Ripot Long Wok Bilong Kingdom
Autim Tok Long Kain Kain Taim na Ples, na Ol Man i Wok Long Painim Tok i Tru Bai Harim
BAIBEL i tok, ol man i kain olsem sipsip ol bai harim maus bilong Gutpela Wasman na bihainim. (Jon 10:27) Dispela samting i bin kamap long planti hap graun, na long Inglan tu.
◻ Long 1988, paslain liklik long taim bilong Krismas, wanpela Witnes Bilong Jehova, nem bilong em Pamela, em i stap long ofis bilong kampani em i wok long en na wanpela man, em tu i wok long dispela kampani long narapela hap bilong Inglan, em i toktok wantaim Pamela long telefon. Taim ol i toktok pinis, dispela man i tok: “Yu redim pinis ol samting bilong Krismas?” Pamela i tok: “Nogat!” Dispela man i tok: “Bai yu no gat taim nau bilong redim ol samting.” Pamela i tok: “Mi no save mekim Krismas.” Dispela man i kirap nogut, na em i askim Pamela bilong wanem em i no mekim. Pamela i tok em i wanpela Witnes Bilong Jehova, na em i stori olsem i no gat wanpela tok i stap long Baibel i tok yumi mas tingim de mama i bin karim Jisas, na em i tok mama i no bin karim Jisas long Disemba 25. Na em i tokim dispela man, ol haiden i as bilong ol amamas bilong Krismas.
Tripela mun bihain, telefon i ring na Pamela i holim na wanpela man i tok: “Paslain long Krismas yu bin toktok wantaim mi na tokim mi bilong wanem yu no save mekim Krismas, yu tingim? Nau mi painim pinis tok i tru!” Em dispela man tasol, na em i tokim Pamela olsem tupela wik bihain long Krismas, tupela Witnes i bin i kam long haus bilong em. Em i singautim ol i kam insait, na ol i kirapim Baibel-stadi wantaim em. Em i tok, stadi bilong em i kamap gutpela. Em i save stap wantaim wanpela pren meri bilong em, na em i tokim dispela meri, Jehova i no amamas long tupela i stap wantaim, olsem na dispela meri i go i stap long narapela haus, na nau tupela wantaim i save go long ol miting long Haus Kingdom.
Long pinis bilong yia 1989, kongrigesen i orait long tupela i kamap pablisa i no baptais yet, na long kirap bilong yia 1990 tupela i marit. Na bihain tupela i kisim baptais wantaim. Em wanpela gutpela samting tru i kamap, long wanem wanpela sista i autim tok long rot bilong telefon!
◻ Jehova i blesim wok bilong narapela sista long Inglan. Wanpela man i kam long haus bilong em, na em i laik bai sista i baim insurens. Sista i askim em, “Yu laik bai wanpela man i tok promis long helpim yu long i stap gutpela na i stap amamas na i stap oltaim?” Man i tok: “Mi laik, tasol wanem kampani bilong insurens inap tok promis olsem?” Sista i kisim Baibel bilong em na opim na stori long tok promis bilong God long givim laip oltaim long ol manmeri long Paradais long graun, na dispela i kirapim man long kisim wanpela buk, nem bilong en Yu Inap i Stap Oltaim Long Paradais Long Graun, na long wanpela nait tasol em i kaunim olgeta tok bilong dispela buk. Taim em i go lukim dispela sista gen, em i tokim sista em i laikim tru olgeta tok bilong dispela buk, tasol em i pilim olsem em i sot long bilip na i hatwok long bilip. Sista i tok i gutpela sapos em i stadi long Baibel na go long ol miting long Haus Kingdom. Em i kirap long stadi na long i go long ol miting. Long dispela yia tasol em i kisim baptais, na wanpela yia bihain em i maritim pikinini meri bilong dispela sista i bin autim tok long em long pastaim. Olsem na dispela sista i tok, “Mi autim tok long kain kain taim na ples na nau dispela man i kamap brata na tambu pikinini bilong mi!”
Tru tumas, taim yumi autim tok bilong Baibel long kain kain taim na ples, ol man i laik kisim save long tok i tru ol bai harim na bihainim. Olsem Jisas i tok, ol sipsip bilong em i save harim maus bilong em.