Gutpela Wok Ol Pikinini Inap Mekim
GUTPELA tok ol pikinini i mekim em inap kirapim tru tingting bilong ol man i bikpela pinis. Long taim bilong Jisas ol pikinini i lukim ol mirakel Jisas i wokim na ol i singaut i tok: “Amamas long Pikinini Bilong Devit!” Ol hetman bilong lotu i laik pasim ol pikinini. Ol i bel nogut long Jisas, olsem na ol i no pilim as bilong dispela tok, olsem Jisas em i Mesaia o Krais i kamap long lain bilong King Devit. Jisas i tokim ol: “Ating yupela i no bin ritim tok i go olsem: ‘[God i] bin opim maus bilong ol liklik pikinini na ol bebi i stap long susu, na ol i litimapim nem bilong [em].’” (Matyu 21:15, 16) Long nau tu God i mekim gutpela wok long “maus bilong ol liklik pikinini” bilong helpim ol man, em ol tok giaman i pasim tingting bilong ol.−2 Korin 4:4
◻ Dalin (Daleen) em wanpela pikinini meri em i gat 12-pela krismas. Em i save mekim gut ol wok long skul. Wanpela taim tisa i gat narapela wok na em i tokim Dalin long lukautim klas bilong em. Bai em i mekim wanem? Em i tok: ‘Mi tingting long stori long ol wanklas bilong mi olsem ol stretpela man bai stap oltaim long graun na sampela tasol bai go long heven.’ Tisa i orait long dispela samting na Dalin i kisim wanpela wanklas na toktok wantaim em na ol narapela i harim. Dalin i kaunim planti tok bilong Baibel. Em i kaunim tok bilong Sam 37:29 tu long ol: “Ol stretpela man bai i kisim graun God i givim ol, na bai ol i stap oltaim long en.” Wanem samting i kamap? Dalin i tok: “Tisa i lusim wok bilong em na em i putim gut yau long ol tok bilong mi olsem ol pikinini i mekim. Bihain em i tok tenkyu long mi na sampela pikinini ol i givim askim long mi.”
◻ Liklik pikinini meri, Lillian, em i gat 5-pela krismas. Haus bilong papamama i stap longwe inap 19 kilomita long wanpela liklik taun long Saut Afrika. Long olgeta taim papamama i save kisim Lillian i go long ol miting long dispela liklik taun na i go long autim tok. Tasol wanpela Sande ka i no wok na tupela i no i go. Lillian i askim papamama: ‘Bilong wanem yumi no i go autim tok?’ Papamama i tokim em, ka i no wok. Lillian i ting dispela i no gutpela as bilong lusim wok autim tok, olsem na em i tok: “Mi no ken larim dispela samting i pasim mi.” Bihain mama i lukim olsem Lillian i bin kisim paus bilong em bilong autim tok na em i lusim haus i go. Dispela liklik meri i go long ol haus klostu na givim planti buk na nius bilong Baibel long ol man−em i givim Baibel bilong mama tu!
Wanpela lapun meri i pilim tru ol tok Lillian i mekim long gutpela ples Paradais i laik kamap long graun, olsem na bihain em i orait long mama bilong Lillian i stadi wantaim em na lainim em long ol tok bilong Baibel. Nau dispela lapun meri i dediket pinis na em i save lotuim Jehova.
Tru tumas, God i “opim maus bilong ol liklik pikinini” na ol i litimapim nem bilong em. Gutpela tok ol i mekim inap kirapim tru tingting na bel bilong ol man. God i tok, ol man i bikpela pinis ol i mas litimapim nem bilong em, na i stret em i singautim ol pikinini tu long mekim olsem: “Ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela! Tru tumas, olgeta i mas litimapim nem bilong Bikpela. Biknem bilong em wanpela i winim tru biknem bilong olgeta manmeri.”−Sam 148:7, 12, 13.