Saiens Inap Makim Olsem Ol Mirakel i No Bin Kamap o Olsem Wanem?

Ol mirakel em Baibel i stori long en, ol i bin kamap tru o nogat? Planti man, na ol saveman bilong saiens na bikpela man bilong lotu tu, ol i ting olsem stori bilong ol mirakel long Baibel em stori nating tasol bilong ol man bilong bipo em ol i gat ol bilip giaman, na ol dispela mirakel i no bin kamap tru. Ol i ting saiens, olsem bikpela save bilong graun ol man bilong nau i kisim, dispela i kamapim klia olsem i no inap ol dispela mirakel i bin kamap. Olsem na ol tok bilong wanpela pas sampela saveman bilong saiens i raitim long wanpela nius bilong Landon (The Times) i bikpela samting. Pas i tok:

“I no stret long ol man i kamapim save bilong saiens bilong daunim ol mirakel. Sapos ol i tok i no gat as na man i ken bilip long ol mirakel, orait ol i mas save, i no gat as tu na ol i tok ol mirakel i no inap kamap. . . . Ol mirakel em ol narapela kain samting i kamap na i no gat kain samting olsem i save kamap. Maski ol man i gat wanem kain tingting long nau, . . . i bikpela samting long mipela i mas tokaut olsem, saiens (as bilong en em ol samting i save kamap na ol man i lukim) i no inap makim olsem ol mirakel i bin kamap tru o nogat. Ol samting ol man i save long en, dispela tasol i as bilong ol ‘lo’ bilong saiens. Tasol as bilong bilip i narapela.” (Hap tok i stap long narapela kain rait, em mipela yet i raitim olsem.) Olsem na bikpela save ol man bilong nau i kisim i no inap makim olsem stori bilong ol mirakel long Baibel em stori nating. Saiens i no inap makim olsem ol dispela mirakel i no bin kamap. Nogat.