Olsem Ol Balus i Flai i Kam Bek Long Haus Bilong Ol

I GAT planti pisin i laikim man, tasol ating namba wan pisin i laikim ol man em balus. Planti tausen yia i go pinis ol Isip i save lukautim ol balus na ol i wokim haus bilong ol balus klostu long haus bilong ol. Long dispela rot bai ol i gat abus long olgeta taim. Ol i laikim tru dispela abus, na ol i save putim pekpek bilong ol balus long gaden. Long yia 476 bihain long taim bilong Jisas na i go long yia 1450 samting ol man i resis long lukautim ol balus na long sampela kantri, gavman i orait long ol bikman na ol lain bruder tasol i ken lukautim.

Long nau i no planti man i save kaikai balus; ol i save kaikai kakaruk. Tasol sampela haus bilong ol balus em ol man i bin wokim long bipo ol i stap yet. Kain haus bilong ol balus olsem i stap long piksa hia em i stap long provins Palensia, long kantri Spen, na ol i bin wokim dispela haus long ol brik. Insait i gat planti handet hul bilong ol balus i ken wokim haus long en bilong putim kiau bilong ol.

Long apinun planti balus tru i save flai i kam bek wantaim long haus, olsem klaut. Profet Hibru Aisaia i stori long dispela samting taim em i mekim askim olsem: “Wanem ol dispela waitpela samting i spit i kam olsem klaut win i bringim i kam antap long solwara, na olsem ol pisin i flai i kam bek long haus bilong ol?”​—⁠Aisaia 60:⁠8.

Ol dispela ‘waitpela samting i kam olsem klaut’ i makim ol planti tausen manmeri long nau ol i givim bel long God na ol i wok long kam insait long oganaisesen bilong Jehova. Long ol Haus Kingdom bilong ol Witnes Bilong Jehova ol i lain long givim bel long God. (Aisaia 60:⁠9) Namel long lain bilong God, ol i kisim save olsem sapos yumi bihainim ol lo bilong God na yumi gat strongpela bilip na ol gutpela poroman, yumi inap i stap bel isi olsem ol balus i stap long haus bilong ol.

[Piksa Kredit Lain long pes 32]

Pictorial Archive (Near Eastern History) Est.