-ofis long Kongdo, long Korea, na ol i bin dediketim dispela haus long Me 8, 1982. Na tripela yia bihain, olsem long Me 11, 1985, ol i dediketim dispela nupela hap ol i bin skruim long olpela hap. Dispela samting i makim olsem wok bilong ol Witnes Bilong Jehova i go bikpela moa long Korea.

Haus i gat tripela hap bilong en, long han sut em ol ofis. Bipo i gat tupela plua tasol, na ol i wokim i go antap inap wanpela plua moa na nau i gat tripela plua. Na long namel, em faktori. Bipo i gat wanpela plua, na nau ol i wokim i go antap inap tupela plua moa, na i gat tripela plua olgeta. Na long han kais, bipo i no gat wanpela samting i stap, na ol i bin wokim haus long dispela hap i go antap inap tripela plua, na i gat ol rum slip bilong ol brata sista i wok long Betel na ples bilong ol i kaikai. Ol haus yu lukim long baksait, em haus Betel long nau.

Tasol bilong wanem ol i mas skruim haus i go bikpela? Long 1982, taim nupela faktori i kirap wokim ol magasin, ol i wokim 380,000 Wastaua na Kirap! long olgeta mun. Tasol nau ol i wokim 760,000 magasin long olgeta mun. Olsem na yumi save, ol bai mekim gutpela wok long dispela hap bilong haus faktori ol i bin skruim i go bikpela. Ol i wokim planti magasin moa, olsem na nau inap 86 brata sista i wok long Brens-ofis long Korea. Inap 120 brata sista inap slip long nupela haus Betel, olsem na dispela haus em inap tru long ol.

Brata A. D.Schroeder, em i wanpela bilong Lain Bilong Bosim Ol Witnes long Bruklin, Nu Yok, em i stap taim ol i dediketim dispela nupela haus. Ol brata bilong Komiti Bilong Brens ol i stori long wok autim tok long Korea, na stori long wok bilong sanapim nupela haus Betel bilong ol. Inap 2,199 brata sista i harim dispela tok, ol i tenkyu tru long Jehova long ol gutpela blesing em i kapsaitim long ol.