Olpela Haus Sik i Kamap Haus Kingdom

LONG yia 1770 wanpela bikman bilong Inglan, em Kepten Jems Kuk, em i go long Ostrelia long wanpela sip ol i kolim Endeavour, na long Jun 11 sip i pas long rip long apinun long nambis i no gat ol man i stap long en. As bilong sip i kisim bikpela bagarap, tasol ol i mas stretim hariap na bai ol boskru i no ken i dai. Ol i putim sip long maus bilong wanpela wara, na insait long 6-pela wik ol i stretim pinis. Inap 103 yia bihain ol man i painim planti gol long dispela hap, na planti tausen man i go bilong kisim gol, olsem na taun Kuktaun i kamap.

Bagarap i painim sampela man taim ol i wok long kisim gol, olsem na gavman i orait long ol i wokim wanpela gutpela haus sik long yia 1879 bilong lukautim ol sikman. Long dispela yia yet, olsem long Julai 1, 1879, namba wan Wastaua i bin kamap (Zion’s Watch Tower). Kirap long dispela taim na i kam inap nau, dispela magasin Wastaua i bin helpim planti milion man long kamap strong long ol samting bilong spirit. Tasol long dispela taim ol i no bin save olsem bihain dispela haus sik long Kuktaun bai mekim wankain wok olsem bilong dispela magasin Wastaua.

Orait, 100 yia samting bihain moa ol i laik wokim nupela haus sik, na gavman i makim sampela mani bilong mekim olsem, na ol i singautim sampela kampani i kam rausim dispela olpela haus sik. Tasol i gat wanpela lain (The National Trust of Queensland) i no laik bai dispela haus sik i bagarap, na ol i laik sanapim long narapela hap na stretim gut, tasol ol i no gat mani inap long baim kampani long mekim olsem.

Long dispela taim liklik kongrigesen bilong ol Witnes Bilong Jehova long Kuktaun ol i wok long painim wanpela haus na bai ol i ken bung na mekim miting bilong ol long en, tasol ol i no gat graun, na ol i gat 800 dola tasol, na dispela i no inap long wokim wanpela Haus Kingdom. Orait, ol i tokim kaunsil long ol yet inap kisim dispela haus sik i go sanapim long narapela hap, tasol ol i no kolim sampela pe. Ol i laik save, Jehova bai helpim ol long kisim, o nogat. Orait, kaunsil i tok, ol i ken kisim!

Tasol olsem wanem long graun na bai ol i ken putim dispela olpela haus sik long en? Orait, gavman i tok, sapos ol i stretim dispela haus na lukautim gut, gavman bai givim graun long ol na i no gat pe bilong en. Tasol sampela ol man i no laik bai ol Witnes i kisim dispela graun wantaim haus sik, na ol i kirapim ol man long pasim gavman na bai ol Witnes i no ken mekim dispela samting. Ol i kirapim wanpela tok giaman na i tok, ol Witnes Bilong Jehova i laik bosim Kuktaun na putim tambu long ol hotel na ples bilong pilai laki na tambuim smok. Tasol ol dispela man i giaman. Ol Witnes i hatwok long kirapim gavman long makim wanpela hap graun na stretim rot na bai ol i ken sanapim dispela haus long en, na ol i mas mekim hariap, long wanem, de kaunsil i makim bilong kisim dispela haus i klostu pinis. Olsem na ol i askim gavman bilong Kwinslan long helpim ol. (Lukim Rom 13:⁠2.) Dispela gavman i orait long givim hap graun long ol na nau ol Witnes i kisim pinis haus sik wantaim graun. Orait, nau ol bai mekim wanem narapela samting?

Planti handet Witnes bilong olgeta hap bilong Kwinslan ol i kam bung long Kuktaun na ol i volantia, na ol i gat save long mekim ol wok na long sanapim hariap ol Haus Kingdom. Dispela haus sik i givim bikpela wok long ol, long wanem, em i gat narapela plua antap na ol i mas tekewe hap hap na karim i go long nupela banis na wokim gen, na taim bilong bikpela ren i klostu pinis. Sampela man bilong taun i ting ol Witnes i no inap mekim dispela samting, long wanem, em bikpela wok tumas, tasol ol Witnes i kirap na mekim save na ol i pinisim pinis dispela wok, na long Epril 1986 dispela olpela haus sik i sanap long nupela graun olsem wanpela gutpela nupela Haus Kingdom! Ol gutpela samting bilong dispela haus bipo i bin bagarap, ol i stretim pinis.

Ol man bilong Kuktaun i lukim ol dispela wok ol Witnes Bilong Jehova i mekim, na wanpela man i raitim pas na i kamap long nius bilong wanpela misin (Anglican Newsletter) na i tok: ‘Sapos yu lukim hamas man i save kam long lotu bilong yumi bai yu save i no planti, tasol sapos yu lukim lain Witnes Bilong Jehova bai yu lukim ol i kamap planti na ol i kisim ol Angliken na Katolik. Misin bilong ol i bin baim dispela olpela haus sik na ol i wokim i kamap haus lotu bilong ol, long wanem, bipo ol i bin bung long wanpela skul, tasol lain bilong ol i kamap planti na dispela skul i no inap long ol. Sori tumas, yumi kranki tru na yumi larim dispela samting i kamap.’

Long olgeta yia planti tausen turis i save go long Kuktaun. Ol i laik lukim gutpela bus na bikpela rip long solwara na harim ol stori bilong ol samting i bin kamap long dispela hap long bipo. Ol i laik lukim tu haus tumbuna long dispela taun. Na kirap long 1989 planti turis i go lukim olpela haus sik bilong bipo nau em i mekim nupela wok​—⁠nau em i Haus Kingdom bilong Ol Witnes Bilong Jehova bilong Kuktaun. Na ol stua i gat ol laplap na singlis i gat piksa bilong dispela Haus Kingdom long en. Long taim bilong ol turis, long olgeta wik inap 600 turis o inap 1,000 ol i go lukim dispela haus em pastaim ol i bin wokim long yia 1879.

Na ol man i kam long Kuktaun ol i ken kisim tu dispela magasin Wastaua, em tu i bin kirap long yia 1879, na long nau ol i wokim 15 milion long olgeta tupela tupela wik na long 111 tok ples. Magasin Wastaua i save helpim ol man long save long tok promis bilong Baibel em i tok, dispela lain i bin stap long yia 1914 sampela bai stap yet na lukim gutaim bai kamap na ol i no ken sik gen long skin o long spirit. (Aisaia 33:24) Ol planti milion manmeri bai givim bel long mekim olgeta hap bilong graun i kamap olsem wanpela paradais. (Buk Song 37:29) Gutpela sapos yu go long Haus Kingdom long hap bilong yu. Bai yu painim gutpela samting i winim olgeta gol ol man i bin kisim long hap bilong Kuktaun.​—⁠Sindaun 16:⁠16.