“Dispela Bikpela Strong . . . Em i Strong Bilong God”
KRISTEN inap sanap strong na karim wanem ol kain hevi? Planti hevi i save painim ol Kristen long olgeta hap long graun, olsem i stap rabis, na hevi long famili, na bikpela bel hevi, na sik, na pait, na ol man i mekim nogut long ol. Yu ting ol i inap sanap strong, maski i gat ol dispela kain hevi? Aposel Pol i tok ol inap long sanap strong. Em i tok: “[God] i save strongim mi, na long strong bilong em mi inap mekim olgeta samting.”—Filipai 4:13.
Ol samting i kamap long bipo i soim olsem strong bilong Jehova inap long strongim yumi long olgeta kain hevi. Olsem: Long taim ol Natsi i bosim Jemani, ol i mekim nogut tru long ol Witnes Bilong Jehova. Olsem wanem? Ol Witnes i bin sanap strong? Wanpela buk (The Bible Students and Nazism) i tok: “Ol i bin paitim na pretim ol [Witnes Bilong Jehova], na tambuim ol wok bilong ol, na semim ol long ai bilong ol man, na kalabusim ol, na putim ol long banis kalabus nogut, tasol ol [Witnes] i no larim tok bilong ol Natsi i paulim tingting bilong ol.”
Taim ol Witnes i stap long ol banis kalabus nogut, ol i gat blupela mak long han bilong siot bilong ol na ol man i ken luksave long ol, na ol bos bilong kalabus i mekim nogut tru long ol, winim pasin nogut ol i mekim long ol narapela kalabusman. Olsem wanem? Ol i lusim bilip bilong ol? Wanpela dokta bilong stretim sik bilong tingting (em Bruno Bettelheim) i tok, ol Witnes “i mekim gutpela pasin moa yet na stretpela pasin. Ol samting i painim ol man long dispela kain kalabus, i olsem i gat wanpela samting i lukautim ol Witnes na ol i no larim ol samting nogut bilong kalabus i bagarapim pasin bilong ol, tasol dispela i bagarapim kwik pasin bilong sampela man em ol pren i wanwok bilong mi na mi yet i ting ol i sindaun gut wantaim ol narapela long kalabus.”
Yes, ol dispela Witnes i gat ‘strong inap long mekim olgeta samting.’ Olsem wanem na ol i gat dispela strong? Long wanem ol i bilip strong long Jehova. Pol i tok: “Dispela [strong] i stap long mipela aposel olsem em i stap insait long ol samting nating i no gat strong, . . . Em bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.” (2 Korin 4:7) Sapos wanpela hevi i painim yu, bilip strong long Jehova na em bai helpim yu. Bai em i givim dispela bikpela strong bilong em long yu, na bai yu inap long sanap strong.—Luk 11:13.