Ating Bihain Bai Ol Lapun i Stap Nogut?
KING Devit i tok: “Bipo mi yangpela, na nau mi lapun pinis.” (Sam 37:25) Long taim bilong ol man bilong Baibel, ol lapun i liklik lain tasol na ol man i save tingim gut ol. Tasol long nau lain bilong ol i wok long i go bikpela na ol man i no tingim gut ol.
Long hap bilong Amerika ol i tok i gat 26 milion manmeri ol i winim pinis 65 krismas. Lain bilong ol i wok long i go bikpela na long yia 2040 ating bai i gat 78 milion i stap! Na i wankain long ol narapela kantri tu. Wanpela nius bilong Esia (Asiaweek) i tok, sampela kantri long hap bilong Esia i ting olsem lain bilong ol lapun long hap bilong ol bai i go bikpela inap dabol insait long 10-pela yia moa. Bai ol lapun i kamap bikpela lain, winim ol yangpela, na dispela bai nogutim ol lapun. Long nau tu planti lapun i stap nogut—ol i stap rabis na i no gat haus. Sampela ol i stap long ol haus sik—famili bilong ol i lusim ol i stap. No gat man i go lukim ol; no gat man bilong lukautim ol. Long planti kantri bipo ol i save givim biknem long lapun papamama, nau ol i no tingim ol na sampela i mekim nogut long ol.
Wanpela man i raitim tok long wanpela nius (G. M. Ssenkoloto long World Health) na em i tok: ‘Bipo, long planti kantri long Afrika na long planti kantri i stap rabis, olgeta famili i save lukautim ol lapun meri long lain bilong ol. Sapos wanpela meri i no gat pikinini bilong lukautim em, orait ol manmeri i stap klostu o olgeta manmeri bilong ples i save lukautim em.’ Tasol nau narapela kain pasin i kamap. Dispela man i tok: ‘Long nau planti man i no gat wok, na ol gavman i no tilim gut kaikai samting, na ol man i laik kisim planti samting bilong skin, na ol i wok long kisim nem—olgeta dispela samting i mekim na ol man i no bihainim gutpela pasin bilong bipo long lukautim gut ol lapun.’
Ol samting i kamap tru olsem Agur, em wanpela man bilong raitim tok long Baibel, em i tok: “Sampela pipel i save tok, God i ken mekim nogut long papamama bilong ol.” (Provep 30:11) Tru tumas, bipo ol man i save givim biknem long ol lapun na harim tok bilong ol na mekim gut long ol, tasol nau nogat. Ol i pilim olsem ol lapun i no inap mekim wanpela wok bilong helpim ol narapela man na ol i putim hevi tasol long ol narapela man. Ating bihain bai ol lapun i stap nogut moa yet.
Tasol ol Kristen tru i ting olsem wanem long ol lapun? Ol i save “bihainim gutpela pasin bilong bipo” na mekim gut long ol lapun o olsem wanem?