Asbisop i No Inap!

LONG yia i go pinis ol bikpela bisop olsem kadinal i bin bung bilong toktok long sampela samting em Misin Katolik i save tingting planti long en. Wanpela nius (Il Sabato) i kolim wanpela samting olsem “ol liklik lotu i wok strong long i go bikpela.” Tasol nius i tok: ‘Bai i no hatwok long ol kadinal i pasim tok wantaim bilong stretim dispela hevi, long wanem, ol i wanbel long ol i mas kisim sampela save moa long ol dispela nupela lotu, na tu, sapos inap, ol i mas mekim sampela samting bilong pasim wok bilong ol bambai ol i no ken i go bikpela moa.’

Tasol i no long Itali tasol “ol liklik lotu i wok strong long i go bikpela,” nogat. Dispela nius i kamapim ripot olsem: ‘Nau tasol, Asbisop (Kirill) bilong Smolensk, long Rasia, i go long Vatiken na tokim pop long mekim sampela samting bilong helpim em long daunim lain Witnes Bilong Jehova na ol narapela lotu i kain olsem, em ol i wok long i go bikpela moa long Rasia.’

Long taim bilong ol aposel, ol hetman bilong lotu Juda ol tu i gat tok long ol Kristen ol i wok strong long kamapim lotu bilong ol long planti hap. Ol Juda i kros na wanpela taim ol i tokim ol hetman bilong taun olsem: “Dispela ol man i save raun na mekim pasin nogut i kamap long olgeta hap bilong graun, na nau ol i kam i stap hia”! (Aposel 17:⁠6) Long dispela taim bipo, ol hetman bilong lotu Juda i wok strong long pasim wok bilong lain Kristen, tasol ol i lus long mekim olsem. Long nau tu, wok bilong pasim ol bilip Kristen em bai i lus nating. God yet i tok promis olsem: “I no gat wanpela bilong ol dispela samting bilong pait inap bagarapim yu. Na bai yu sanap strong na bekim tok bilong ol man i sutim ol kain kain tok long yu. Long dispela pasin mi save was gut long olgeta wokman bilong mi na mekim ol i win.”​—⁠Aisaia 54:⁠17.