Ol i Bagarapim Nem Bilong God−Long Wanem Ol i No Save Kolim
JEHOVA i tingim nem bilong em na em i mekim pasin marimari long lain Isrel, nogut ol narapela lain i tok bilas long nem bilong em. (Esikiel 20:9, 13, 14, 22) Tasol bihain ol Isrel i no kolim moa nem bilong God, na bihain bihain ol i no save moa ol i mas kolim olsem wanem. Taim ol i no kolim nem bilong God i olsem ol i bagarapim dispela nem.
Wanpela man, nem bilong em R. Laird Harris, em i stori long dispela samting na em i tok: ‘Ol man i no save ol Isrel bilong bipo i save kolim nem bilong God bilong ol olsem wanem. Dispela i narapela kain samting tru. Long wanem, long bipo, lotu bilong ol Isrel tasol i gutpela. Em i namba wan lotu bilong lotuim wanpela god tasol, na long ol olpela lotu, dispela wanpela lotu tasol i go kamap long olgeta hap bilong graun. Dispela wanpela lotu tasol i mekim ol samting bilong spirit tasol na i no gat wanpela piksa samting bilong god bilong en. Tasol sori tru, dispela wanpela lotu tasol i no save moa ol i mas kolim nem bilong god bilong ol olsem wanem. Dispela samting i kamap em i narapela kain tru.” Ol gutpela man bilong bipo ol i pret long kolim dispela nem, nogut ol i bagarapim, tasol ol i no save bihain bai ol man i no inap kolim moa. Olsem na long narapela rot ol i bagarapim dispela nem. Taim ol i no kolim, dispela samting i bagarapim dispela Nem wankain olsem sapos ol i kolim nating. Tasol yumi save, ol Hibru bilong bipo ol i bin kolim na raitim nem bilong God.’−Buk The Law and the Profets, em John H. Skilton i stretim na redim, Nutli, Nu Jesi, 1974, pes 215.
Ol Isrel i save, sapos ol i lusim tingting long nem bilong Jehova bai Em i “save.” (Sam 44:20, 21) Taim ol i mekim olsem, “God i kam long ol man bilong ol arapela lain, bilong kisim lain manmeri” bilong holim nem bilong em. (Aposel 14:15) Long nau yumi no save gut long kolim nem bilong God long tok Hibru, tasol planti man i raitim fopela leta Hibru bilong nem bilong God olsem Jehova. Long nau, winim 3 milion manmeri i kisim nem olsem ol Witnes Bilong Jehova, na ol i amamas long nem bilong God bilong ol i stap long ol.