Ol i Kam—Maski i Hatwok na Bagarap Inap Painim Ol
LONG Janueri 2, 1992 long ples Maksikse, long Provins Inhambane long kantri Mosambik, long Afrika, wanpela man i opim redio na dispela i daunim ol pairap i save kamap long nait long dispela hap. Man i toktok long redio i tok: “Ol Witnes Bilong Jehova i laik mekim ‘Ol Man Bilong Laikim Pasin Bilong i Stap Fri’ kibung long provins bilong yumi. Wok bilong ol em bilong lainim ol man long rot bilong i stap fri tru long nau. Olgeta i ken i kam long kibung.”
Long dispela longwe ples long Afrika, wanpela samting i kamap i no bin kamap bipo long dispela hap! Long namba wan taim ol Witnes Bilong Jehova i mekim wanpela kibung distrik bilong ol, na 1,024 manmeri i go long en. Sampela yia bipo ol i no inap mekim kibung olsem, long wanem, gavman i bin tambuim wok bilong ol. Yu laik harim stori bilong hatwok bilong sampela long i go long kibung?
Provins Inhambane em i naispela ples tru olsem planti narapela hap bilong Afrika. Wanpela kain bot bilong kisim pis i raun long solwara klostu long nambis. I gat planti diwai kokonas. Tasol samting nogut bilong dispela hap, em olsem: Ol lain bilong kantri yet ol i pait.
Ol i pait long bus long nait, na klostu long tulait ol man i slip long ol haus kunai i save harim pairap bilong ol gan samting na ol i lusim slip na kirap. Planti taim ol man i no gat asua i kisim hevi long dispela pait. Yu inap lukim sampela pikinini i no gat lek o lek i bagarap na ol i wokabaut kranki. Sampela Witnes tu i bin kisim bagarap. Ol man i bin paitim ol na mekim nogut long ol na mak bilong sua i stap yet long pes na skin bilong ol.
Maski i gat ol dispela hevi, ol manmeri i go long dispela kibung ol i pilim tru ol tok bilong en. Ol man nogut i save hait na bagarapim ol man i wokabaut long rot, tasol planti famili long hap bilong bus ol i tingting strong long i go long kibung, maski bagarap inap painim ol long rot. Na i hatwok long i go long kibung, long wanem, ol i mas sindaun long baksait bilong ol bikpela trak i op, na sampela taim inap olsem 400 manmeri i save pas pas insait long wanpela trak tasol! Sampela trak i lain wantaim na ol trak bilong ami i bihainim ol i go bilong was long ol.
Wanpela famili i go long kibung, maski i gat ol dispela hevi, em Nora wantaim 3-pela liklik pikinini meri bilong em. Nora i bin bungim mani inap planti mun bilong i go long kibung. Em i no save ol bai stap we, tasol dispela i no pasim em. Nora na famili bilong em wantaim planti narapela famili ol i kukim kaikai, na kisim kaikai, na slip long ples klia long ples kibung.
I gat bikpela san, na bihain bikpela ren i pundaun, tasol dispela i no daunim amamas bilong ol brata i bung wantaim long kibung na kisim kaikai bilong spirit. Long tingting bilong ol, bikpela samting em olsem: Ol i mas stap long dispela kibung. Inap olsem 17 ol i kisim baptais long Solwara India. Taim ol i kisim baptais, bikpela lain i lukluk i stap na ol i amamas na ol i kirap mekim singsing long Jehova.
Dispela lain bilong lotu i kisim save long rot tru bilong kamap ol man bilong laikim pasin bilong i stap fri. Wanpela man bilong biktaun Maputo, em Hans, em i tok: “Nau yumi lukim nupela hap wok bilong Ol Witnes Bilong Jehova i kirap long dispela hap bilong Afrika.”