Ripot Long Wok Bilong Kingdom

Gutpela Tok i Kam Long Isten Yurop

PLANTI gutpela samting i kamap long wok bilong God long Isten Yurop. Wanpela gutpela samting em kibung intenesenel i bin kamap long Sagreb, long Ogas 16-18, 1991, na long dispela taim 7,300 Witnes bilong dispela hap i amamas tru long lukim ol brata bilong 15 kantri i kam long kibung. Inap olsem 14,684 olgeta i bin bung. Long dispela kantri ol lain yet i pait, tasol ol Witnes i kamapim klia olsem narapela i sori long narapela na ol i stap wanbel!

Ol Witnes long Isten Yurop i mekim planti wok long tokim ol narapela long gutpela tok bilong Kingdom bilong Jehova. Ol i save dispela Kingdom tasol em i rot bilong kamapim gutaim tru. Ol Witnes i no save insait long pait o wok politik, olsem na long sampela hap ol i karim hevi long dispela. Tasol planti man i harim tok, na ol Witnes i gat planti gutpela stori long wok bilong ol.

Long wanpela taun i gat wanpela Witnes Bilong Jehova tasol i stap na wanpela yangpela meri i gat 16 krismas i harim tok bilong Kingdom long em. Em i kirap stadi long Baibel na em i pilim tru tok i tru. Em i laik tru long tokim ol narapela long ol gutpela tok em i bin lainim, olsem na em i traim toktok wantaim ol wanskul bilong em, tasol ol wanskul i birua na tok bilas long em. Wanpela wanskul i birua tru long em, tasol dispela wanskul i kirap nogut long pasin isi bilong dispela yangpela sumatin bilong Baibel, maski wanskul i tok nogut long em, em i no save kros. Bihain yangpela meri i autim gut tok long wanskul ya, na wanskul i save pasin bilong em i no stret. Dispela wanskul i kirap long stadi long Baibel, na tupela i traim long toktok wantaim ol narapela long ol gutpela tok ol i bin lainim, maski papamama bilong ol, na tisa na ol wanskul i birua long ol.

Long wok autim tok bilong ol, narapela wanskul i bilipim tok i tru. Nau i gat 3-pela long klasrum i bihainim tok i tru, na olgeta 3-pela i mekim gutpela pasin long helpim ol man na narapela i sori long narapela. Bihain narapela yangpela meri i bung wantaim ol.

Nau i gat 4-pela yangpela meri i sindaun wantaim long banis bilong skul na stori wantaim long Baibel. Planti i kirap nogut, long wanem, lain bilong ol i go bikpela. Narapela yangpela meri long klas bilong ol i pilim tru gutpela pasin bilong ol na bung wantaim ol. Ol dispela 5-pela meri i wok long singautim ol narapela sumatin na ol tisa long bung wantaim ol na stadi long Baibel. Tasol ol i kisim hevi long papamama bilong ol. Papamama bilong ol i laik subim ol na bai ol i no stadi moa long Baibel, na ol i bagarapim ol buk na nius bilong ol na mekim nogut long ol.

Pastaim i gat wanpela yangpela meri tasol em i laikim tok i tru, tasol em i autim tok na wanem samting i kamap? Wanpela bilong ol dispela yangpela meri i kisim baptais long kibung distrik long 1990, na ol narapela 4-pela i kisim baptais long wanpela kibung sekit long 1991. Dispela samting i kamapim bikpela amamas tru! Long nau, olgeta 5-pela i mekim wok painia oltaim! Nau long dispela taun i gat 11 pablisa na 8-pela bilong ol i mekim wok painia.

Jehova em i helpim na blesim ol Witnes bilong em long Isten Yurop. Long dispela hap i gat bikpela wok yet long bungim ol man i gat gutpela bel, na bai lain i go bikpela.