Ol i Mekim Ol Samting Ol Inap Mekim

Yumi no inap bekim gutpela pasin Jehova i bin mekim bilong helpim yumi, tasol planti ol i mekim ol samting ol inap long mekim bilong helpim wok bilong ol Witnes bilong em long autim tok long olgeta hap bilong graun. (Matyu 24⁠:14; lukim tu Mak 14⁠:​3-9.) Olsem na wanpela famili long Minesota (Amerika) i raitim pas na ol i tok:

“Yes Ol Brata,

“Mipela salim kontribusen i kam em inap $——. Mipela laik bai yupela i mekim wok long dispela mani bilong helpim wok bilong autim tok long olgeta hap, o bilong helpim ol brata long wokim ol Haus Kingdom, o bilong helpim oganaisesen long mekim narapela wok ol i sot long mani bilong mekim. . . .

“Mipela i save yupela bai mekim wok long dispela mani i stret long laik bilong [Jehova]. Long dispela taim mipela laik strongim yupela long mekim yet gutpela wok bilong yupela, na mipela laik tok tenkyu long yupela long gutpela video-kaset i stori long wok bilong Sosaiti [Was Taua] long olgeta hap bilong graun. Ol samting mipela lukim long dispela video i helpim mipela long pilim bikpela wok tru Sosaiti i mekim na wok bilong mipela long salim mani bilong helpim dispela wok. Bipo mipela yet i no tingting tumas long salim kontribusen, long wanem, mipela i save ol kongrigesen na sekit na distrik i save salim, tasol nau mipela i laik tenkyu long Jehova, long wanem, maski mipela i no gat gutpela tingting, em i isi long mipela na long pasin sori em i helpim mipela long save, mipela i mas givim ol kontribusen na salim mani tu bilong helpim dispela wok bilong kisim bek ol man. Mipela famili i pasim tok pinis long salim mani inap olsem $——long olgeta mun, o sampela mani moa, i go stret long Nu Yok.

“Tenkyu gen long gutpela wok yupela i mekim bilong helpim mipela na long gutpela pasin bilong yupela long i stap gut long Jehova.”