Ripot long Wok Bilong Kingdom
Manki i Gat 5-pela Krismas Em i Kirapim Tingting Bilong Ol
LONG kantri Veneswela lain Witnes Bilong Jehova i winim 40,000 na namel long ol Witnes i gat gutpela stori bilong wanpela manki em i gat 5-pela krismas. Dispela manki em i bin harim gut ol pablik-tok long wanpela buk i stori long God yet i bin wokim olgeta samting long dispela graun, na dispela manki wantaim famili bilong em ol i bin skelim ol tok bilong dispela buk (Life—How Did It Get Here?—By Evolution or by Creation?). Dispela liklik manki long dispela famili i bilip long God em i save olsem tok bilong evolusen i no stret, em ol man i tok laip i bin kamap nating long wanpela kain wara ol i kolim “sup.” Wanpela hap bilong dispela buk i stori long dispela tingting bilong ol man.
I gat wanpela famili (em papa na mama na tupela pikinini man i gat olsem 15 krismas samting na liklik pikinini meri i gat 7-pela krismas) ol i stap klostu long haus bilong dispela liklik manki na inap 14 yia olgeta ol i bin les long harim tok bilong famili Witnes taim ol i laik kirapim ol long skelim ol tok bilong Baibel o ol i singautim ol i go long Haus Kingdom.
Wanpela taim meri Witnes i wok long wasim ol plet na em i harim dispela liklik pikinini man bilong em na liklik pikinini meri bilong haus klostu, em tupela i toktok wantaim. Liklik manki i tok: “Olaman! Ol man bilong graun i tok olsem yumi bin kamap insait long sup!” Liklik meri i bekim tok olsem em i save mekim oltaim na em i tok: “Olsem wanem? Yu longlong?” Na manki i tok: “Mi no longlong. Ol man bilong graun i tok olsem ol man i bin kamap insait long sup; tasol Jehova i wokim man.” Liklik manki i ting dispela “sup” em sup bilong kaikai na em i no laik tru long sup. Em i tokim liklik meri: “Papa bilong mi i ken givim buk Creation long papa bilong yu na bai em i ken save olsem God i bin wokim ol man.” Tasol liklik meri i tok ol i bilong lotu Katolik, na tupela i no stori moa.
Taim man bilong sista, em wanpela elda, i pinis wok na i kam bek long haus, sista i tokim em long ol samting em i bin harim. Ol i tingim toktok bilong tupela pikinini na ol i lap, tasol brata i ting olsem ating Jehova i laik bai em i autim tok gen long dispela man i stap klostu. Olsem na sampela de bihain, em i go long dispela man na i tokim em long ol samting tupela pikinini i bin stori long en. Em i tokim dispela man, pikinini bilong em i laik givim buk Creation long em, olsem na em i kam givim long em. Witnes i tokim dispela man long kaunim dispela buk na tingim gut ol tok em i kaunim, long wanem ol tok i stap insait long dispela buk i stori long as bilong laip.
Sampela de bihain, brata i kirap nogut long lukim dispela man wantaim meri bilong em i kam long haus bilong em na tupela i tok sori long em, long wanem inap planti yia ol i no laik harim tok. Ol i amamas long dispela buk (Creation) na ol i tok dispela em i wanpela gutpela buk tru.
Dispela famili i kirap long stadi long Baibel. Na ol i kirap long i go long olgeta miting na long autim tok bilong gutnius. Long wanpela kibung distrik, dispela man wantaim meri bilong em na tupela bikpela pikinini man bilong ol, ol i kisim baptais, na liklik pikinini meri nau em i kamap pablisa na em i autim tok bilong Kingdom. Taim mama bilong ol i baptais pinis, kwiktaim em i kirap mekim wok painia haptaim long olgeta mun.
Krais Jisas i save long ol manmeri i gat gutpela bel, na long rot bilong ol liklik pikinini tu em i wok long putim tok i go daun long bel bilong ol.—Jon 10:14.