Ripot long Wok Bilong Kingdom
Lait i Kamap Strong Long Kantri Sili
LONG yia 1930 lait bilong tok i tru bilong Baibel i kamap long hap bilong Sili long namba wan taim, olsem lait bilong san i kamap long ol maunten Andes taim tulait i bruk. Long dispela yia wanpela wokman bilong Jehova i dediket pinis em i lusim Ajentina na em i kisim gutpela tok bilong Kingdom i go long kantri Sili. Long nau lait bilong Baibel i kamap strong long olgeta hap bilong Sili.
Long yia 1945 ol i putim namba wan brens-ofis long Sili, na ol i wokim nupela bikpela haus brens long yia 1970 taim i gat 7,000 man bilong autim tok long Sili. Insait long 10-pela yia bihain, lait bilong Baibel i kamap strong moa na i kirapim planti man moa long bilip. Olsem na long 1981 samting ol i save ol i mas wokim nupela haus brens i bikpela moa. Long Septemba 1982 ol i baim wanpela hap graun (7 hekte) klostu long biktaun Santiago. Ol i stretim dispela graun na long Jun 1984 ol i kirap long wokim nupela haus brens.
Ol brata i amamas, long wanem ol brata sista bilong Sili−ol yangpela na ol lapun−ol i givim bel long helpim dispela wok. Ol i givim mani, na planti tausen ol i givim taim na strong na save bilong ol bilong helpim dispela wok. Sampela ol i bin skul long teknikal koles ol i helpim wok bilong ol ensinia. Sampela i mekim wok kamda o welda o ol i samapim laplap bilong ol windo o wokim gaden; sampela ol i givim bel long rausim ol gras nogut long gaden, na subim wilbara, na wokim baret. Gutpela save ol i bin kisim long Baibel, dispela samting i kirapim bel bilong ol dispela manmeri bilong God na ol i givim bel long helpim dispela wok.−Sam 110:3.
Ol i stap wanbel na givim bel long mekim wok na ol man ausait i lukim dispela samting. Planti man bilong salim samting, na ol stiuden long yunivesiti na ol profesa tu ol i kam lukim wok ol brata i mekim bambai ol i ken lain na kisim save. Wanpela man bilong wokim ol haus i laik baim ol brata i wok long simen bilong i go wokim wanpela bikpela haus stua em i kisim kontrak bilong wokim. Wanpela man bilong salim samting, em i tok ol brata i narapela kain wokman−ol i no save tok swea o les long mekim wok. Taim ol brata i tokim em, olgeta dispela wokman ol i Witnes Bilong Jehova na ol i no kisim pe, em i tok: “Yupela i narapela kain tru.”
Long Ogas 1986 ol brata i wok long haus brens ol i go sindaun long dispela nupela haus long Puente Alto. Na long Oktoba 25, A. D. Schroeder bilong Lain Bilong Bosim Ol Witnes em i mekim tok bilong dediketim dispela nupela haus. Inap 933 ol i bung na ol i wanbel long givim dispela haus bilong mekim wok bilong Jehova. Long tumora, inap olsem 18,012 brata i bung long wanpela stediam i stap klostu na ol tu i tok ol i laik givim dispela nupela haus bilong mekim wok bilong Jehova.
Tasol ating i gat wok long ol dispela nupela haus ol i bin sanapim? I gat! Taim ol i baim dispela hap graun long yia 1982 i gat 17,500 man bilong autim tok bilong Kingdom long Sili. Nau winim 29,000 ol i stap! Na ol i save mekim inap olsem 40,000 Baibel stadi, olsem na yumi save lain bilong ol bai wok yet long i go bikpela. Lait bilong Baibel, em Tok Bilong God, i mas kamap strong yet long dispela kantri long as bilong ol maunten Andes, na dispela bai litimapim nem bilong Jehova na givim blesing long ol manmeri bilong em.−Danyel 12:3.